ຍີ່ປຸ່ນໄດ້ສູນເສຍຕໍາແໜ່ງເປັນປະເທດເສດຖະກິດທີ່ມີຂະໜາດໃຫຍ່ອັນດັບ 3 ຂອງໂລກໃຫ້ແກ່ເຢຍລະມັນ ແລະ ຕົກລົງມາຢູ່ອັນດັບທີ 4. ເນື່ອງຈາກວ່າຍັກໃຫຍ່ຂອງອາຊີໄດ້ກ້າວເຂົ້າສູ່ສະພາບເສດຖະກິດຖົດຖອຍຢ່າງບໍ່ຄາດຄິດ.
ອີງຈາກບົດລາຍງານໃນວັນທີ 15 ກຸມພາທີ່ຜ່ານມາ, ລັດຖະບານຍີ່ປຸ່ນປະກາດວ່າ GDP ໃນໄຕມາດທີ 4 ປີ 2023 ຂອງຍີ່ປຸ່ນຫຼຸດລົງ 0.4% ເມື່ອທຽບເປັນລາຍປີ ເຊິ່ງສວນທາງກັບຄວາມຄາດຫວັງຂອງຕະຫຼາດທີ່ອາດຈະຂະຫຍາຍຕົວທີ່ 1.4% ຫຼັງຈາກທີ່ຫົດຕົວລົງ 3.3% ໃນໄຕມາດທີ 3 ຂອງປີ 2023.
ໃນບົດລາຍງານຍັງໄດ້ລະບຸວ່າ ໃນໄຕມາດທີ 4 ຂອງປີ 2023, ເສດຖະກິດໄດ້ມີການຫົດຕົວລົງ 0.1% ຈາກໄຕມາດກ່ອນ ຫຼື ຢູ່ທີ່ 0.4% ຕໍ່ປີ, ເນື່ອງຈາກການໃຊ້ຈ່າຍຂອງທັງຄົວເຮືອນ ແລະ ທຸລະກິດຂາດຄວາມເຂັ້ມແຂງທ່າມກາງອັດຕາເງິນເຟີ້.
ໃນດ້ານໂຄງສ້າງເສດຖະກິດ ການຫຼຸດລົງຂອງ GDP ໃນ 2 ໄຕມາດຕິດຕໍ່ກັນນັ້ນຍັງໝາຍເຖິງ ການກ້າວເຂົ້າສູ່ສະພາວະການຖົດຖອຍທາງດ້ານເຕັກນິກ ແລະ ພາວະເສດຖະກິດທີ່ອ່ອນແອດັ່ງກ່າວສາມາດເຮັດໃຫ້ຕະຫຼາດຂາດຄວາມໝັ້ນໃຈໃນສິ່ງທີ່ BOJ ຄາດການໄວ້ວ່າ ການເພີ່ມຂຶ້ນຂອງຄ່າຈ້າງຈະສະໜັບສະໜູນການບໍລິໂພກຂອງຍີ່ປຸ່ນ. ແລະເຮັດໃຫ້ຕະຫຼາດບໍ່ມີຄວາມໝັ້ນໃຈອີກວ່າ BOJ ຈະສາມາດຍຸຕິການໃຊ້ນະໂຍບາຍການເງິນແບບຜ່ອນຜັນພິເສດໄດ້ຫຼືບໍ່.
ຕະຫຼອດປີ 2023, ຕົວເລກ GDP ຂອງຍີ່ປຸ່ນໄດ້ມີການເພີ່ມຂຶ້ນ 5.7% ໂດຍມີມູນຄ່າຢູ່ທີ່ 591,48 ພັນຕື້ເຢນ (4,2 ພັນຕື້ໂດລາ) ເມື່ອພິຈາລະນາອັດຕາແລກປ່ຽນສະເລ່ຍໃນປີນັ້ນ. ໃນທາງກົງກັນຂ້າມ, ຕົວເລກ GDP ຂອງເຢຍລະມັນ ໄດ້ມີການເຕີບໂຕ 6.3% ເປັນ 4.12 ພັນຕື້ເອີໂຣ (4.46 ພັນຕື້ໂດລາ), ອີງຕາມຂໍ້ອັດຕາແລກປ່ຽນສະເລ່ຍຂອງປີກ່ອນ.
ທັງນີ້, ການບໍລິໂພກເອກະຊົນ ເຊິ່ງກວມເອົາຫຼາຍກວ່າເຄິ່ງໜຶ່ງຂອງເສດຖະກິດຫຼຸດລົງ 0.2% ໃນໄຕມາດທີ 3 ຕິດຕໍ່ກັນຂອງການຫຼຸດລົງ, ເນື່ອງຈາກວ່າຄົວເຮືອນຕ້ອງຕໍ່ສູ້ກັບການເພີ່ມຂຶ້ນຂອງຄ່າໃຊ້ຈ່າຍໃນດໍາລົງຊີວິດ ແລະ ຄ່າຈ້າງງານທີ່ຫຼຸດລົງ.
ຍິ່ງໄປກວ່ານັ້ນ, ການໃຊ້ຈ່າຍໃນການລົງທຶນຍັງຂາດຄວາມເຂັ້ມແຂງ ໂດຍຫຼຸດລົງ 0.1%, ເຊິ່ງເປັນສັນຍານທີ່ໜ້າເປັນຫ່ວງ. ບໍລິສັດຍີ່ປຸ່ນຍັງຄົງລະມັດລະວັງກ່ຽວກັບການເພີ່ມງົບໃນການລົງທຶນ ເຖິງແມ່ນວ່າຈະມີແຜນງານທີ່ເຂັ້ມແຂງກໍຕາມ. ເຖິງແມ່ນວ່າຄວາມຕ້ອງການພາຍໃນແມ່ນຊະລໍຕົວລົງ ແຕ່ການສົ່ງອອກຂອງຍີ່ປຸ່ນຍັງສືບຕໍ່ຂະຫຍາຍຕົວ ໂດຍເພີ່ມຂຶ້ນ 2.6% ຍ້ອນໄດ້ຮັບການສະໜັບສະໜູນຈາກການທ່ອງທ່ຽວຂາເຂົ້າທີ່ຟື້ນຕົວ.
ຢ່າງໃດກໍຕາມ, ປະເທດທີ່ກໍາລັງພັດທະນາຂະໜາດໃຫຍ່ເຊັ່ນອິນເດຍ ທີ່ມີປະຊາກອນຫຼາຍກວ່າ 1.4 ຕື້ຄົນ, ໂດຍປະຊາກອນສ່ວນໃຫຍ່ມີອາຍຸຕໍ່າກວ່າ 35 ປີ ແລະ ມີອັດຕາການເຕີບໂຕທີ່ດີກວ່າ ຄາດວ່າຈະສາມາດແຊງໜ້າທັງສອງປະເທດໄດ້ຢ່າງກ້າວກະໂດດ ແລະ ຂຶ້ນເປັນປະເທດທີ່ມີເສດຖະກິດໃຫຍ່ອັນດັບ 3 ຂອງໂລກ, ຖັດຈາກສະຫະລັດ ແລະ ຈີນ
ທີ່ມາ:
ຕິດຕາມຂ່າວທັງໝົດຈາກ LaoX: https://laox.la/all-posts/
