ແຈ້ງເຕືອນ! ລະດັບນໍ້າຂອງຈຸດນະຄອນປາກເຊ ຮອດຈຸດອັນຕະລາຍ ກາຍເຂດນໍ້າຖ້ວມ

ສະພາບນໍ້າຂອງຈຸດນະຄອນປາກເຊ ແຂວງຈໍາປາສັກ ໄດ້ເພີ່ມຂຶ້ນຢ່າງວິກິດເຖິງ 12.11 ແມັດ ເຊິ່ງລື່ນກາຍເຂດລະດັບນໍ້າຖ້ວມແລ້ວໃນມື້ນີ້, ສົ່ງຜົນກະທົບໂດຍກົງຕໍ່ປະຊາຊົນທີ່ອາໄສຢູ່ລຽບແຄມຝັ່ງ. 

ເຈົ້າໜ້າທີ່ຮຽກຮ້ອງໃຫ້ທຸກພາກສ່ວນໃນພື້ນທີ່ສ່ຽງອົບພະຍົບ ແລະ ຍົກຍ້າຍຊັບສິນຂຶ້ນບ່ອນສູງດ່ວນ ເພື່ອຮັບມືກັບມວນນໍ້າທີ່ອາດເພີ່ມຂຶ້ນອີກ.

ອີງຕາມຂໍ້ມູນການລາຍງານສະຫຼຸບສະພາບອາກາດ ແລະ ລະດັບນໍ້າ ປະຈໍາວັນທີ 20 ສິງຫາ 2026, ລະດັບນໍ້າຂອງຢູ່ສະຖານີປາກເຊໄດ້ຍົກຕົວສູງຂຶ້ນຢ່າງໄວວາຈາກ 11.52 ແມັດໃນມື້ວານນີ້ ມາແຕະລະດັບ 12.11 ແມັດ ເຊິ່ງກາຍເຂດອັນຕະລາຍ ແລະ ລື່ນລະດັບນໍ້າຖ້ວມທີ່ກໍານົດໄວ້ຄື 12.00 ແມັດຢ່າງເປັນທາງການແລ້ວ. 

ສະຖານະການທີ່ໜ້າເປັນຫ່ວງນີ້ ແມ່ນຮັບຜົນກະທົບຈາກຮ່ອງຄວາມກົດດັນອາກາດຕໍ່າ ແລະ ລົມມໍລະສຸມທີ່ເຮັດໃຫ້ເກີດຝົນຕົກໜັກຕິດຕໍ່ກັນໃນເຂດພາກກາງ ແລະ ພາກໃຕ້. 

ໃນໄລຍະວິກິດການແບບນີ້, ປະຊາຊົນ, ອົງການປົກຄອງທ້ອງຖິ່ນ ລວມເຖິງພະນັກງານລັດທຸກພາກສ່ວນໃນເຂດນະຄອນປາກເຊ ຕ້ອງເພີ່ມທະວີຄວາມຕື່ນຕົວ ແລະ ເຝົ້າລະວັງຢ່າງໃກ້ຊິດ. 

ມວນນໍ້າທີ່ລົ້ນຕະລິ່ງອາດສ້າງຄວາມເສຍຫາຍຕໍ່ພື້ນທີ່ກະສິກໍາ, ຖະໜົນຫົນທາງ ແລະ ເຮືອນຊານບ້ານຊ່ອງ, ພ້ອມທັງມີຄວາມສ່ຽງສູງທີ່ຈະເກີດນໍ້າຖ້ວມຊຸ, ນໍ້າຖ້ວມອັ່ງ ແລະ ດິນເຈື່ອນ. ເນື່ອງຈາກການພະຍາກອນອາກາດຍັງຊີ້ໃຫ້ເຫັນວ່າອາດຈະມີຝົນຕົກເພີ່ມເຕີມໃນບາງທ້ອງຖິ່ນ, ທຸກຄອບຄົວຄວນຕິດຕາມການແຈ້ງເຕືອນຈາກກົມອຸຕຸນິຍົມ ແລະ ອຸທົກກະສາດຢ່າງຕໍ່ເນື່ອງ, ກຽມພ້ອມອຸປະກອນທີ່ຈໍາເປັນ ແລະ ປະຕິບັດຕາມການຊີ້້ນໍາຂອງຄະນະກໍາມະການຄຸ້ມຄອງໄພພິບັດຢ່າງເຂັ້ມງວດ ເພື່ອຮັບປະກັນຄວາມປອດໄພຂອງຊີວິດ ແລະ ຫຼຸດຜ່ອນຄວາມເສຍຫາຍໃຫ້ໜ້ອຍທີ່ສຸດ.

ອີງຕາມການພະຍາກອນອາກາດປະຈໍາວັນທີ 20 ສິງຫາ 2026, ສະພາບອາກາດໃນຂອບເຂດທົ່ວປະເທດແມ່ນຍັງຢູ່ພາຍໃຕ້ອິດທິພົນຂອງຮ່ອງຄວາມກົດດັນອາກາດຕໍ່າ ທີ່ສືບຕໍ່ພາດຜ່ານເຂດພາກເໜືອ ແລະ ພາກກາງ, ສົມທົບກັບລົມມໍລະສຸມຕາເວັນຕົກສຽງໃຕ້ພັດປົກຄຸມ. ປັດໄຈດັ່ງກ່າວຈະເຮັດໃຫ້ມີຝົນຕົກຟ້າຮ້ອງຟ້າເຫຼື້ອມໃນລະດັບຄ່ອຍ ຫາ ປານກາງຢູ່ເກືອບທົ່ວໄປ ແລະ ຈະຕົກໜັກ ຫາ ໜັກຫຼາຍ ພ້ອມມີລົມພັດແຮງເປັນບາງໂອກາດໃນບາງທ້ອງຖິ່ນ.

#LaoX #ແຈ້ງເຕືອນໄພ #ນໍ້າຖ້ວມປາກເຊ #ໄພພິບັດ #MekongRiver #ນໍ້າຂອງ #ຂ່າວດ່ວນ #ຈໍາປາສັກ #ນະຄອນປາກເຊ