ເຈົ້າໜ້າທີ່ແຂວງຫຼວງນ້ຳທາໄດ້ວາງເປົ້າໝາຍດຶງດູດນັກທ່ອງທ່ຽວຈີນໃຫ້ໄດ້ 1 ລ້ານເທື່ອຄົນໃນປີ 2024 ອາໄສທ່າແຮງຈາກການຂົນສົ່ງ ຄົມມະນາຄົມ ຈາກການເຊື່ອມຕໍ່ທາງລົດໄຟລາວ-ຈີນ
ທ່ານ ວຽງສະຫວັດ ສີພັນດອນ ເຈົ້າແຂວງຫຼວງນໍ້າທາ ກ່າວຕໍ່ສື່ມວນຊົນລາວ ເມື່ອບໍ່ດົນມານີ້ວ່າ ເມື່ອມາຢ້ຽມຢາມແຂວງ ສິບສອງພັນນາ ແຂວງຢຸນນານ ທາງພາກຕາເວັນຕົກສຽງໃຕ້ຂອງຈີນ. ໂດຍທ່ານໄດ້ຮຽກຮ້ອງໃຫ້ການນຳຢູ່ແຂວງຢຸນນານ ຊ່ວຍຊຸກຍູ້ໃຫ້ຊາວຈີນ ເຂົ້າມາທ່ຽວລາວ ຫຼາຍຂຶ້ນ.
ທ່ານ ວຽງສະຫວັດ ກ່າວວ່າ: “ອຳນາດການປົກຄອງແຂວງຫຼວງນໍ້າທາມີແຜນຈະເພີ່ມຈຳນວນນັກທ່ອງທ່ຽວຈາກ 15 ລ້ານເທື່ອຄົນເປັນ 50 ລ້ານເທື່ອຄົນໃນປີ 2024, ແລະ ຂ້າພະເຈົ້າໄດ້ຮຽກຮ້ອງໃຫ້ຝ່າຍຈີນຊ່ວຍຊຸກຍູ້ໃຫ້ນັກທ່ອງທ່ຽວຈຳນວນນີ້ມາຢ້ຽມຢາມລາວໃຫ້ຫຼາຍຂຶ້ນ.”
ທ່ານເຈົ້າແຂວງກ່າວຕື່ມວ່າ: “ຖ້າວ່າມີນັກທ່ອງທ່ຽວຈີນເຂົ້າມາ 1 ລ້ານຄົນໃນປີ 2024, ມັນຈະມີນັກທ່ອງທ່ຽວສະເລ່ຍ 2,700 ຄົນຕໍ່ມື້ ເຊິ່ງຕົວເລກນີ້ແມ່ນຂ້ອນຂ້າງຫຼາຍສໍາລັບສິ່ງອໍານວຍຄວາມສະດວກຂອງພວກເຮົາທີ່ຈະຮອງຮັບ.”
ທ່ານເຈົ້າແຂວງ ໄດ້ຍົກໃຫ້ເຫັນບາງສິ່ງທ້າທາຍທີ່ແຂວງຫຼວງນ້ຳທາ ພວມປະເຊີນໜ້າ, ລວມທັງຄວາມຈຳເປັນໃນການພັດທະນາພື້ນຖານໂຄງລ່າງ ແລະ ສິ່ງອຳນວຍຄວາມສະດວກຕ່າງໆ ເພື່ອຮອງຮັບນັກທ່ອງທ່ຽວຈີນ ທີ່ເພີ່ມຂຶ້ນໃນຊຸມປີຕໍ່ໜ້າ.
ໂດຍ ທ່ານເຈົ້າແຂວງໄດ້ກ່າວວ່າ: ເສັ້ນທາງທີ່ຈະເຂົ້າເຖິງສະຖານທີ່ທ່ອງທ່ຽວຕ້ອງໄດ້ຮັບການຍົກລະດັບ. ນອກຈາກນັ້ນ, ແຂວງຍັງມີແຜນທີ່ ຈະດຶງດູດການລົງທຶນຂອງເອກະຊົນເຂົ້າມາກໍ່ສ້າງໂຮງແຮມ, ຮ້ານອາຫານ, ສະຖານທີ່ທ່ອງທ່ຽວ ແລະ ສິ່ງອໍານວຍຄວາມສະດວກອື່ນໆ ເພື່ອດຶງດູດນັກທ່ອງທ່ຽວໃຫ້ຫຼາຍຂຶ້ນ.
ທ່ານ ວຽງສະຫວັດ ໄດ້ຮັບຮູ້ຄວາມສາມາດບົ່ມຊ້ອນທາງລົດໄຟ ໃນການຊຸກຍູ້ການພັດທະນາເສດຖະກິດ – ສັງຄົມຂອງແຂວງ. ເຊິ່ງນັບແຕ່ທາງລົດໄຟລາວ-ຈີນໄດ້ເລີ່ມດຳເນີນການມາຮອດປັດຈຸບັນ, ມີນັກທ່ອງທ່ຽວມາຢ້ຽມຢາມແຂວງດັ່ງກ່າວເປັນຈຳນວນຫຼວງຫຼາຍ.
ທ່ານ ກ່າວວ່າ: “ການທ່ອງທ່ຽວແມ່ນຂົງເຂດຕົ້ນຕໍທີ່ມີຄວາມສາມາດບົ່ມຊ້ອນອັນໃຫຍ່ຫຼວງໃຫ້ພວກເຮົານຳໃຊ້ທາງລົດໄຟຢ່າງເຕັມທີ່. ດ້ານໜຶ່ງທີ່ສຳຄັນທີ່ສຸດສຳລັບພວກເຮົາແມ່ນການພັດທະນາສິ່ງອຳນວຍຄວາມສະດວກເພື່ອຮັບປະກັນໃຫ້ນັກທ່ອງທ່ຽວຕ່າງປະເທດລວມທັງຊາວຈີນຢູ່ໄດ້ດົນຂຶ້ນ ແລະ ໃຊ້ເງິນຫຼາຍກວ່າເກົ່າເພື່ອຊຸກຍູ້ເສດຖະກິດຂອງພວກເຮົາ,”
ຕິດຕາມຂ່າວທັງໝົດຈາກ LaoX: https://laox.la/all-posts/
