ອົງການເພື່ອການຮ່ວມມື ແລະ ການພັດທະນາເສດຖະກິດ (OECD) ກ່າວວ່າ ແນວໂນ້ມເສດຖະກິດໂລກໄດ້ສົ່ງສັນຍານການຟື້ນຕົວທີ່ດີຂຶ້ນ ແລະ ອັດຕາເງິນເຟີ້ເອງກໍມີແນວໂນ້ມທີ່ຈະຫຼຸດລົງໄວກວ່າທີ່ຫຼາຍປະເທດຄາດການໄວ້. ພ້ອມກັບໄດ້ຄາດການການເຕີບໂຕຂອງໂລກໃນປີ 2024 ເປັນ 3.1% ຈາກ 2.9% ໃນເດືອນກຸມພາ.
ບົດລາຍງານຂອງ OECD ຊີ້ໃຫ້ເຫັນວ່າ ເສດຖະກິດໂລກມີແນວໂນ້ມທີ່ຈະຫຼີກເວັ້ນພາວະຖົດຖອຍ-ໄພເງິນເຟີ້ (stagflation), ເຖິງແມ່ນວ່າອັດຕາການຂະຫຍາຍຕົວຈະຍັງບໍ່ທັນໄດ້ກັບຄືນໄປແຕະລະດັບ 3.4% ສະເລ່ຍຕໍ່ປີ ໃນໄລຍະງກ່ອນທີ່ຈະເກີດໂລກລະບາດ ແລະ ວິກິດການພະລັງງານ.
- ອັດຕາເງິນເຟີ້ຊະລໍຕົວລົງ
ໃນດ້ານຂອງອັດຕາເງິນເຟີ້, OECD ຄາດການວ່າ ຈະຊະລໍຕົວລົງໄວກວ່າການຄາດການກ່ອນໜ້ານີ້. ຍົກເວັ້ນສະຫະລັດທີ່ຄາດການວ່າລາຄາສິນຄ້າຈະເພີ່ມຂຶ້ນ 2.5% ໃນປີນີ້, ຈາກເດີມທີ່ຄາດການໄວ້ທີ່ 2.2%.
ຢ່າງໃດກໍຕາມ, OECD ເຫັນວ່າຜູ້ວາງນະໂຍບາຍຂອງສະຫະລັດຈະມີໂອກາດທີ່ຈະຕັດອັດຕາດອກເບ້ຍໃນໄລຍະເຄິ່ງຫຼັງຂອງປີ.
- ແນວໂນ້ມດ້ານເສດຖະກິດໃນແຕ່ລະຂົງເຂດ
OECD ຄາດຄະເນວ່າເສດຖະກິດຂອງສະຫະລັດຈະເຕີບໂຕ 2.3% ໃນປີ 2024, ຊະລໍຕົວລົງຈາກ 2.6% ໃນປີ 2023. ເສດຖະກິດຈີນມີແນວໂນ້ມທີ່ຈະເຕີບໂຕ 5.7% ໃນປີ 2024, ເລັ່ງຂະຫຍາຍຕົວຈາກ 5.1% ໃນປີ 2023 ແລະ ເສດຖະກິດອິນເດຍຈະເຕີບໂຕ 6.8% ໃນປີ 2024 ຈາກ 6.6% ໃນປີ 2023
ນອກຈາກນີ້, OECD ຍັງໄດ້ເຕືອນກ່ຽວກັບຄວາມສ່ຽງທີ່ອາດຈະສົ່ງຜົນກະທົບຕໍ່ເສດຖະກິດໂລກ ເຊັ່ນ ການຂັດແຍ້ງໃນຕາເວັນອອກກາງ ແລະ ຄວາມກົດດັນລາຄາທີ່ຍືດເຍື້ອ
- ນະໂຍບາຍການເງິນ ແລະ ການຄັງ
OECD ໄດ້ແນະນໍາໃຫ້ໜ່ວຍງານທີ່ຄຸ້ມຄອງນະໂຍບາຍການເງິນຄວນໃຊ້ນະໂຍບາຍທີ່ຮອບຄອບເພື່ອຄວບຄຸມແຮງກົດດັນຂອງເງິນເຟີ້ຢ່າງຍືນຍົງ.
ສໍາລັບນະໂຍບາຍການຄັງ, OECD ເຫັນວ່າ ລັດຖະບານຄວນໃຊ້ໂອກາດຈາກການຟື້ນຕົວຂອງເສດຖະກິດເພື່ອຈັດການກັບພາລະໜີ້ສິນທີ່ສູງ ແລະ ກະກຽມຮັບມືກັບພາລະຂອງຄ່າໃຊ້ຈ່າຍໃນອະນາຄົດທີ່ຈະເພີ່ມຂຶ້ນຈາກປະຊາກອນຜູ້ສູງອາຍຸ, ການປ່ຽນແປງດິນຟ້າອາກາດ ແລະ ຄວາມຕ້ອງການດ້ານການປ້ອງກັນ
ສະຫຼຸບ
ເສດຖະກິດໂລກມີແນວໂນ້ມທີ່ຈະສົດໃສຂຶ້ນ, ແຕ່ຍັງມີຄວາມສ່ຽງທີ່ຕ້ອງໄດ້ຮັບການຕິດຕາມຢ່າງໃກ້ຊິດ. ລັດຖະບານ ແລະ ໜ່ວຍງານຄຸ້ມຄອງນະໂຍບາຍເງິນຕາ ຕ້ອງປະຕິບັດນະໂຍບາຍທີ່ເໝາະສົມ ເພື່ອຮັກສາສະຖຽນລະພາບ ແລະ ຄວາມຍືນຍົງຂອງເສດຖະກິດ.
ທີ່ມາ:
ຕິດຕາມຂ່າວທັງໝົດຈາກ LaoX: https://laox.la/all-posts/
