ໃນວັນທີ 19 ມັງກອນທີ່ຜ່ານມາ, ເຈົ້າໜ້າທີ່ກະຊວງອຸດສາຫະກຳ ແລະ ເຕັກໂນໂລຊີຂໍ້ມູນຂ່າວສານ (MIIT) ຂອງຈີນໄດ້ມີການເປີດເຜີຍວ່າ ການສົ່ງອອກລົດຂອງຈີນໃນປີ 2023 ໄດ້ບັນລຸ 4,91 ລ້ານຄັນ, ເຮັດໃຫ້ຈີນກາຍເປັນປະເທດທີ່ສົ່ງອອກລົດລາຍໃຫຍ່ທີ່ສຸດຂອງໂລກ.
Xin Guobin, ຮອງລັດຖະມົນຕີກະຊວງອຸດສາຫະກຳ ແລະ ຂໍ້ມູນຂ່າວສານ ໄດ້ຖະແຫຼງການຕໍ່ສື່ມວນຊົນວ່າ ຍອດການສົ່ງອອກລົດໄດ້ມີການເພີ່ມຂຶ້ນໂດຍເຮັດສະຖິຕິສູງສຸດໃໝ່ເປັນປະຫວັດສາດ. ພ້ອມກັບລົດພະລັງງານໃໝ່ (NEV) ທີ່ຜະລິດຢູ່ໃນປະເທດຈີນຍັງໄດ້ມອບທາງເລືອກທີ່ຫຼາກຫຼາຍໃຫ້ແກ່ຜູ້ບໍລິໂພກໃນທົ່ວໂລກ.
ໂດຍການຖະແຫຼງການດັ່ງກ່າວໄດ້ຖືກຈັດຂຶ້ນ ຫຼັງຈາກທີ່ສະມາຄົມຜູ້ຜະລິດລົດຈີນ (CAAM) ໄດ້ມີການເປີດເຜີຍກ່ອນໜ້ານີ້ວ່າ ການສົ່ງອອກລົດຂອງຈີນເພີ່ມຂຶ້ນ 57,9% ເມື່ອທຽບໃສ່ລາຍປີ ແລະ ໃນປີ 2023 ກໍໄດ້ມີການສົ່ງອອກລົດເຖິງ 4.91 ລ້ານຄັນ ເຊິ່ງເພິ່ມຂຶ້ນແຕະລະດັບສູງສຸດເປັນປະຫວັດສາດ, ເນື່ອງຈາກບໍລິສັດຜະລິດລົດຂອງຈີນໄດ້ມີການຂະຫຍາຍຕົວໄປຕ່າງປະເທດ. ເຊິ່ງຈຸດໝາຍປາຍທາງໃນການສົ່ງອອກລົດທີ່ສຳຄັນຂອງຈີນລວມມີ: ຢູໂຣບຕາເວັນຕົກ ແລະ ພາກໃຕ້, ອາຊີຕາເວັນອອກສຽງໃຕ້ ໂດຍສະເພາະປະເທດເບວຢຽມ, ສະເປນ, ສະຫະຣາຊະອານາຈັກ ແລະ ໄທ.
ການຂະຫຍາຍຕົວທີ່ເພີ່ມຂຶ້ນຢ່າງກ້າວກະໂດດນີ້ແມ່ນໄດ້ຮັບແຮງຊຸກຍູ້ມາຈາກການສົ່ງອອກລົດ NEV ທີ່ເພີ່ມຂຶ້ນ 77.6% ຫຼືຫຼາຍກວ່າ 1.2 ລ້ານຄັນໃນປີກາຍນີ້ ແລະ ການສົ່ງອອກລົດໄຟຟ້າທີ່ຂັບເຄື່ອນດ້ວຍມໍເຕີໄຟຟ້າພຽງຢ່າງດຽວ (Pure Electric Vehicle) ໄດ້ມີການຂະຫຍາຍຕົວເພີ່ມຂຶ້ນ 80,9%, ໃນຂະນະທີ່ການສົ່ງອອກລົດໄຟຟ້າແບບໄຮບຣິດເພີ່ມຂຶ້ນ 47,8% ເມື່ອທຽບໃສ່ລາຍປີ.
ສຳລັບໃນປີ 2024, ສະມາຄົມອຸດສາຫະກຳໄດ້ມີການຄາດການວ່າ ທັງໃນການຜະລິດລົດ ແລະ ຍອດຂາຍລົດຂອງຈີນຄາດວ່າຈະເພີ່ມຂຶ້ນ 3% ເມື່ອທຽບໃສ່ລາຍປີເປັນ 31 ລ້ານຄັນ, ໃນຂະນະທີ່ລົດ NEV ມີທ່າອ່ຽງທີ່ຈະເພີ່ມຂຶ້ນ 20%.
ນອກຈາກຈີນຈະກາຍເປັນອັນດັບ 1 ຂອງໂລກໃນການສົ່ງອອກລົດແລ້ວ. ຈີນຍັງໄດ້ຄອງຕຳແໜ່ງຜູ້ຜະລິດລົດຫຼາຍທີ່ສຸດໃນໂລກເປັນປີທີ 15 ອີກດ້ວຍ, ໂດຍມີການຜະລິດພາຍໃນປະເທດ ແລະ ຍອດຈຳໜ່າຍລົດພາຍໃນປະເທດທັງໝົດເກີນ 30 ລ້ານຄັນ ເຊິ່ງຖືວ່ານີ້ແມ່ນສະຖິຕິໃໝ່ ແລະ ນັບເປັນການເຕີບໂຕແບບປີຕໍ່ປີທີ່ 11.6% ແລະ 12% ຕາມລໍາດັບ.
ທີ່ມາ:
ຕິດຕາມຂ່າວທັງໝົດຈາກ LaoX: https://laox.la/all-posts/