ສປປ ລາວ ເຂົ້າເປັນສະມາຊິກເຕັມຕົວ ຂອງ ກົນໄກການພົວພັນ ແລະ ການສ້າງຄວາມໄວ້ເນື້ອເຊື່ອໃຈໃນອາຊີ
ໃນກອງປະຊຸມສຸດຍອດຄັ້ງທີ 7 ຂອງກອງປະຊຸມວ່າດ້ວຍການພົວພັນ ແລະ ມາດຕະການສ້າງຄວາມໄວ້ເນື້ອເຊື່ອໃຈໃນອາຊີ (CICA) ທີ່ຈັດຂຶ້ນໃນວັນທີ 15 ຕຸລາ 2026 ທີ່ນະຄອນຫຼວງບາກູ ປະເທດອາແຊກບາຍຊານ, ໄດ້ມີການປະກາດຮັບຮອງເອົາ ສປປ ລາວ ເຂົ້າເປັນສະມາຊິກເຕັມຕົວຢ່າງເປັນທາງການ, ເຊິ່ງເຮັດໃຫ້ ສປປ ລາວ ກາຍເປັນປະເທດສະມາຊິກທີ 29 ຂອງເວທີປາໄສສຳຄັນລະດັບພາກພື້ນນີ້.
ການປະກາດຮັບຮອງຄັ້ງນີ້ ມີຂຶ້ນຫຼັງຈາກທີ່ ທ່ານ ທອງສະຫວັນ ພົມວິຫານ, ຮອງນາຍົກລັດຖະມົນຕີ ແລະ ລັດຖະມົນຕີກະຊວງການຕ່າງປະເທດ ໄດ້ເປັນຕົວແທນລັດຖະບານ ສປປ ລາວ ລົງນາມໃນເອກະສານສຳຄັນໃນວັນທີ 14 ຕຸລາ ທີ່ຜ່ານມາ ເພື່ອປູທາງໄປສູ່ການເປັນສະມາຊິກຢ່າງສົມບູນ. ອີງຕາມ ຂໍ້ມູນຈາກ ກົມອົງການຈັດຕັ້ງສາກົນ ກະຊວງການຕ່າງປະເທດ.
ເອກະສານດັ່ງກ່າວລວມມີ: ຖະແຫຼງການ ວ່າດ້ວຍ ຫຼັກການນຳພາຄວາມສຳພັນລະຫວ່າງປະເທດສະມາຊິກ (ກັນຍາ 1999) ແລະ ກົດບັດ ອານມາຕີ (ມິຖຸນາ 2002) ວ່າດ້ວຍ ຫຼັກການແຫ່ງຄວາມສະໝີພາບ, ບໍ່ແຊກແຊງກິດຈະການພາຍໃນ, ສັນຕິພາບ ແລະ ການຮ່ວມມື.
ສປປ ລາວ ໄດ້ເຂົ້າຮ່ວມໃນກິດຈະກຳຂອງ CICA ໃນຖານະປະເທດຜູ້ສັງເກດການມາຕັ້ງແຕ່ປີ 2017 ກ່ອນທີ່ຈະຍົກລະດັບຂຶ້ນເປັນສະມາຊິກເຕັມຕົວໃນມື້ນີ້.
ໃນໂອກາດນີ້, ທ່ານ ຮອງນາຍົກລັດຖະມົນຕີ ໄດ້ສະແດງຄວາມຂອບໃຈຢ່າງຈິງໃຈຕໍ່ປະທານໝູນວຽນ CICA (ສາທາລະນະລັດ ອາແຊກໄບຊານ), ເລຂາທິການໃຫຍ່, ກອງເລຂາ ແລະ ບັນດາປະເທດສະມາຊິກ CICA ທີ່ໄດ້ໃຫ້ການສະໜັບສະໜູນ ແລະ ເປັນເອກະພາບຮັບເອົາ ສປປ ລາວ ເຂົ້າຮ່ວມເປັນສະມາຊິກຂອງກົນໄກສຳຄັນນີ້. ການຕັດສິນໃຈເຂົ້າຮ່ວມ CICA ສະທ້ອນໃຫ້ເຫັນຄວາມສຳຄັນທີ່ລັດຖະບານ ແລະ ປະຊາຊົນລາວ ຕໍ່ສັນຕິພາບ, ຄວາມໝັ້ນຄົງ ແລະ ສະຖຽນລະພາບໃນພາກພື້ນ ໂດຍຜ່ານການສົນທະນາ, ການສ້າງຄວາມໄວ້ເນື້ອເຊື່ອໃຈ ແລະ ການຮ່ວມມືລະຫວ່າງປະເທດ. ຫຼັກການ ແລະ ຈຸດປະສົງຂອງ CICA ສອດຄ່ອງກັບນະໂຍບາຍການຕ່າງປະເທດອັນສະເໝີຕົ້ນສະເໝີປາຍຂອງ ສປປ ລາວ ຄື: “ສັນຕິພາບ, ເອກະລາດ, ມິດຕະພາບ ແລະ ການຮ່ວມມື” ບົນພື້ນຖານການເຄົາລົບອະທິປະໄຕ, ຜືນແຜ່ນດິນອັນຄົບຖ້ວນ, ບໍ່ແຊກແຊງວຽກງານພາຍໃນ ແລະ ການແກ້ໄຂຂໍ້ຂັດແຍ່ງດ້ວຍສັນຕິວິທີ.
ທ່ານ ຮອງນາຍົກລັດຖະມົນຕີ ໄດ້ກ່າວເນັ້ນວ່າ: ອົງການ CICA ມີບົດບາດສຳຄັນໃນການສົ່ງເສີມຄວາມເຂົ້າໃຈ, ການຮ່ວມມື, ສ້າງສະພາບແວດລ້ອມທີ່ເອື້ອຍອຳນວຍຕໍ່ສັນຕິພາບ, ສະຖຽນລະພາບ, ແກ້ໄຂຂໍ້ຂັດແຍ່ງຢ່າງສັນຕິວິທີ ແລະ ສົ່ງເສີມການພັດທະນາແບບຍືນຍົງໃນທົ່ວທະວີບອາຊີ.
ການເຂົ້າເປັນສະມາຊິກຄັ້ງນີ້ ຈະເປັນໂອກາດອັນສຳຄັນໃຫ້ ສປປ ລາວ ໄດ້ເສີມຂະຫຍາຍການຮ່ວມມືກັບບັນດາປະເທດອາຊີໃນຂົງເຂດທີ່ມີຜົນປະໂຫຍດຮ່ວມກັນ, ລວມມີ ການເຊື່ອມຕໍ່, ການພັດທະນາແບບຍືນຍົງ, ການຮ່ວມມືດ້ານເສດຖະກິດ, ການຄ້າ, ການລົງທຶນ ແລະ ການຮັບມືກັບສິ່ງທ້າທາຍດ້ານຄວາມໝັ້ນຄົງຮູບແບບໃໝ່. ສປປ ລາວ ພ້ອມແລ້ວທີ່ຈະປະຕິບັດໜ້າທີ່ຢ່າງເຕັມສ່ວນໃນຖານະເປັນສະມາຊິກ, ເຂົ້າຮ່ວມກິດຈະກຳຕ່າງໆຂອງ CICA ຢ່າງຫ້າວຫັນ ແລະ ຈະເຮັດວຽກຮ່ວມກັບບັນດາປະເທດສະມາຊິກ ເພື່ອບັນລຸເປົ້າໝາຍຮ່ວມກັນ, ຈະປະກອບສ່ວນຢ່າງສ້າງສັນ ຕາມຄວາມສາມາດຂອງຕົນ ເພື່ອສ້າງຄວາມໄວ້ເນື້ອເຊື່ອໃຈ, ການສົນທະນາ ແລະ ການຮ່ວມມື ເພື່ອສັນຕິພາບ, ສະຖຽນລະພາບ ແລະ ຄວາມຈະເລີນຮຸ່ງເຮືອງຮ່ວມກັນທີ່ເຂັ້ມແຂງຂອງທະວີບອາຊີ.
ທ່ານເນັ້ນຕື່ມອີກວ່າ ສປປ ລາວ ເຊື່ອໝັ້ນວ່າ ການເປັນສະມາຊິກຄັ້ງນີ້ ຈະເປັນໂອກາດອັນສຳຄັນໃນການຂະຫຍາຍການຮ່ວມມືກັບ 28 ປະເທດສະມາຊິກທົ່ວອາຊີ ເພື່ອບັນລຸເປົ້າໝາຍຮ່ວມກັນຄື: ສັນຕິພາບ, ສະຖຽນລະພາບ ແລະ ຄວາມຈະເລີນຮຸ່ງເຮືອງຮ່ວມກັນຂອງທະວີບອາຊີ.
ສຳລັບ ສປປ ລາວ, ຄຸນຄ່າຂອງການເປັນສະມາຊິກ ຈະຂຶ້ນຢູ່ກັບປະສິດທິຜົນໃນການຫັນເອົາການພົວພັນທາງການທູດ ໄປສູ່ການຮ່ວມມືໃນພາກປະຕິບັດຕົວຈິງ. ການພົວພັນທີ່ໃກ້ຊິດກວ່າເກົ່າຜ່ານ CICA ສາມາດຊ່ວຍໃຫ້ປະເທດຊອກຫາຄູ່ຮ່ວມມືໃໝ່, ແລກປ່ຽນປະສົບການ ແລະ ຊອກຄົ້ນກາລະໂອກາດໃນດ້ານການຄ້າ, ການລົງທຶນ ແລະ ການເຊື່ອມຈອດໂຄງລ່າງພື້ນຖານ.
ໃນຂະນະດຽວກັນ, ເວທີປາໄສນີ້ກໍເປັນຊ່ອງທາງໃຫ້ ສປປ ລາວ ໄດ້ປະກອບສ່ວນເຂົ້າໃນການສົນທະນາ ກ່ຽວກັບສະຖຽນລະພາບຂອງພາກພື້ນ ໃນຊ່ວງເວລາທີ່ບັນດາປະເທດໃນອາຊີພວມປະເຊີນກັບສິ່ງທ້າທາຍ ດ້ານເສດຖະກິດ ແລະ ຄວາມໝັ້ນຄົງ ທີ່ນັບມື້ນັບສັບສົນຂຶ້ນ.
ດັ່ງນັ້ນ, ການຕັດສິນໃຈຄັ້ງນີ້ຈຶ່ງເປັນຫຼາຍກວ່າການເຂົ້າຮ່ວມອົງການຈັດຕັ້ງສາກົນຢ່າງເປັນທາງການ. ມັນເປັນອີກຊ່ອງທາງໜຶ່ງສຳລັບ ສປປ ລາວ ໃນການຮັດແໜ້ນສາຍພົວພັນໃນພາກພື້ນ ແລະ ເຮັດໃຫ້ສຽງຂອງປະເທດ ໄດ້ຮັບການຮັບຟັງໃນບັນດາປະເດັນ ທີ່ສົ່ງຜົນກະທົບຕໍ່ທະວີບນີ້.
ບາດກ້າວຕໍ່ໄປແມ່ນການຫັນປ່ຽນກາລະໂອກາດເຫຼົ່ານີ້ ໃຫ້ກາຍເປັນໝາກຜົນຕົວຈິງສຳລັບປະເທດຊາດ ແລະ ປະຊາຊົນລາວ, ພ້ອມທັງຮັກສາຫຼັກການຮ່ວມມືໂດຍສັນຕິ ແລະ ການເຄົາລົບເຊິ່ງກັນແລະກັນ ເຊິ່ງເປັນຮາກຖານນະໂຍບາຍການຕ່າງປະເທດຂອງ ສປປ ລາວ.
#LaoX #Laos #CICA #AsianSecurityForum #Diplomacy #PeaceAndSecurity #ສປປລາວ #ການຕ່າງປະເທດ #ອາຊີ
