ໃນສັງຄົມທຸກມື້ນີ້ທີ່ເຕັມໄປດ້ວຍຄວາມຟ້າວຟັ່ງ, ວຸ້ນວາຍ, ຜູ້ຄົນເຮົາມັກຈະເຮັດວຽກຢ່າງດຸໝັ່ນ, ພັກຜ່ອນໃຫ້ໜ້ອຍ ແລະ ຕ້ອງການທີ່ຈະປະສົບຜົນສໍາເລັດຢູ່ສະເໝີ. ສິ່ງເຫຼົ່ານີ້ສາມາດເຮັດໃຫ້ເຮົາຮູ້ສຶກເຄັ່ງຄຽດ, ວິຕົກກັງວົນ ແລະ ສູນເສຍຄວາມສົມດຸນໃນຊີວິດໄດ້. ການປ່ອຍໃຫ້ຕົວເອງມີເວລາວ່າງ ຈຶ່ງເປັນສິ່ງທີ່ຈໍາເປັນ, ບໍ່ແມ່ນວ່າຕົນເອງຂີ້ຄ້ານ ແຕ່ເປັນການພັກຜ່ອນເພື່ອໃຫ້ຕົວເອງຜ່ອນຄາຍ, ຟື້ນຟູທັງທາງກາຍ ແລະ ຈິດໃຈ.
ບົດຄວາມນີ້ສະເໜີມຸມມອງໜ້າສົນໃຈກ່ຽວກັບ “ການບໍ່ເຮັດຫຍັງ” ໃນເຊີງບວກ ເຊິ່ງປຽບສະເໝືອນກຸນແຈທີ່ນຳໄປສູ່ຄວາມສຸກ ຄວາມຄິດສ້າງສັນ ແລະ ສຸຂະພາບດີ.
ເປັນຫຍັງຈຶ່ງເວົ້າໄດ້ວ່າ “ການບໍ່ເຮັດຫຍັງ” ຈຶ່ງສໍາຄັນ?
ຫຼາຍຄົນອາດຈະເຂົ້າໃຈຜິດວ່າ “ການບໍ່ເຮັດຫຍັງ” ໝາຍເຖິງການນອນຢູ່ເສີຍໆ ແລະ ບໍ່ເຮັດຫຍັງ, ໃນຄວາມເປັນຈິງ, ການທີ່ບໍ່ເຮັດຫຍັງເລີຍ ໃນເຊີງບວກໝາຍເຖິງປ່ອຍວາງພາລະໜ້າທີ່, ຄວາມຮັບຜິດຊອບ ແລະ ຄວາມຄາດຫວັງຕ່າງໆຊົ່ວຄາວເພື່ອພັກຜ່ອນທັງຮ່າງກາຍແລະຈິດໃຈ. ເຊິ່ງນີ້ຈະຊ່ວຍໃຫ້ເຮົາໄດ້ຮັບປະໂຫຍດຕ່າງໆຈາກການຢູ່ຊື່ໆດັ່ງນີ້:
- ຊ່ວຍໃຫ້ສະໝອງຂອງເຮົາໄດ້ພັກຜ່ອນ : ສະໝອງຂອງເຮົາເຮັດວຽກໜັກຢ່າງຕໍ່ເນື່ອງຢູ່ຕະຫຼອດເວລາ, ການບໍ່ເຮັດຫຍັງເລີຍຈະເຮັດໃຫ້ສະໝອງໄດ້ພັກຜ່ອນ, ຟື້ນຟູ ແລະ ກັບມາເຮັດວຽກໄດ້ຢ່າງມີປະສິດທິພາບ.
- ຊ່ວຍໃຫ້ມີຄວາມຄິດສ້າງສັນ: ເມື່ອສະໝອງໄດ້ພັກຜ່ອນ ຄວາມຄິດສ້າງສັນຈະເຮັດວຽກໄດ້ດີຂຶ້ນ. ພວກເຮົາສາມາດຄິດໄອເດຍໃໝ່ໆ, ແກ້ໄຂບັນຫາ ແລະ ສ້າງສັນຜົນງານໄດ້ຢ່າງມີປະສິດທິພາບ.
- ຊ່ວຍໃຫ້ມີຄວາມສຸກຫຼາຍຂຶ້ນ: ປ່ອຍວາງຄວາມກັງວົນ, ຄວາມຄຽດ ແລະຄວາມຄິດທີ່ຕີກັນໃນຫົວ. ຈະຊ່ວຍໃຫ້ພວກເຮົາມີຄວາມສຸກ, ສົດໃສ ແລະ ຮູ້ສຶກຜ່ອນຄາຍ.
- ສົ່ງເສີມສຸຂະພາບທີ່ດີ: ຄວາມກົດດັນມີຜົນກະທົບທາງລົບຕໍ່ສຸຂະພາບທາງຮ່າງກາຍ ແລະ ຈິດໃຈ. ການທີ່ເຮົາບໍ່ໄດ້ເຮັດຫຍັງຈະຊ່ວຍຫຼຸດຜ່ອນຄວາມກົດດັນ ແລະ ສົ່ງຜົນກະດີຕໍ່ສຸຂະພາບໂດຍລວມ
- ຊ່ວຍໃຫ້ເຂົ້າໃຈຕົນເອງຫຼາຍຂຶ້ນ: ເມື່ອເຮົາຢູ່ກັບຕົນເອງ ໂດຍປາສະຈາກສິ່ງລົບກວນ ຈະເຮັດໃຫ້ເຮົາມີເວລາໃນການໄຕ່ຕອງກັບຄວາມຄິດ, ຄວາມຮູ້ສຶກ, ແລະ ເປົ້າໝາຍໃນຊີວິດ ເຮັດໃຫ້ເຂົ້າໃຈຕົນເອງຫຼາຍຂຶ້ນ.
ເຕັກນິກການໃນເຝິກທີ່ຈະ “ບໍ່ເຮັດຫຍັງ”
- ການນັ່ງສະມາທິ : ເປັນວິທີເຝິກຈິດໃຈໃຫ້ສະຫງົບ, ຜ່ອນຄາຍ, ມີຄວາມຕັ້ງໃຈ, ສາມາດເຝິກໄດ້ງ່າຍໆໂດຍການນັ່ງຊື່ໆ, ຫຼັບຕາ, ຫາຍໃຈເຂົ້າ-ອອກຊ້າໆ ແລະ ສູດລົມຫາຍໃຈເຂົ້າ-ອອກ.
- ເຝິກສະຕິ: ເປັນການເຝິກຕົນເອງໃຫ້ມີສະຕິຢູ່ກັບປັດຈຸບັນ. ສັງເກດເບິ່ງສິ່ງຕ່າງໆທີ່ຢູ່ອ້ອມຂ້າງ ໂດຍບໍ່ຕ້ອງຕັດສິນ ວິເຄາະ ຫຼື ປຽບທຽບ. ເຊິ່ງພວກເຮົາສາມາດເຝິກໄດ້ໂດຍການຈົດຈໍ່ກັບກິດຈະກໍາທີ່ເຮັດຢູ່ເຊັ່ນ: ລ້າງຖ້ວຍ, ຍ່າງຫຼິ້ນ ຫຼື ກິນອາຫານ.
- ການໃຊ້ເວລາກັບທໍາມະຊາດ: ການຖືກອ້ອມຮອບດ້ວຍທໍາມະຊາດ ຊ່ວຍໃຫ້ຈິດໃຈສະຫງົບ, ຜ່ອນຄາຍ ແລະ ສົດຊື່ນ. ເຮົາສາມາດໄປຍ່າງຫຼິ້ນຢູ່ໃນສວນ. ນັ່ງຫຼິ້ນຢູ່ແຄມທະເລ ຫຼື ປີນພູກໍໄດ້.
- ຟັງເພງ: ຟັງເພງທີ່ມັກ ຫຼື ເພງທີ່ຖືກສ້າງຂຶ້ນມາເພື່ອຜ່ອນຄາຍ ຈະຊ່ວຍໃຫ້ຈິດໃຈສະຫງົບ, ຫຼຸດຜ່ອນຄວາມຄຽດ ແລະ ເຮັດໃຫ້ເຮົາຮູ້ສຶກດີຂຶ້ນ.
- ການອ່ານປຶ້ມ: ການອອ່ານປຶ້ມຈະຊ່ວຍໃຫ້ໄດ້ຮຽນຮູ້, ຈິນຕະນາການ ແລະ ຜ່ອນຄາຍ.
ຂໍ້ຄວນລະວັງ
ການ “ບໍ່ເຮັດຫຍັງ” ບໍ່ໄດ້ໝາຍຄວາມວ່າເຮົາຕ້ອງນອນເສີຍໆ ບໍ່ເຮັດຫຍັງເລີຍ. ແຕ່ການບໍ່ເຮັດຫຍັງແມ່ນການໃຊ້ເວລາຢ່າງມີສະຕິ. ໂດຍບໍ່ມີການກັງວົນກ່ຽວກັບສິ່ງພາຍນອກ
ການ “ບໍ່ເຮັດຫຍັງ” ອາດຈະເປັນເລື່ອງຍາກໃນໄລຍະທຳອິດ ເພາະເຮົາລຶ້ງກັບການໃຊ້ເວລາໄປກັບກິດຈະກຳຕ່າງໆ, ໃຫ້ລອງເລີ່ມຈາກການໃຫ້ ເວລາວ່າງຕົວເອງປະມານ 5-10 ນາທີຕໍ່ມື້ ແລະ ຄ່ອຍໆເພີ່ມເວລາໃຫ້ຫຼາຍຂຶ້ນ.
ປະໂຫຍກທຳມະດາທີ່ມັກເວົ້າກັນວ່າ ການໃຊ້ເວລາວ່າງໃຫ້ເປັນປະໂຫຍດ ຈຶ່ງເປັນປະໂຫຍກທີ່ຢູ່ນອກເໜືອຈາກການບໍລິຫານເວລາເພື່ອໃຫ້ໄດ້ອັດຖຣົດຈາກການເຮັດບາງສິ່ງບາງຢ່າງທີ່ເປັນປະໂຫຍດ ແລະ ເຮັດສິ່ງນັ້ນຫຼາຍໜ້ອຍເທົ່າໃດ? ແຕ່ອາດເປັນການທີ່ໄດ້ “ບໍ່ເຮັດຫຍັງເລີຍ” ເພື່ອກັບມາເຂົ້າໃຈ ແລະ ໃຊ້ເວລາໃນການເຮັດມັນ. ເຊິ່ງນີ້ອາດໝາຍຄວາມວ່າ ການແນມເຫັນເຖິງຄວາມໝາຍ ແລະ ຈຸດມຸ່ງໝາຍຂອງຊີວິດໃນດ້ານອື່ນໆອີກຄັ້ງ.
ທີ່ມາ:
ຕິດຕາມຂ່າວທັງໝົດຈາກ LaoX: https://laox.la/all-posts/
