ໄທຍົກລະດັບເຕືອນໄພໄຊເບີ! ຮຽກປະຊຸມທະນາຄານທຸກແຫ່ງ ຫຼັງເກີດເຫດໂຈມຕີສະຖາບັນການເງິນໃນຕ່າງປະເທດ

ທະນາຄານກາງໄທສັ່ງເພີ່ມຄວາມເຂັ້ມງວດດ້ານຄວາມປອດໄພໄຊເບີ ເລັ່ງກວດກາຄວາມສ່ຽງ ແລະ ທົດສອບແຜນສຸກເສີນ

ທະນາຄານແຫ່ງປະເທດໄທ (Bank of Thailand) ໄດ້ຮຽກປະຊຸມຜູ້ບໍລິຫານດ້ານເທັກໂນໂລຊີຂອງສະຖາບັນການເງິນທຸກແຫ່ງ ເພື່ອເພີ່ມມາດຕະການປ້ອງກັນການໂຈມຕີທາງໄຊເບີ ຫຼັງຈາກມີລາຍງານເຫດຂັດຂ້ອງດ້ານເທັກໂນໂລຊີ ແລະ ການໂຈມຕີສະຖາບັນການເງິນໃນຕ່າງປະເທດ.

ຕາມຖະແຫຼງຂ່າວຂອງ ນາງ ສຸວັນນີ ເຈດສະດາສັກ ຮອງຜູ້ວ່າການທະນາຄານກາງ ຮັບຜິດຊອບດ້ານສະຖຽນລະພາບສະຖາບັນການເງິນ ກ່າວວ່າ ທາງການໄທກຳລັງຕິດຕາມສະຖານະການຢ່າງໃກ້ຊິດ ໂດຍປັດຈຸບັນຍັງບໍ່ພົບວ່າເຫດການໃນຕ່າງປະເທດໄດ້ສົ່ງຜົນກະທົບຕໍ່ການໃຫ້ບໍລິການຂອງສະຖາບັນການເງິນໃນໄທ. ຂ່າວຊ່ອງ 3 ລາຍງານ.

ການເຄື່ອນໄຫວຄັ້ງນີ້ເປັນມາດຕະການປ້ອງກັນລ່ວງໜ້າ ເພື່ອຫຼຸດຄວາມສ່ຽງທີ່ອາດກະທົບຕໍ່ລະບົບທະນາຄານ, ການໂອນເງິນ, ລະບົບຊຳລະເງິນ ແລະ ຄວາມເຊື່ອໝັ້ນຂອງປະຊາຊົນຕໍ່ບໍລິການທາງການເງິນ.

ທະນາຄານກາງໄທໄດ້ຮຽກປະຊຸມບັນດາຜູ້ບໍລິຫານສູງສຸດດ້ານເທັກໂນໂລຊີສາລະສົນເທດ (Chief Information Officer ຫຼື CIO) ຂອງສະຖາບັນການເງິນທຸກແຫ່ງ ພ້ອມດ້ວຍສູນປະສານງານຄວາມປອດໄພດ້ານເທັກໂນໂລຊີສາລະສົນເທດຂອງຂະແໜງທະນາຄານໄທ (TB-CERT) ແລະ ສະມາຄົມທະນາຄານໄທ.

ຈຸດປະສົງຂອງການປະຊຸມແມ່ນເພື່ອຍົກລະດັບມາດຕະການປ້ອງກັນລະບົບເທັກໂນໂລຊີ, ເພີ່ມການເຝົ້າລະວັງໄພຄຸກຄາມທີ່ອາດເກີດຂຶ້ນ, ແລກປ່ຽນຂໍ້ມູນຄວາມສ່ຽງລະຫວ່າງສະຖາບັນການເງິນ ແລະ ປະເມີນສະຖານະການເພື່ອກຳນົດວິທີຮັບມືໃຫ້ເໝາະສົມກັບລະດັບຄວາມສ່ຽງ.

ນອກຈາກນັ້ນ, ທະນາຄານກາງຍັງເນັ້ນໃຫ້ສະຖາບັນການເງິນຮັກສາຄວາມຕໍ່ເນື່ອງຂອງລະບົບບໍລິການ ແລະ ຝຶກຊ້ອມແຜນສຸກເສີນສຳລັບລະບົບຊຳລະເງິນທີ່ສຳຄັນຢ່າງຕໍ່ເນື່ອງ ຕາມແຜນບໍລິຫານຄວາມຕໍ່ເນື່ອງທາງທຸລະກິດ (Business Continuity Plan ຫຼື BCP)

ແຜນດັ່ງກ່າວມີຄວາມສຳຄັນເພາະເຖິງແມ່ນວ່າທະນາຄານຈະມີລະບົບປ້ອງກັນທີ່ເຂັ້ມແຂງ, ແຕ່ບໍ່ສາມາດຕັດຄວາມສ່ຽງຈາກການໂຈມຕີ ຫຼື ຄວາມຂັດຂ້ອງທາງເທັກນິກໄດ້ທັງໝົດ.

ການມີແຜນສຳຮອງ, ລະບົບກູ້ຄືນຂໍ້ມູນ ແລະ ຂັ້ນຕອນຟື້ນຟູບໍລິການ ຈຶ່ງຊ່ວຍໃຫ້ທະນາຄານສາມາດຈຳກັດຄວາມເສຍຫາຍ ແລະ ກັບມາໃຫ້ບໍລິການໄດ້ໄວຂຶ້ນເມື່ອເກີດເຫດສຸກເສີນ.

ໂດຍທະນາຄານກາງໄທມີກອບການກຳກັບດູແລຄວາມສ່ຽງດ້ານເທັກໂນໂລຊີຢູ່ແລ້ວ ໂດຍລວມເຖິງການກວດສອບລະບົບໄອທີ, ການຄຸ້ມຄອງຜູ້ໃຫ້ບໍລິການພາຍນອກ ແລະ ການກຳນົດມາດຕະຖານຄວາມປອດໄພສຳລັບຜູ້ໃຫ້ບໍລິການຊຳລະເງິນ.

ຄວາມກັງວົນດັ່ງກ່າວ ມີຂຶ້ນທ່າມກາງ ຂ່າວການຖືກໂຈມຕີສະຖາບັນການເງິນຕ່າງໆ ໃນຕ່າງປະເທດ, ໜຶ່ງໃນເຫດການສຳຄັນເກີດຂຶ້ນໃນປະເທດຝຣັ່ງ ເມື່ອທະນາຄານ Crédit Mutuel Arkéa ປະກາດໃນວັນທີ 4 ພະຈິກ 2026 ວ່າ ໄດ້ຖືກໂຈມຕີທາງໄຊເບີ ຈົນຜູ້ກໍ່ເຫດສາມາດເຮັດທຸລະກຳໂອນເງິນໂດຍບໍ່ໄດ້ຮັບອະນຸຍາດ.

ຕາມລາຍງານຂອງ Reuters ແລະ AFP, ມູນຄ່າເງິນທີ່ຖືກໂອນອອກໄປມີປະມານ 100 ລ້ານເອີໂຣ ຫຼື ປະມານ 112 ລ້ານໂດລາສະຫະລັດ. ແນວໃດກໍຕາມ ທະນາຄານຍັງບໍ່ໄດ້ຢືນຢັນຍອດຄວາມເສຍຫາຍສຸດທ້າຍ ເນື່ອງຈາກບາງສ່ວນຂອງເງິນຖືກລະງັບໄວ້ໄດ້ ແລະ ຍັງມີການດຳເນີນງານເພື່ອກູ້ຄືນ.

ໃນໄຕ້ຫວັນ, ທະນາຄານ Bank SinoPac ປະສົບເຫດການແຮັກລະບົບ ໃນວັນທີ 3 ພະຈິກ 2026 ເຊິ່ງສົ່ງຜົນໃຫ້ເກີດການໂອນເງິນຈຳນວນ 427 ລາຍການ ຈາກບັນຊີຂອງລູກຄ້າ 419 ບັນຊີ ໂດຍບໍ່ໄດ້ຮັບອະນຸຍາດ.

ຕາມສຳນັກຂ່າວ Central News Agency ຂອງໄຕ້ຫວັນ, ມູນຄ່າທຸລະກຳທັງໝົດຢູ່ທີ່ປະມານ 41.76 ລ້ານໂດລາໄຕ້ຫວັນ ຫຼື ປະມານ 1.27 ລ້ານໂດລາສະຫະລັດ.

ທຸລະກຳເຫຼົ່ານີ້ສ່ວນໃຫຍ່ມີມູນຄ່າປະມານ 100,000 ໂດລາໄຕ້ຫວັນຕໍ່ລາຍການ ແລະ ຖືກໂອນໄປຍັງບັນຊີປາຍທາງດຽວກັນໃນອີກທະນາຄານໜຶ່ງ.

ຜົນການສືບສວນເບື້ອງຕົ້ນພົບວ່າ ຜູ້ໂຈມຕີໄດ້ເຈາະລະບົບຜ່ານຊ່ອງໂຫວ່ດ້ານຄວາມປອດໄພຂອງຜູ້ໃຫ້ບໍລິການລະບົບ Mobile Banking.

ທະນາຄານລະບຸວ່າ ໄດ້ຄືນເງິນໃຫ້ລູກຄ້າທີ່ໄດ້ຮັບຜົນກະທົບຄົບທຸກຄົນແລ້ວ ແລະ ຍັງບໍ່ພົບຫຼັກຖານວ່າຂໍ້ມູນສ່ວນຕົວຂອງລູກຄ້າໄດ້ຮົ່ວໄຫຼ.

ສະຖານະການໃນເກົາຫຼີໃຕ້ກໍເປັນອີກໜຶ່ງເຫດການທີ່ສ້າງຄວາມກັງວົນໃຫ້ຂະແໜງການເງິນ.

ຄະນະກຳມະການບໍລິການການເງິນເກົາຫຼີໃຕ້ (Financial Services Commission) ເປີດເຜີຍໃນວັນທີ 5 ພະຈິກ 2026 ວ່າ ລະຫວ່າງວັນທີ 30 ກັນຍາ ຫາ 3 ພະຈິກ ມີການລາຍງານເຫດການແຮັກທັງໝົດ 40 ກໍລະນີ ຈາກບໍລິສັດໃນຂະແໜງການເງິນ 37 ແຫ່ງ.

ໃນນັ້ນລວມມີທະນາຄານພານິດ 4 ແຫ່ງ, ບໍລິສັດການລົງທຶນ 5 ແຫ່ງ, ບໍລິສັດປະກັນໄພ 3 ແຫ່ງ, ທະນາຄານອອມຊັບ 5 ແຫ່ງ ແລະ ຜູ້ໃຫ້ບໍລິການທາງການເງິນດິຈິຕອນອີກຫຼາຍແຫ່ງ.

#LaoX #CyberSecurity #CyberAttack #BankingSecurity #Binance #Hacking #DigitalFinance #FinancialSecurity #WorldNews