ຄຳວ່າ “ໜີ້” ແນ່ນອນວ່າມັນຍ່ອມມີ 2 ດ້ານສະເໝີ, ຖ້າຫາກເປັນໜີ້ເພື່ອນໍາມາຕໍ່ຍອດທຸລະກິດ ຫຼື ລົງທຶນເພື່ອໃຫ້ເກີດຜົນປະໂຫຍດໃນອະນາຄົດນັ້ນໄດ້ກໍຖືວ່າເປັນເລື່ອງທີ່ດີ, ແຕ່ຖ້າຫາກກູ້ຢືມມາເພື່ອໃຊ້ຈ່າຍຕາມຄວາມຕ້ອງການຂອງຕົນເອງ ກິນຫຼິ້ນຟຸມເຟືອຍໄປວັນໆມັນກໍອາດຈະສົ່ງຜົນກະທົບຕໍ່ລະບົບການເງິນຂອງເຮົາໄດ້ ເຊິ່ງຖືວ່າເປັນເລື່ອງທີ່ບໍ່ຄ່ອຍດີເທົ່າໃດ .
ເນື່ອງຈາກໃນປັດຈຸບັນ, ບໍ່ວ່າເຮົາຈະຊື້ຂອງເລັກໆນ້ອຍໆ ເຊັ່ນ ໂທລະສັບມືຖື ຫຼື ແມ່ນວ່າສິ່ງຂອງທີ່ມີຂະໜາດໃຫຍ່ເຊັ່ນ ລົດ ຫຼື ເຮືອນ… ການຜ່ອນຈ່າຍເງິນງວດໆໄດ້ກາຍເປັນການປະຕິບັດທົ່ວໄປໃນສັງຄົມຍຸກປັດຈຸບັນທີ່ສະພາບເສດຖະກິດໂລກຖົດຖອຍ ຈົນວ່າເຮັດໃຫ້ພວກເຮົາບໍ່ສາມາດເກັບເງິນເປັນກ້ອນເພື່ອຊື້ສິ່ງຂອງເຫຼົ່ານັ້ນໄດ້ຕາມປົກກະຕິ.
ການລົງທຶນກໍເຊັ່ນກັນ ສຳລັບບາງຄົນບໍ່ໄດ້ມີເງິນກ້ອນທີ່ຈະນຳມາສ້າງທຸລະກິດໄດ້ເລີຍ ຫຼື ຢາກທີ່ຈະຕ້ອງການຕໍ່ຍອດທຸລະກິດທີ່ມີຢູ່ຂອງຕົນເອງ ແຕ່ຕ້ອງໃຊ້ເງິນຈຳນວນຫຼາຍ. ການເປັນໜີ້ໃນສ່ວນນີ້ຈຶ່ງເໝາະສຳລັບການລົງທຶນທີ່ມີການວາງແຜນວ່າຈະເຫັນຜົນກຳໄລ.
ເເຕ່ກັບບາງຄົນ, ພຽງແຕ່ໄດ້ຍິນຄຳວ່າ “ໜີ້” ກໍກັບມີອາການທີ່ຢ້ານ ແລະ ມີອາການວິຕົກກັງວົນຈົນສົ່ງຜົນຕໍ່ການໃຊ້ຊີວິດ, ບໍ່ຢາກທີ່ຈະກູ້ຢືມ ຫຼື ພຽງແຕ່ກີບດຽວກໍ່ບໍ່ຢາກເປັນໜີ້ ເພາະພວກເຂົາເຫຼົ່ານັ້ນເບິ່ງວ່າ ການເປັນໜີ້ແມ່ນສິ່ງທີ່ຮ້າຍແຮງທີ່ສຸດ ແລະ ສົ່ງຜົນກະທົບຕໍ່ການໃຊ້ຊີວິດຂອງພວກເຂົາຫຼາຍ. ໂດຍສຳຫຼັບກຸ່ມຄົນທີ່ມີອາການເຫຼົ່ານີ້ພວກເຮົາຈະເອີ້ນວ່າ “ຄວາມຢ້ານໃນການມີໜີ້” ຫຼື “Debt phobia”
“Debt phobia” ອາການຢ້ານກົວທີ່ຈະເປັນໜີ້ສິນ
Debt phobia ແມ່ນພາວະທາງຈິດໃຈທີ່ສົ່ງຜົນກະທົບຕໍ່ຄວາມຄິດ, ຄວາມຮູ້ສຶກ ແລະ ພຶດຕິກໍາຂອງບຸກຄົນຕໍ່ເລື່ອງໜີ້ສິນ. ຄົນທີ່ຢູ່ໃນພາວະນີ້ຈະມີອາການຢ້ານກົວ ແລະ ວິຕົກກັງວົນຫຼາຍກ່ຽວກັບການເປັນໜີ້ສິນ, ເຖິງແມ່ນວ່າຈະເປັນໜີ້ຈໍານວນນ້ອຍໆກໍຕາມ.
ສຳລັບຄົນທີ່ມີອາການ Debt phobia ຈະມີຄວາມຮູ້ສຶກທີ່ຢ້ານວ່າຈະບໍ່ມີເງິນໃຊ້ໃນອະນາຄົດ, ຢ້ານວ່າມັນຈະສົ່ງຜົນກະທົບຕໍ່ຄ່າໃຊ້ຈ່າຍ. ດັ່ງນັ້ນ, ຈຶ່ງໄດ້ສ້າງກົນໄກເພື່ອປົກປ້ອງຕົນເອງ ໂດຍການປະຕິເສດທີ່ຈະສ້າງໜີ້ສິນ ແລ້ວເລືອກທີ່ຈະຢູ່ຫ່າງໆ. ແຕ່ບາງຄົນກໍເປັນໜັກຈົນເຖິງຂັ້ນເບິ່ງວ່າ “ໜີ້ສິນ” ເປັນເລື່ອງຮ້າຍແຮງທີ່ສຸດ ແລະ ເລືອກທີ່ປະຕິເສດມັນ ແມ່ນວ່າເຂົ້າໃກ້ໜ້ອຍໜຶ່ງກໍບໍ່ໄດ້.
ໂດຍ Debt phobia ມັກຈະເກີດຂຶ້ນກັບຄົນໃນໄວເຮັດວຽກທີ່ໄດ້ຮັບການປູກຝັງວ່າ ຈະຕ້ອງໃຊ້ເງິນຢ່າງປະຢັດ ຫຼື ອາດຈະປະສົບກັບຄວາມລົ້ມເຫຼວທາງດ້ານການເງິນມາກ່ອນ ຈົນເຮັດໃຫ້ຕ້ອງໃຊ້ຊີວິດແບບຍາກລຳບາກ.
ອາການຂອງ Debt phobia
- ພະຍາຍາມທີ່ຈະຊໍາລະໜີ້ສິນຂອງຕົນເອງທັງໝົດໃຫ້ໄວທີ່ສຸດ. ເຖິງແມ່ນວ່າມັນສົ່ງຜົນກະທົບຕໍ່ຊີວິດປະຈໍາວັນກໍຕາມ
- ຮູ້ສຶກອັບອາຍ ຫຼື ຮູ້ສຶກຜິດເມື່ອມີໜີ້ສິນ
- ຢ້ານການຖືກທວງໜີ້
- ມີຄວາມຄິດວ່າການເປັນໜີ້ແມ່ນສິ່ງທີ່ບໍ່ດີ
- ຫຼີກເວັ້ນສະຖານະການທີ່ອາດຈະນໍາໄປສູ່ການເປັນໜີ້ສິນເຊັ່ນ: ການນໍາໃຊ້ບັດເຄຣດິດ ຫຼື ການຮ້ອງຂໍເງິນກູ້
- ໃນບາງກໍລະນີ, ອາດຈະມີອາການທາງຮ່າງກາຍເຊັ່ນ: ເຫື່ອອອກ, ສັ່ນ, ຫຼືປວດຮາກ.
ສາເຫດຂອງ Debt phobia
- ການລ້ຽງດູ: ຄົນທີ່ເຕີບໃຫຍ່ມາໃນຄອບຄົວທີ່ມີບັນຫາໜີ້ສິນ ຫຼື ຖືກປູກຝັງດ້ວຍຄວາມຢ້ານກົວໃນການໃຊ້ເງິນ
- ປະສົບການສ່ວນຕົວ: ເຄີຍມີປະສົບການທີ່ບໍ່ດີກັບໜີ້ສິນມາກ່ອນເຊັ່ນ: ການລົ້ມລະລາຍ ຫຼື ການຖືກຢຶດຊັບ…
- ຄວາມຜິດປົກກະຕິທາງຈິດ: ມີພາວະວິຕົກຄກັງວົນ ຫຼື ອາການຊຶມເສົ້າ
ຜົນກະທົບຂອງ Debt phobia
- ດ້ານຄວາມສໍາພັນ: ອາດຈະສົ່ງຜົນກະທົບຕໍ່ຄວາມສໍາພັນໃນຄອບຄົວ ແລະ ໝູ່ເພື່ອນ ເນື່ອງຈາກມີຄວາມຄຽດ ແລະ ວິຕົກກັງວົນຫຼາຍເກີນໄປ
- ດ້ານການເງິນ: ອາດເຮັດໃຫ້ເກີດບັນຫາໃນການຈັດການທາງດ້ານການເງິນ
- ດ້ານວຽກເຮັດງານທຳ: ອາດຈະສົ່ງຜົນກະທົບຕໍ່ປະສິດທີ່ພາບໃນການເຮັດວຽກ
- ສຸຂະພາບຈິດ: ອາດຈະເຮັດໃຫ້ເກີດການຊຶມເສົ້າ, ສູນເສຍຄວາມໝັ້ນໃຈ, ຄິດສັ້ນ ເນື່ອງຈາກກັງວົນ ຫຼື ຄວາມກົດດັນທີ່ຫຼາຍເກິນໄປ.
- ດ້ານຮ່າງກາຍ: ຄວາມຄຽດເຮັດໃຫ້ ຄວາມດັນໃນເລືອດເພີ່ມຂຶ້ນ, ປວດຫົວ, ລະບົບຍ່ອຍອາຫານ, ໃຈສັ່ນ, ເຮັດໃຫ້ລະບົບພູມຕ້ານທານອ່ອນແອ…
ວິທີການຮັບມືກັບ Debt phobia
- ຄ່ອຍໆປະເຊີນກັບຄວາມຢ້ານກົວເທື່ອລະໜ້ອຍ.
- ກໍານົດເປົ້າໝາຍທາງດ້ານການເງິນທີ່ຊັດເຈນ ແລະ ສາມາດວັດຜົນໄດ້.
- ວາງແຜນການໃຊ້ຈ່າຍ ແລະ ຕິດຕາມລາຍຮັບ ແລະ ລາຍຈ່າຍຂອງຕົນເອງ.
- ຂໍຄວາມຊ່ວຍເຫຼືອ ຫຼື ຄຳປຶກສາຈາກຄອບຄົວ, ໝູ່ເພື່ອນ ຫຼື ຜູ້ຊ່ຽວຊານ.
ສະຫຼຸບແລ້ວ ການເປັນໜີ້ບໍ່ໄດ້ເປັນສິ່ງທີ່ໜ້າຢ້ານກົວສະເໝີໄປ ພຽງແຕ່ເຮົາຮູ້ຈັກນຳໃຊ້ມັນໃຫ້ເກີດປະໂຫຍດ ດ້ວຍການວາງແຜນທາງການເງິນ ແລະ ກົນລະຍຸດໃນການທີ່ຈະນຳໄປໃຊ້ໃນສ່ວນນັ້ນໆຢ່າງຮອບຄອບ, ປະເມີນຕົນເອງວ່າສາມາດຊຳລະໜີ້ຄືນໄດ້ຫຼາຍໜ້ອຍເທົ່າໃດ? ບໍລິຫານການເງິນຂອງຕົນເອງໃຫ້ດີ ແລະ ມີວິໄນຢູ່ສະເໝີ.
ທີ່ມາ:
ຕິດຕາມຂ່າວທັງໝົດຈາກ LaoX: https://laox.la/all-posts/
