ນໍ້າມັນລາວ ປັບຕົວລົງກວ່າ 4.21% ຕອບຮັບທ່າອ່ຽງລາຄາໂລກທີ່ຜ່ອນຄາຍລົງ
ກະຊວງອຸດສາຫະກຳ ແລະ ການຄ້າ ປະກາດປັບຫຼຸດລາຄານ້ຳມັນກາຊວນລົງແຮງເຖິງ 4.21% ແລະ ແອັດຊັງທຳມະດາລົງເລັກນ້ອຍ ເພື່ອແນໃສ່ຫຼຸດຜ່ອນຕົ້ນທຶນການຜະລິດ ແລະ ຄ່າຄອງຊີບຂອງປະຊາຊົນ ເຊິ່ງເປັນຜົນກົງຈາກການຜ່ອນຄາຍຄວາມເຄັ່ງຕຶງດ້ານການສະໜອງພະລັງງານໃນຕະຫຼາດໂລກ.
ອີງຕາມແຈ້ງການສະບັບເລກທີ 1814/ກຄພນ ລົງວັນທີ 23 ກັນຍາ 2026 ກົມການຄ້າພາຍໃນໄດ້ປັບລາຄາຂາຍຍ່ອຍນໍ້າມັນເຊື້ອໄຟຢູ່ນະຄອນຫຼວງວຽງຈັນ ໂດຍນໍ້າມັນກາຊວນຫຼຸດລົງຫຼາຍທີ່ສຸດເຖິງ 1,550 ກີບ ມາຢູ່ທີ່ 35,280 ກີບຕໍ່ລິດ ຂະນະທີ່ນໍ້າມັນແອັດຊັງທໍາມະດາປັບລົງ 30 ກີບ ມາຢູ່ທີ່ 36,250 ກີບຕໍ່ລິດ.
ຢ່າງໃດກໍຕາມ ນໍ້າມັນແອັດຊັງພິເສດໄດ້ມີການປັບຂຶ້ນເລັກນ້ອຍ 280 ກີບ ມາຢູ່ທີ່ 43,660 ກີບຕໍ່ລິດ ເຊິ່ງການປັບລາຄາຄັ້ງນີ້ແມ່ນເພື່ອເຮັດໃຫ້ສອດຄ່ອງກັບສະພາບການເໜັງຕີງຂອງຕະຫຼາດໂລກ ແລະ ຮັບປະກັນການສະໜອງພາຍໃນປະເທດໃຫ້ເປັນປົກກະຕິ. ລາຄາໃໝ່ນີ້ ແມ່ນເລີ່ມບັງຄັບໃຊ້ ແຕ່ວັນທີ 24 ກັນຍາ ເວລາ 6:00 ໂມງເປັນຕົ້ນໄປ.
ການປັບຕົວລົງຂອງລາຄານໍ້າມັນກາຊວນໃນລາວຄັ້ງນີ້ ແມ່ນຕອບຮັບກັບທິດທາງຂອງຕະຫຼາດໂລກທີ່ກຳລັງໄດ້ຮັບແຮງໜູນຈາກການຜ່ອນຄາຍຄວາມກັງວົນດ້ານການສະໜອງ. ປັດຈຸບັນ ລາຄານໍ້າມັນດິບ WTI ເຄື່ອນໄຫວຢູ່ລະດັບ 91-92 ໂດລາສະຫະລັດຕໍ່ບາເຣວ ແລະ Brent ຢູ່ປະມານ 100-102 ໂດລາສະຫະລັດຕໍ່ບາເຣວ ຫຼັງຈາກທີ່ໄດ້ປັບຕົວຫຼຸດລົງຕິດຕໍ່ກັນຫຼາຍວັນໃນຊ່ວງກ່ອນໜ້າ.
ສາເຫດຫຼັກທີ່ເຮັດໃຫ້ຕະຫຼາດໂລກເຢັນລົງ ມາຈາກຄວາມຫວັງທີ່ຊາອຸດີອາຣາເບຍໄດ້ເປີດນຳໃຊ້ທໍ່ສົ່ງນໍ້າມັນ East-West ໄປຍັງທະເລແດງຄືນໃໝ່ ຊ່ວຍໃຫ້ການສົ່ງອອກຜ່ານທ່າເຮືອ Yanbu ກັບມາດຳເນີນການໄດ້ປົກກະຕິ ບວກກັບຄວາມຄືບໜ້າທາງບວກຈາກການເຈລະຈາລະຫວ່າງສະຫະລັດ ແລະ ອີຣ່ານ ທີ່ປະທານາທິບໍດີ ໂດໂນ ທຣຳ ລະບຸວ່າມີຜົນດີຫຼາຍ ເຊິ່ງຕະຫຼາດມອງວ່າອາດຈະຊ່ວຍຍຸຕິຂໍ້ຂັດແຍ້ງໃນຕາເວັນອອກກາງທີ່ແກ່ຍາວມາຫຼາຍເດືອນໄດ້.
#LaoXperts #ລາຄານໍ້າມັນ #ປັບລາຄານໍ້າມັນ #ນໍ້າມັນລາວ #ອັບເດດລາຄານໍ້າມັນ #ຂ່າວເສດຖະກິດ #ລາຄານໍ້າມັນໂລກ #ກະຊວງອຸດສາຫະກຳແລະການຄ້າ #WTI #Brent
