ເຈົ້າໜ້າທີ່ແຂວງຈຳປາສັກ ສະກັດກັ້ນຂະບວນການຄ້າສັດປ່າຂ້າມແຂວງ ພ້ອມນຳເອົາໂຕລິ່ນ 4 ໂຕທີ່ລອດຊີວິດໄປປ່ອຍຄືນສູ່ປ່າປ້ອງກັນເຊປຽນ-ເຊນ້ຳນ້ອຍ ເພື່ອຟື້ນຟູລະບົບນິເວດ ຂະນະທີ່ຊິ້ນສ່ວນສັດປ່າ ແລະ ຊາກລິ່ນຫຼາຍສິບກິໂລ ຖືກນຳໄປຈູດທຳລາຍຖິ້ມຢ່າງເດັດຂາດ.
ຕາມການລາຍງານຂອງ ໜັງສືພີມ ຈຳປາໃໝ່, ວັນທີ 22 ພຶດສະພາ 2026 ຄະນະສະເພາະກິດແກ້ໄຂຊັບພະຍາກອນທຳມະຊາດ ແລະ ສິ່ງແວດລ້ອມ ແຂວງຈຳປາສັກ ສົມທົບກັບພາກສ່ວນທີ່ກ່ຽວຂ້ອງ ໄດ້ນຳເອົາໂຕລິ່ນຈຳນວນ 4 ໂຕ ທີ່ກູ້ໄພໄດ້ຈາກກຸ່ມຄ້າສັດປ່າເຖື່ອນ ໄປປ່ອຍຄືນສູ່ທຳມະຊາດຢູ່ເຂດປ່າປ້ອງກັນເຊປຽນ-ເຊນ້ຳນ້ອຍ ໃນເຂດເຊກະຕຳ ເມືອງປາກຊ່ອງ.
ການປ່ອຍຄືນສູ່ປ່າຄັ້ງນີ້ມີຂຶ້ນພາຍຫຼັງທີ່ສັດດັ່ງກ່າວໄດ້ຮັບການກວດກາສຸຂະພາບຈາກທີມງານຊ່ຽວຊານຈົນແນ່ໃຈວ່າ ມີຄວາມແຂງແຮງ ແລະ ກຽມພ້ອມທີ່ຈະກັບໄປດຳລົງຊີວິດໃນທຳມະຊາດໄດ້ຢ່າງປອດໄພ.
ການກູ້ໄພຄັ້ງນີ້ ສືບເນື່ອງມາຈາກຜົນງານການສະກັດກັ້ນຂອງເຈົ້າໜ້າທີ່ວິຊາສະເພາະ ປະຈຳປ້ອມກວດກາ 44 ເມືອງຊະນະສົມບູນ ໃນວັນທີ 16 ພຶດສະພາ ທີ່ຜ່ານມາ ເຊິ່ງໄດ້ທຳການກວດຄົ້ນລົດເມໂດຍສານສາຍອັດຕະປື-ນະຄອນຫຼວງວຽງຈັນ. ຈາກການກວດກາພາຍໃນຊ່ອງເກັບເຄື່ອງໃຕ້ທ້ອງລົດ ພົບເຫັນການຊຸກເຊື່ອງໂຕລິ່ນເຖິງ 9 ໂຕ ນ້ຳໜັກລວມ 43 ກິໂລ, ແຕ່ໜ້າສະຫຼົດໃຈທີ່ມີພຽງ 4 ໂຕເທົ່ານັ້ນທີ່ລອດຊີວິດ ຂະນະທີ່ອີກ 5 ໂຕໄດ້ຕາຍລົງພາຍຫຼັງການກວດພົບ ນອກຈາກນີ້ຍັງພົບຊິ້ນສ່ວນໂຕເໝັ້ນອີກ 2 ແກັດໂຟມ ນ້ຳໜັກລວມເຖິງ 36 ກິໂລ.
ສຳລັບຊາກໂຕລິ່ນທີ່ຕາຍ ແລະ ຊິ້ນສ່ວນໂຕເໝັ້ນທັງໝົດນັ້ນ ເຈົ້າໜ້າທີ່ໄດ້ນຳໄປຈູດທຳລາຍຖິ້ມຢູ່ເຂດຫຼັກ 10 ເມືອງບາຈຽງຈະເລີນສຸກ ເພື່ອສະກັດກັ້ນບໍ່ໃຫ້ນຳໄປສະແຫວງຫາຜົນປະໂຫຍດທາງການຄ້າໃນຕະຫຼາດມືດ ແລະ ເພື່ອຄວບຄຸມຄວາມປອດໄພດ້ານສຸຂະອະນາໄມຢ່າງເຄັ່ງຄັດ.
ມາດຕະການອັນເດັດຂາດໃນຄັ້ງນີ້ ບໍ່ພຽງແຕ່ເປັນການປາບປາມການລັກລອບຄ້າໂຕລິ່ນ ແລະ ໂຕເໝັ້ນ ເຊິ່ງເປັນສັດປ່າຫວງຫ້າມທີ່ໃກ້ຈະສູນພັນເທົ່ານັ້ນ, ແຕ່ຍັງເປັນການຢ້ຳເຕືອນເຖິງຄວາມເອົາໃຈໃສ່ຂອງແຂວງຈຳປາສັກ ໃນການປົກປັກຮັກສາລະບົບນິເວດ ແລະ ອະນຸລັກຊັບພະຍາກອນທຳມະຊາດໃຫ້ມີຄວາມຍືນຍົງຕໍ່ໄປ.
#LaoX #ແຂວງຈຳປາສັກ #ຢຸດການຄ້າສັດປ່າ #ອະນຸລັກທຳມະຊາດ #ສັດປ່າຫວງຫ້າມ #ຂ່າວສິ່ງແວດລ້ອມ #WildlifeConservation #StopIllegalWildlifeTrade #LaosNews
