ຜູ້ປະກອບການຍິງ ແລະ ຜູ້ພິການໃນແຂວງຫຼວງພະບາງ ພວມໄດ້ຮັບການຍົກລະດັບທັກສະການຄ້າດິຈິຕອນ ແລະ ການພັດທະນາຜະລິດຕະພັນ ເພື່ອເພີ່ມຂີດຄວາມສາມາດໃນການແຂ່ງຂັນໃຫ້ແກ່ທຸລະກິດຂະໜາດນ້ອຍ ໃນເວທີພາກພື້ນ ແລະ ສາກົນ ຢ່າງຍືນຍົງ.
ການຝຶກອົບຮົມດັ່ງກ່າວ ໄດ້ເປີດສາກຂຶ້ນໃນວັນອັງຄານຜ່ານມາ ທີ່ນະຄອນຫຼວງພະບາງ ໂດຍກວມເອົາການສ້າງຄວາມຮັບຮູ້ກ່ຽວກັບສັນຍາຄູ່ຮ່ວມມືເສດຖະກິດແບບກວມລວມລະດັບພາກພື້ນ (RCEP), ການພັດທະນາສິນຄ້າໜຶ່ງເມືອງໜຶ່ງຜະລິດຕະພັນ (ODOP), ການອອກແບບການຫຸ້ມຫໍ່ ແລະ ອີຄອມເມີຊ.
ພິທີນີ້ໄດ້ຮັບກຽດເປັນປະທານຮ່ວມໂດຍ ທ່ານ ວຽງສະຫວ່າງ ທິບພະວົງ ຫົວໜ້າສະຖາບັນອຸດສາຫະກຳ, ການຄ້າ ແລະ ພະລັງງານ ຈາກກະຊວງອຸດສາຫະກຳ ແລະ ການຄ້າ.
ທ່ານ ວຽງສະຫວັນ ໄດ້ເນັ້ນໜັກວ່າ ໂຄງການ ODOP ແມ່ນນະໂຍບາຍແຫ່ງຊາດທີ່ສຳຄັນ ໃນການສ້າງຄວາມເຂັ້ມແຂງໃຫ້ແກ່ເສດຖະກິດທ້ອງຖິ່ນ, ສ້າງວຽກເຮັດງານທຳ ແລະ ປັບປຸງຊີວິດການເປັນຢູ່ຂອງປະຊາຊົນ. ສິນຄ້າທີ່ຜະລິດໃນທ້ອງຖິ່ນບໍ່ພຽງແຕ່ສະທ້ອນເຖິງເອກະລັກ, ວັດທະນະທຳ ແລະ ພູມປັນຍາຂອງຊຸມຊົນເທົ່ານັ້ນ ແຕ່ຍັງສ້າງໂອກາດໃຫ້ຜູ້ປະກອບການເຂົ້າເຖິງຕະຫຼາດ ແລະ ແຫຼ່ງທຶນທີ່ໃຫຍ່ຂຶ້ນ.
ທ່ານຍັງກ່າວຕື່ມວ່າ ໃນຍຸກທີ່ການຄ້າດິຈິຕອນເຕີບໂຕຢ່າງໄວວາ ວິສາຫະກິດຂະໜາດນ້ອຍ ແລະ ກາງ (SME) ຈຳເປັນຕ້ອງປັບຕົວໃຫ້ທັນກັບຄວາມຕ້ອງການຂອງຕະຫຼາດ ຊຶ່ງແພລັດຟອມອອນລາຍຈະຊ່ວຍໃຫ້ຜູ້ຜະລິດສາມາດເຂົ້າເຖິງຕະຫຼາດທີ່ກວ້າງຂຶ້ນ ທັງພາຍໃນ ແລະ ຕ່າງປະເທດ ພາຍໃຕ້ສະພາບແວດລ້ອມການຄ້າທີ່ປອດໄພ ແລະ ເຊື່ອຖືໄດ້. ພ້ອມດຽວກັນນັ້ນ, ທຸລະກິດທີ່ນຳພາໂດຍແມ່ຍິງ ແລະ ຜູ້ປະກອບການທີ່ພິການ ຈະໄດ້ຮັບຜົນປະໂຫຍດຢ່າງຫຼວງຫຼາຍ ຈາກການເຂົ້າເຖິງເຄື່ອງມືດິຈິຕອນ, ຂໍ້ມູນຂ່າວສານດ້ານການຕະຫຼາດ ແລະ ໂອກາດໃໝ່ໆໃນການພັດທະນາທຸລະກິດ.
ການລິເລີ່ມຄັ້ງນີ້ ແມ່ນສ່ວນໜຶ່ງຂອງຄວາມພະຍາຍາມໃນການຈັດຕັ້ງປະຕິບັດຂໍ້ຕົກລົງ RCEP ໃນລາວ ພາຍໃຕ້ການສະໜັບສະໜູນຈາກໂຄງການ RT4D ແລະ ການເປັນຄູ່ຮ່ວມມືແມ່ນ້ຳຂອງ-ອົດສະຕຣາລີ (MAP).
ຕະຫຼອດການຝຶກອົບຮົມ, ຜູ້ເຂົ້າຮ່ວມຈະໄດ້ຮຽນຮູ້ທັກສະພາກປະຕິບັດຕົວຈິງ ນັບຕັ້ງແຕ່ການພັດທະນາຜະລິດຕະພັນ, ການຢັ້ງຢືນມາດຕະຖານ ODOP, ການຕະຫຼາດດິຈິຕອນ ຕະຫຼອດຮອດການໝູນໃຊ້ເຕັກໂນໂລຊີປັນຍາປະດິດ (AI) ເຂົ້າໃນການດຳເນີນທຸລະກິດ. ການແລກປ່ຽນບົດຮຽນໃນຄັ້ງນີ້ ຈະເປັນກຸນແຈສຳຄັນໃນການຍົກລະດັບຄຸນນະພາບສິນຄ້າ, ເປີດກວ້າງການເຂົ້າເຖິງຕະຫຼາດ ແລະ ສ້າງລາຍຮັບທີ່ໝັ້ນຄົງ ອັນຈະສົ່ງຜົນໂດຍກົງຕໍ່ການຍູ້ແຮງຄວາມສາມາດໃນການແຂ່ງຂັນຂອງ SME ລາວ ພ້ອມທັງສະໜັບສະໜູນການເຕີບໂຕທາງເສດຖະກິດແບບກວມລວມ ແລະ ຍືນຍົງ.
#LaoXperts #ຫຼວງພະບາງ #SMEລາວ #ການຄ້າດິຈິຕອນ #ODOP #RCEP #ຜູ້ປະກອບການຍິງ
