ໃນປີ 2023 ທີ່ຜ່ານມາ ສປປ ລາວ ມີລາຍຮັບຈາກການສົ່ງອອກຜະລິດຕະພັນກະສິກຳຫຼາຍກວ່າ 1,4 ຕື້ໂດລາສະຫະລັດ, ລື່ນຄາດໝາຍຂອງແຜນການປີ 20,18%.
ລາຍງານສະພາບການພັດທະນາຂອງຂະແໜງການດັ່ງກ່າວ ຖືກລາຍງານໂດຍ ທ່ານ ທອງພັດ ວົງມະນີ ຮອງລັດຖະມົນຕີກະຊວງກະສິກຳ ແລະ ປ່າໄມ້. ໂດຍທ່ານກ່າວວ່າ: ມູນຄ່າການຜະລິດກະສິກຳ ແລະ ປ່າໄມ້ ໃນປີ 2023 ເພີ່ມຂຶ້ນ 3,4% ກວມເອົາ 21,4% ຂອງລວມຍອດຜະລິດຕະພັນພາຍໃນ.
ການເກັບກ່ຽວຜົນຜະລິດກະສິກຳໄດ້ປະມານ 9,74 ລ້ານໂຕນ, ລື່ນຄາດໝາຍ 3,7%, ໃນນັ້ນ, ຜົນຜະລິດມັນຕົ້ນ ເພີ່ມຂຶ້ນ 28,62%, ກາເຟ 7,5%, ໝາກກ້ວຍ 16,7% ແລະ ອ້ອຍ 10,1%.
ປັດຈຸບັນ ສປປ ລາວ ມີຟາມລ້ຽງສັດ 2,261 ແຫ່ງ, ມີສັດລ້ຽງຫຼາຍກວ່າ 6,5 ລ້ານໂຕ, ເພີ່ມຂຶ້ນ 123 ຟາມ ເມື່ອທຽບໃສ່ປີ 2022. ໃນນັ້ນລວມມີ ຟາມລ້ຽງງົວ 55 ຟາມ, ຟາມລ້ຽງໝູ 34 ຟາມ ແລະ ຟາມສັດປີກ 18 ຟາມ ເຊິ່ງກວມເອົາ 41% ຂອງຊີ້ນທັງໝົດຂອງປະເທດ.
ລັດຖະບານໄດ້ສືບຕໍ່ເຈລະຈາດ້ານການຄ້າການສົ່ງອອກຜະລິດຕະພັນກະເສດ ແລະ ປັດຈຸບັນສາມາດສົ່ງອອກສິນຄ້າໄດ້ 64 ຊະນິດ, ເພີ່ມຂຶ້ນ 16 ກ່ວາຊະນິດ ທຽບໃສ່ປີ 2022. ໃນນັ້ນ, ສິນຄ້າສົ່ງອອກໄປຈີນ 33 ຊະນິດ, ໃນນັ້ນມີ 30 ຊະນິດແມ່ນພືດ ແລະ ອີກ 3 ຊະນິດແມ່ນສັດ. ນອກຈາກນີ້, ລາວຍັງໄດ້ຂາຍພືດ 16 ຊະນິດໃຫ້ຫວຽດນາມ ແລະ ພືດ 15 ຊະນິດ ແລະ ໃຫ້ໄທ.
ໃນດ້ານການນຳເຂົ້າ, ພືດ ແລະ ຜະລິດຕະພັນພືດຂອງ ສປປ ລາວ ໃນປີ 2023 ນັ້ນມີມູນຄ່າ 109 ລ້ານໂດລາສະຫະລັດ, ເພີ່ມຂຶ້ນ 22,7 ລ້ານໂດລາສະຫະລັດ ແລະ 26% ເມື່ອທຽບໃສ່ຕົວເລກຂອງປີ 2022.
ສິນຄ້າກະສິກຳທີ່ສົ່ງອອກຕົ້ນຕໍແມ່ນໝາກກ້ວຍ, ຢາງພາລາ, ມັນຕົ້ນ, ອ້ອຍ, ງົວ ແລະ ຄວາຍ, ໂດຍຈີນເປັນຜູ້ຊື້ລາຍໃຫຍ່ທີ່ສຸດ.
ແນວໃດກໍຕາມ, ຊາວກະສິກອນ ແລະ ຜູ້ຜະລິດໃນລາວ ໄດ້ຮັບຜົນກະທົບຢ່າງໜັກໜ່ວງຈາກລາຄາການຜະລິດທີ່ເພີ່ມຂຶ້ນສູງ, ຕົ້ນຕໍແມ່ນຍ້ອນລາຄານໍ້າມັນທີ່ເພີ່ມຂຶ້ນ. ນອກຈາກນັ້ນ ກໍຍັງມີເລື່ອງຂອງເງິນກີບທີ່ອ່ອນຄ່າລົງຢ່າງໜັກໜ່ວງ ສົ່ງຜົນໃຫ້ຄ່າໃຊ້ຈ່າຍຂອງເຄື່ອງຈັກ, ຝຸ່ນ, ອາຫານສັດກໍເພີ່ມຂຶ້ນຢ່າງຫຼວງຫຼາຍເນື່ອງຈາກວ່າສິນຄ້າເຫຼົ່ານີ້ ແມ່ນຕ້ອງນໍາເຂົ້າ ແລະ ຕ້ອງຈ່າຍເປັນເງິນຕາຕ່າງປະເທດ.
ຕິດຕາມຂ່າວທັງໝົດຈາກ LaoX: https://laox.la/all-posts/
