ການຕົກຕໍ່າລົງຢ່າງຕໍ່ເນື່ອງຂອງເງິນກີບ ກໍາລັງສົ່ງຜົນກະທົບຢ່າງຮ້າຍແຮງຕໍ່ຊາວກະສິກອນຂອງປະເທດ ທີ່ກໍາລັງປະສົບກັບຕົ້ນທຶນການຜະລິດກະສິກໍາເພີ່ມຂຶ້ນຢ່າງຫຼວງຫຼາຍ ເນື່ອງຈາກລາຄາຝຸ່ນ, ເມັດພືດ, ນໍ້າມັນທີ່ຈຳເປັນສໍາລັບເຄື່ອງຈັກກະສິກໍາ ແລະ ການຂົນສົ່ງພືດທີ່ເພີ່ມຂຶ້ນ.
ຫົວຂໍ້ດັ່ງກ່າວໄດ້ຈັດຂຶ້ນໃນກອງປະຊຸມປະຈຳປີຂອງເຄືອຂ່າຍຊາວກະສິກອນລາວທີ່ຈັດຂຶ້ນຢູ່ແຂວງຊຽງຂວາງໃນອາທິດຜ່ານມາ.
ຜູ້ຕາງໜ້າເຄືອຂ່າຍຊາວກະສິກອນ ກ່າວໃນກອງປະຊຸມດັ່ງກ່າວວ່າ: “ອັດຕາເງິນເຟີ້ໄດ້ເຮັດໃຫ້ຕົ້ນທຶນການຜະລິດກະສິກໍາເພີ່ມຂຶ້ນຫຼາຍກວ່າສອງເທົ່າເມື່ອທຽບກັບປີທີ່ຜ່ານມາ. ນີ້ໝາຍ ຄວາມວ່າຊາວກະສິກອນຕ້ອງແບກຫາບຕົ້ນທຶນທີ່ເພີ່ມຂຶ້ນສູງ”
ກອງປະຊຸມດັ່ງກ່າວ ໂດຍການເປັນປະທານຂອງ ທ່ານ ວຽງສະໄຫວ ແສງສຸລິວົງ ຮອງຫົວໜ້າພະແນກສົ່ງເສີມ ແລະ ສະຫະກອນ ແຂວງຊຽງຂວາງ; ທ່ານ ຫົງທອງ ພິມມະສານ ຮອງຫົວໜ້າພະແນກກະສິກຳ ແລະ ປ່າໄມ້ ແຂວງຊຽງຂວາງ; ແລະ ທ່ານ ຄຳມຸນ ໄຊມະນີ ປະທານເຄືອຂ່າຍຊາວກະສິກອນລາວ.
ນອກຈາກນີ້ຍັງມີ ຕາງໜ້າຈາກອົງການຈັດຕັ້ງລັດຖະບານທີ່ກ່ຽວຂ້ອງ ແລະ ຄູ່ຮ່ວມພັດທະນາ ເຊັ່ນ: ການບໍລິການທີ່ປຶກສາຊົນນະບົດໃນເຂດພູດອຍຂອງລາວ, ໂຄງການເສີມສ້າງຄວາມສາມາດທາງດ້ານການຄ້າ, ຊັບສິນ, ການຫັນປ່ຽນລະບົບກະສິກຳ ແລະ ອາຫານທີ່ປອດໄພ, ກອງທຶນສາກົນເພື່ອການພັດທະນາກະສິກຳ, ສະຫະພາບຢູໂຣບ ແລະ ຜູ້ຕາງໜ້າຈາກ 45 ກຸ່ມທີ່ມາຈາກ 10 ແຂວງ, ລວມທັງກຸ່ມຜະລິດກາເຟ, ແລະ ສະມາຊິກເຄືອຂ່າຍຊາ, ຜັກ ແລະກະສິກຳ.
ບັນດາຜູ້ເຂົ້າຮ່ວມໄດ້ສົ່ງບົດລາຍງານກ່ຽວກັບວຽກງານຂອງເຄືອຂ່າຍຊາວກະສິກອນແຫ່ງຊາດກ່ຽວກັບການປູກເຂົ້າ, ຊາ, ກາເຟ ແລະ ຜັກໃນປີ 2023 ແລະ ແຜນການປີ 2024.
ທ່ານ ຄຳມຸນ ກ່າວວ່າ ເຄືອຂ່າຍຊາວກະສິກອນລາວ ໄດ້ຂະຫຍາຍອອກ ແລະ ມາຮອດປັດຈຸບັນ ລວມມີ 177 ກຸ່ມໃນທົ່ວປະເທດ, ໃນນັ້ນ ເຄືອຂ່າຍແມ່ນໃຫ້ການຊ່ວຍເຫຼືອ 70 ກຸ່ມ.
ທ່ານກ່າວວ່າ: “ພວກເຮົາຈະປັບປຸງລະບົບການຜະລິດກະສິກຳໂດຍການຮ່ວມມືກັບຄູ່ຮ່ວມມືເພື່ອຊຸກຍູ້ການປູກຝັງໃນສວນຄົວເພື່ອປັບປຸງໂພຊະນາການໃຫ້ແກ່ຊຸມຊົນທ້ອງຖິ່ນ, ພ້ອມທັງສ້າງໂຮງເຮືອນ ເພື່ອຮັບປະກັນຜົນຜະລິດໃຫ້ໄດ້ດີຂຶ້ນ”.
ພ້ອມກັນນັ້ນ, ເຄືອຂ່າຍພວມສະໜອງທຶນເພື່ອຊ່ວຍເຫຼືອສະມາຊິກບາງຄົນໃນການລ້ຽງໄກ່, ປາ, ປູກກາເຟ, ແລະ ສະໜອງຫົວຜັກບົ່ວໃຫ້ຊາວກະສິກອນ.
ທ່ານ ຄຳມຸນ ກ່າວຕື່ມວ່າ: “ພວກເຮົາວາງແຜນທີ່ຈະຂະຫຍາຍຈຳນວນສະມາຊິກໃນກຸ່ມຂອງພວກເຮົາ ແລະ ສົ່ງເສີມຊາວກະສິກອນໃຫ້ປູກພືດເປັນສິນຄ້າຕາມທິດການຄ້າຫຼາຍຂຶ້ນ. ພວກເຮົາຍັງວາງແຜນທີ່ຈະຊ່ວຍເຂົາເຈົ້າຊອກຫາຕະຫຼາດພ້ອມທັງສົ່ງເສີມຜົນປະໂຫຍດຂອງລະບົບສະຫວັດດີການສັງຄົມໃຫ້ແກ່ຊາວກະສິກອນທຸກຄົນ.”
ຮູບພາບຈາກ: ເຄືອຂ່າຍຊາວກະສິກອນລາວ Lao Farmer Network
ຕິດຕາມຂ່າວທັງໝົດຈາກ LaoX: https://laox.la/all-posts/
