ບໍລິສັດຍີ່ປຸ່ນຫຼາຍກວ່າເຄິ່ງໜຶ່ງໃນອາຊີຕາເວັນອອກສຽງໃຕ້ ໄດ້ແນເປົ້າໝາຍໄປທີ່ປະເທດຫວຽດນາມ ໂດຍວາງແຜນທີ່ຈະຂະຫຍາຍທຸລະກິດພາຍໃນ 1 – 2 ປີຂ້າງໜ້າ, ສົ່ງຜົນໃຫ້ຫວຽດນາມຕົກມາຈາກອັນດັບ 1 ທີ່ເຄີຍຄອງຕໍາແໜ່ງມາ 2 ປີລຽນຕິດ.
ຈາກຜົນການສຳຫຼວດສະພາບການລົງທຶນຂອງບໍລິສັດຍີ່ປຸ່ນຢູ່ໃນຕ່າງປະເທດປະຈໍາປີ 2023 ໂດຍອົງການການຄ້າຍີ່ປຸ່ນ (JETRO) ໃນຫວຽດນາມໄດ້ເປີດເຜີຍວ່າ ບໍລິສັດຍີ່ປຸ່ນຫຼາຍກວ່າເຄິ່ງໜຶ່ງ ຫຼື ໃນອັດຕາສ່ວນປະມານ 56.7% ສົນໃຈທີ່ຈະຂະຫຍາຍ ແລະ ລົງທຶນຕື່ມໃນທຸລະກິດຕົນເອງໃນຫວຽດນາມ, ເຊິ່ງຫຼຸດລົງ 3.3% ເມື່ອທຽບກັບຜົນສໍາຫຼວດປີ 2022.
ເມື່ອພິຈາລະນາເຖິງຕະຫຼາດທັງໝົດໃນພາກພື້ນອາຊີປາຊີຟິກທີ່ JETRO ສຳຫຼວດໃນປີ 2023, ອັດຕາການຂະຫຍາຍຕົວຂອງບໍລິສັດຍີ່ປຸ່ນຢູ່ຫວຽດນາມ ຍັງຕາມຫຼັງອິນເດຍ ແລະ ບັງກະລາເທດອີກດ້ວຍ.
ໃນຂະແໜງການທຸລະກິດການຜະລິດປະມານ 47.1% ຂອງບໍລິສັດຍີ່ປຸ່ນຕ້ອງການທີ່ຈະເປີດກວ້າງການດຳເນີນງານຢູ່ຫວຽດນາມ. ໃນສ່ວນຂອງບໍລິສັດນອກຂະແໜງການຜະລິດ ແລະ ຮ້ານຂາຍຍ່ອຍແມ່ນມີອັດຕາຢູ່ທີ່ 65.5% ແລະ 100%, ຕາມລໍາດັບ.
Nobuyuki Matsumoto ຫົວໜ້າຜູ້ຕາງໜ້າອົງການ JETRO ປະຈຳນະຄອນ ໂຮ່ຈີມິນ ໄດ້ກ່າວວ່າ:
“ບັນດາບໍລິສັດຍີ່ປຸ່ນໄດ້ມີການເຂົ້າມາລົງທຶນທຸລະກິດໃນຫວຽດນາມນັບມື້ນັບຫຼາຍຂຶ້ນ, ເນື່ອງຈາກຕ້ອງການທີ່ຈະຂະຫຍາຍທຸລະກິດຂອງຕົນ ແລະ ເຂົ້າມາຄອບຄອງຕະຫຼາດຫວຽດນາມ. ໂດຍສະເພາະແມ່ນໃນທຸລະກິດເຕັກໂນໂລຊີຂໍ້ມູນຂ່າວສານເຊິ່ງມີທ່າອ່ຽງທີ່ຈະລົງທຶນຫຼາຍຂຶ້ນ”
ບັນດາບໍລິສັດຍີ່ປຸ່ນໄດ້ປະເມີນຄວາມໜ້າດຶງດູດຂອງຫວຽດນາມ ໃນຖານະເປັນຕະຫຼາດທີ່ມີການເຕີບໂຕ ແລະ ມີສັກກະຍາພາບໃນອະນາຄົດ, ລວມທັງຈຸດແຂງດ້ານອື່ນໆເຊັ່ນ: ສະພາບການເມືອງສັງຄົມທີ່ໝັ້ນຄົງ ແລະ ຕົ້ນທຶນແຮງງານທີ່ມີລາຄາຖືກເປັນຕົ້ນ.
ແນວໃດກໍດີ, Nobuyuki Matsumoto ຍັງໄດ້ກ່າວຕື່ມອີກວ່າ “ຫວຽດນາມຍັງມີອຸປະສັກໃນດ້ານອື່ນໆອີກເຊັ່ນ: ຂະບວນການບໍລິຫານທີ່ຊັບຊ້ອນ, ຄ່າແຮງງານທີ່ເພີ່ມຂຶ້ນ, ລະບົບກົດໝາຍທີ່ບໍ່ທັນສົມບູນ ແລະ ຍັງຂາດຄວາມໂປ່ງໃສ.
ໂດຍອັດຕາຜົນກຳໄລຂອງບໍລິສັດຍີ່ປຸ່ນຈາກການດຳເນີນງານຢູ່ຫວຽດນາມໃນປີ 2023 ແມ່ນຢູ່ທີ່ 54.3%, ຫຼຸດລົງ 6.6% ຈາກຄ່າສະເລ່ຍຂອງອາຊີຕາເວັນອອກສຽງໃຕ້. ເນື່ອງຈາກຄວາມຕ້ອງການທັງພາຍໃນປະເທດ ແລະ ຕ່າງປະເທດຫຼຸດລົງ, ຄ່າແຮງງານ ແລະ ຕົ້ນທຶນຂອງວັດຖຸດິບເພີ່ມຂຶ້ນ ແລະ ການແຂ່ງຂັນທີ່ນັບມື້ນັບເຂັ້ມຂຸ້ນຂຶ້ນ.
ຫຼາຍກວ່າເຄິ່ງໜຶ່ງຂອງບໍລິສັດຍີ່ປຸ່ນທີ່ຖືກສໍາຫຼວດຍັງຄາດຫວັງຜົນກໍາໄລທີ່ອາດຈະເພີ່ມຂຶ້ນໃນປີ 2024. ເຖິງວ່າແມ່ນວາການສົ່ງອອກຈະປະສົບກັບຄວາມຫຍຸ້ງຍາກໃນຕະຫຼອດປີ, ແຕ່ຄາດວ່າມັນຈະສາມາດຟື້ນຕົວໄດ້ໃນໄວໆນີ້
ເຊິ່ງໃນປີທີ່ຜ່ານມາ, ອັດຕາການຜະລິດພາຍໃນຂອງບັນດາບໍລິສັດຍີ່ປຸ່ນຢູ່ຫວຽດນາມໄດ້ເພີ່ມຂຶ້ນເຖິງ 41.9%. ໂດຍລິສັດເຫຼົ່ານີ້ໄດ້ເພິ່ມແຮງກະຕຸ້ນໃຫ້ຕົນເອງ ດ້ວຍການເສີມສ້າງການຈັດຊື້ຢູ່ທ້ອງຖິ່ນ ແລະ ພ້ອມກັນນັ້ນ, ກໍຍັງຄາດຫວັງທີ່ຈະສືບຕໍ່ພັດທະນາ ແລະ ສະໜັບສະໜູນໃນອຸດສາຫະກຳຕໍ່ໄປ.
ອີງຕາມຂໍ້ມູນຂອງສຳນັກງານສະຖິຕິສູນກາງ, ນັກລົງທຶນຍີ່ປຸ່ນໄດ້ສຸມເງິນລົງທຶນກວ່າ 6.57 ຕື້ໂດລາສະຫະລັດ ເຂົ້າສູ່ຫວຽດນາມ, ເຊິ່ງກວມເອົາ 17,9% ຂອງ FDI ທັງໝົດໃນປີ 2023, ເພີ່ມຂຶ້ນ 37,3% ເມື່ອທຽບໃສ່ປີ 2022.
ທີ່ມາ:
ຕິດຕາມຂ່າວທັງໝົດຈາກ LaoX: https://laox.la/all-posts/