ໃນວັນທີ 19 ມັງກອນ, ສຳນັກຂ່າວຕ່າງປະເທດໄດ້ມີການລາຍງານວ່າ ຍອດລວມຜະລິດຕະພັນພາຍໃນປະເທດ (GDP) ຂອງມາເລເຊຍໃນໄຕມາດທີ 4 ຂອງປີ 2023 ໄດ້ມີການເຕີບໂຕຂຶ້ນພຽງ 3.4% ເທົ່ານັ້ນ ເຊິ່ງຕໍ່າກວ່າເປົ້າໝາຍທີ່ 4.1% ທີ່ນັກວິເຄາະໄດ້ຄາດການໄວ້. ຕົວເລກດັ່ງກ່າວໄດ້ເປັນຕົວຖ່ວງໃຫ້ GDP ຂອງມາເລເຊຍຕະຫຼອດປີ 2023 ມີການຂະຫຍາຍຕົວພຽງແຕ່ 3,8%, ຈາກເປົ້າໝາຍຂອງທາງການຂອງທະນາຄານກາງມາເລເຊຍທີ່ວາງໄວ້ຢູ່ທີ່ 4%.
ໂດຍປັດໄຈຫຼັກທີ່ເປັນຕົວຖ່ວງການເຕີບໂຕໃນໄລຍະ 3 ເດືອນທີ່ຜ່ານມາແມ່ນມາຈາກຂະແໜງການກໍ່ສ້າງໃນປະເທດ ແລະ ກິດຈະກໍາໃນຂະແໜງການຜະລິດທີ່ຊ້າລົງ. ໂດຍຂະແໜງການກໍ່ສ້າງມີການຂະຫຍາຍຕົວພຽງແຕ່ 2.5% ໃນໄຕມາດທີ 4 ເມື່ອທຽບກັບ 7.2% ໃນໄຕມາດທີ 3, ໃນຂະນະທີ່ຂະແໜງການຜະລິດມີຂະຫຍາຍຕົວພຽງແຕ່ 0.1%.
ໃນດ້ານກະຊວງອຸດສາຫະກຳ ແລະ ການຄ້າສາກົນຂອງມາເລເຊຍກ່າວວ່າ ມາເລເຊຍກຳລັງປະເຊີນໜ້າກັບສະພາບການສົ່ງອອກທີ່ຫຼຸດລົງຍ້ອນເສດຖະກິດຂອງຈີນທີ່ຊະລໍຕົວ. ໂດຍການສົ່ງອອກໃນເດືອນທັນວາ ໃນໄລຍະຜ່ານມາໄດ້ມີການປັບຫຼຸດລົງເຖິງ 10% ເມື່ອທຽບໃສ່ເດືອນດຽວກັນຂອງປີກາຍ. ໃນຂະນະທີ່ການສົ່ງອອກສິນຄ້າຕ່າງໆໄປຈີນ ເຊິ່ງເປັນຄູ່ການຄ້າລາຍໃຫຍ່ທີ່ສຸດຂອງມາເລເຊຍນັ້ນມີການຫຼຸດລົງ 1.5%.
ອຸປະສົງພາຍນອກທີ່ອ່ອນແອແມ່ນເຫດຜົນຫຼັກທີ່ເຮັດໃຫ້ການເຕີບໂຕໃນປີ 2023 ມີການຂະຫຍາຍຕົວຫຼຸດລົງ, ໂດຍມີເສດຖະກິດຈີນທີ່ຊະລໍຕົວລົງເປັນປັດໄຈສໍາຄັນ. ນອກຈາກນີ້ຍັງມີການຄາດການອີກວ່າ ທ່າອ່ຽງການເຕີບໂຕຂອງເສດຖະກິດມາເລເຊຍໃນອະນາຄົດທີ່ຈະມາເຖິງນີ້ ຍັງຄົງປະສົບກັບບັນຫາທີ່ຫຍຸ້ງຍາກອີກຫຼາຍປະການ ເຊິ່ງໜຶ່ງໃນນັ້ນທີ່ເປັນສັນຍານທີ່ສະແດງໃຫ້ເຫັນຊັດເຈນທີ່ສຸດກໍຄືອັດຕາເງິນເຟີ້ທີ່ເພີ່ມສູງຂຶ້ນຫຼັງຈາກການຫຼຸດຜ່ອນເງິນອຸດໜູນທີ່ໄດ້ວາງແຜນໄວ້ໃນປີນີ້.
“ພວກເຮົາຄິດວ່າເສດຖະກິດຈະຍັງອ່ອນແອໃນໄລຍະສັ້ນ. ເນື່ອງຈາກອັດຕາດອກເບ້ຍທີ່ສູງຂຶ້ນ, ຕະຫຼາດແຮງງານທີ່ເຢັນລົງ, ອຸປະສົງຂອງຕ່າງປະເທດທີ່ອ່ອນແອ ແລະ ລາຄາສິນຄ້າຫຼຸດລົງ ສົ່ງຜົນກະທົບຕໍ່ກິດຈະກໍາຕ່າງໆ”
ທີ່ມາ:
ຕິດຕາມຂ່າວທັງໝົດຈາກ LaoX: https://laox.la/all-posts/