ເພື່ອຮັບປະກັນໃຫ້ເງິນຕາຕ່າງປະເທດທີ່ຫາໄດ້ຈາກແຫຼ່ງຕ່າງໆເຂົ້າມາໃນລະບົບທະນາຄານຂອງລາວ ແລະ ຊຸກຍູ້ການສະຫງວນເງິນຕາຕ່າງປະເທດ ເພື່ອຮັກສາສະຖຽນລະພາບຂອງເງິນກີບ ຕາງໜ້າທະນາຄານ ແຫ່ງ ສປປ ລາວ ໄດ້ສະເໜີໃຫ້ ທຸກພາກສ່ວນທີ່ກ່ຽວຂ້ອງຕ້ອງເອົາໃຈໃສ່ ຮ່ວມມືກັນໃນເລື່ອງນີ້ ລວມທັງພາກທຸລະກິດ ແລະ ສະມາຊິກພາກລັດ.
ທ່ານ ເພັດສະຖາພອນ ແກ້ວວົງວິຈິດ ຫົວໜ້າກົມຄຸ້ມຄອງເງິນຕາຕ່າງປະເທດຂອງທະນາຄານແຫ່ງ ສປປ ລາວ ກ່າວກັບສື່ມວນຊົນວ່າ: ປັດຈຸບັນ ປະເທດລາວ ປະສົບກັບ ອັດຕາເງິນເຟີ້ ທີ່ສູງ ແລະ ຂາດແຄນ ເງິນຕາຕ່າງປະເທດ ແຕ່ຄວາມຕ້ອງການ ເງິນຕາຕ່າງປະເທດ ທີ່ຈຳເປັນ ເພື່ອຊື້ສິນຄ້າ ນໍາເຂົ້ານັ້ນຍັງເພີ່ມຂຶ້ນເລື້ອຍໆ. ສະນັ້ນລັດຖະບານຍັງຕ້ອງການເງິນຕາຕ່າງປະເທດຈຳນວນຫຼາຍເພື່ອຊຳລະໜີ້ສິນທີ່ຄ້າງຢູ່ກັບຫົວໜ່ວຍຕ່າງປະເທດ.
ທ່ານ ເພັດສະຖາພອນ ແກ້ວວົງວິຈິດ ກ່າວວ່າ: “ແນວໃດກໍຕາມ, ພວກເຮົາມີຄວາມໝັ້ນໃຈວ່າ ຖ້າພວກເຮົາສາມາດສົ່ງເງິນຕາຕ່າງປະເທດເຂົ້າສູ່ລະບົບທະນາຄານ ແລະ ຊຸກຍູ້ຄັງສຳຮອງເງິນຕາຕ່າງປະເທດຂອງພວກເຮົາໄດ້, ອັດຕາເງິນເຟີ້ຈະລົດລົງ ແລະ ຈະບໍ່ເປັນບັນຫາຄືກັບໃນທຸກມື້ນີ້.
ທຸກພາກສ່ວນກ່ຽວຂ້ອງຂອງພາກລັດ ໂດຍສະເພາະບັນດາກະຊວງການເງິນ, ອຸດສາຫະກຳ ແລະ ການຄ້າ, ຊັບພະຍາກອນທຳມະຊາດ ແລະ ສິ່ງແວດລ້ອມ, ຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ຄວນຮັບປະກັນໃຫ້ເງິນຕາຕ່າງປະເທດທີ່ໄດ້ຈາກການຂາຍທີ່ດິນເຂົ້າໃນຊ່ອງທາງທີ່ເໝາະສົມ, ໃນຂະນະທີ່ເງິນກີບຄວນໃຊ້ເຂົ້າໃນການຊຳລະ ຄ່າອາຫານ, ໂຮງແຮມ ແລະ ເຄື່ອງບໍລິໂພກຕ່າງໆ.
ທ່ານໄດ້ຮຽກຮ້ອງໃຫ້ບັນດາສະມາຊິກພາກລັດ ແລະ ຜູ້ປະກອບທຸລະກິດແລກປ່ຽນເງິນຕາຕ່າງປະເທດຢູ່ທະນາຄານເທົ່ານັ້ນ, ເຊິ່ງສາມາດສ້າງຄັງສຳຮອງໃຫ້ເຂົາເຈົ້າມີເງິນຕາຕ່າງປະເທດຫຼາຍຂຶ້ນເພື່ອໃຫ້ພຽງພໍໃນການໃຊ້ຈ່າຍ ແລະ ຮອງຮັບຄວາມຕ້ອງການຂອງສັງຄົມໄດ້.
ປະເທດທີ່ພັດທະນາແລ້ວສ່ວນໃຫຍ່ໃຫ້ທະນາຄານເປັນຜູ້ຮັບຜິດຊອບດ້ານການແລກປ່ຽນເງິນຕາຕ່າງປະເທດ, ເຊິ່ງຮັບປະກັນການຄຸ້ມຄອງເງິນຕາຕ່າງປະເທດໃຫ້ຖືກຕ້ອງຕາມອັດຕາແລກປ່ຽນທີ່ຖືກຕ້ອງ ແລະ ຮັບປະກັນບໍ່ໃຫ້ການແລກປ່ຽນທີ່ຜິດກົດໝາຍເກີດຂຶ້ນ.
ກົມຄຸ້ມຄອງເງິນຕາຕ່າງປະເທດຂອງທະນາຄານແຫ່ງ ສປປ ລາວ ກໍາລັງຊຸກຍູ້ໃຫ້ທຸກຄົນໃຊ້ເງິນກີບໃນການເຮັດທຸລະກໍາທັງໝົດແທນເງິນຕາຕ່າງປະເທດເຊັ່ນ ເງິນໂດລາສະຫະລັດ ແລະ ບາດໄທ.
ທ່ານ ເພັດສະຖາພອນ ແກ້ວວົງວິຈິດ ກ່າວຕື່ມອີກວ່າ: “ເຖິງແມ່ນວ່າການປ່ຽນແປງປະເພນີ ທີ່ເຄີຍໃຊ້ເງິນໂດລາ ເງິນບາດ ໃນຕະຫຼາດບາດເຮົາຢ່າງແຜ່ຫຼາຍ ຈະເປັນເລື່ອງຍາກ ແຕ່ລັດຖະບານຄວນດຳເນີນມາດຕະການອັນຮີບດ່ວນໃຫ້ສອດຄ່ອງກັບກົດໝາຍວ່າດ້ວຍການຄຸ້ມຄອງເງິນຕາຕ່າງປະເທດ ແລະ ຄຳສັ່ງຂອງນາຍົກລັດຖະມົນຕີຊຸດໃໝ່ເພື່ອຄວບຄຸມການນຳໃຊ້ເງິນຕາຕ່າງປະເທດ, ຖ້າທຸກບຸກຄົນ ແລະ ແຕ່ລະອົງການລັດຖະບານປະຕິບັດຕາມລະບຽບການ, ສະຖານະການຈະດີຂຶ້ນ ແລະ ລັດຖະບານຈະມີທ່າທີເຂັ້ມແຂງກວ່າເກົ່າ”.
ທ່ານ ເພັດສະຖາພອນ ຍັງໃຫ້ຮູ້ອີກວ່າ ສປປ ລາວມີທ່າແຮງທີ່ເຂັ້ມແຂງໃນການສົ່ງອອກຊັບພະຍາກອນທຳມະຊາດ ໂດຍສະເພາະແຮ່ທາດ ແລະ ການຄ້າ ການລົງທຶນ ຂອງປະເທດຄູ່ຮ່ວມມື ຮ່ວມກັບ ເສັ້ນທາງລົດໄຟ ລາວ-ຈີນ ຈະເຮັດໃຫ້ເສດຖະກິດ ຟື້ນຕົວຄືນ ແລະ ອັດຕາເງິນເຟີ້ຈະລົດລົງ.
https://www.vientianetimes.org.la/sub-new/Business/Business_BOL154.php
ຕິດຕາມຂ່າວທັງໝົດຈາກ LaoX: https://laox.la/all-posts/