ສຄອຊ ດຶງນັກລົງທຶນຈີນລຸຍໂຄງລ່າງພື້ນຖານ-ດິຈິຕອນ ດັນ “ວັງວຽງ” ຂຶ້ນແທ່ນເມືອງອັດສະລິຍະຕົ້ນແບບສະພາການຄ້າ ແລະ ອຸດສາຫະກຳແຫ່ງຊາດລາວ (ສຄອຊ) ຈັບມືຄະນະນັກທຸລະກິດລະດັບສູງຈາກ ສປ ຈີນ ເປີດເວທີຈັບຄູ່ທຸລະກິດ ເພື່ອດຶງດູດການລົງທຶນເຂົ້າສູ່ຂະແໜງໂຄງລ່າງພື້ນຖານ ແລະ ດິຈິຕອນ ໂດຍມຸ່ງປັ້ນເມືອງວັງວຽງເປັນເມືອງອັດສະລິຍະນຳຮ່ອງ ເພື່ອສ້າງຈຸດປ່ຽນສຳຄັນໃຫ້ແກ່ລະບົບເສດຖະກິດລາວ.ສຄອຊ ດຶງນັກລົງທຶນຈີນລຸຍໂຄງລ່າງພື້ນຖານ-ດິຈິຕອນ ດັນ “ວັງວຽງ” ຂຶ້ນແທ່ນເມືອງອັດສະລິຍະຕົ້ນແບບ
ກອງປະຊຸມພົບປະແລກປ່ຽນ ແລະ ຈັບຄູ່ທຸລະກິດ (Business Matching) ດັ່ງກ່າວ ໄດ້ຈັດຂຶ້ນໃນວັນທີ 23 ເມສາ 2026 ທີ່ໂຮງແຮມລາດສະວົງ ວັນດ້າ ວີສຕ້າ ໂດຍການເປັນປະທານຮ່ວມຂອງ ທ່ານ ວັນທອງ ສິດທິກຸນ, ຮອງປະທານ ສຄອຊ ແລະ ທ່ານ ຊີຣິວ ຊານ (Cyril Chan), ປະທານ ບໍລິສັດ Lancang-Mekong Silk Road Holding ຈາກປັກກິ່ງ.
ງານຄັ້ງນີ້ມີຜູ້ແທນຈາກພາກລັດ, ຜູ້ປະກອບການທຸລະກິດ ແລະ ນັກລົງທຶນຈີນໃນຂະແໜງພະລັງງານ, ບໍ່ແຮ່ ແລະ ເຕັກໂນໂລຊີ ເຂົ້າຮ່ວມຫຼາຍກວ່າ 30 ທ່ານ ເພື່ອຊອກຫາຊ່ອງທາງການລົງທຶນໃນລາວ.
ເວທີພົບປະຄັ້ງນີ້ແນໃສ່ຜັນຂະຫຍາຍການຮ່ວມມືດ້ານເສດຖະກິດການຄ້າ ໂດຍນຳໃຊ້ທ່າແຮງຈາກໂຄງລ່າງພື້ນຖານທີ່ລາວມີໃນປັດຈຸບັນ.
ພາກສ່ວນທີ່ກ່ຽວຂ້ອງໄດ້ຍົກໃຫ້ເຫັນເຖິງໂອກາດໃນຂະແໜງການຂົນສົ່ງ ແລະ ໂລຈິສຕິກ ໂດຍສະເພາະການນຳໃຊ້ທາງລົດໄຟລາວ-ຈີນ ທີ່ປ່ຽນລາວເປັນສູນກາງການເຊື່ອມຈອດ ເຊິ່ງສາມາດດຶງດູດໂຮງງານການຜະລິດເຂົ້າສູ່ເຂດກວມລວມໄຊເສດຖາ ແລະ ເຂດຮ່ວມມືເສດຖະກິດບໍ່ເຕັນ-ບໍ່ຫານ ຢ່າງຕໍ່ເນື່ອງ.
ຄຽງຄູ່ກັນນັ້ນ, ສປປ ລາວ ຍັງເປີດກວ້າງຮັບການລົງທຶນໃນຂະແໜງພະລັງງານສະອາດ, ການປຸງແຕ່ງກະສິກຳເພື່ອສົ່ງອອກ ແລະ ການພັດທະນາໂຄງລ່າງຮອງຮັບການທ່ອງທ່ຽວ ພ້ອມທັງການຖ່າຍທອດເຕັກໂນໂລຊີເພື່ອກ້າວສູ່ຍຸກອຸດສາຫະກຳ 4.0.
ຈຸດປ່ຽນສຳຄັນທີ່ຖືກສະເໜີໃນກອງປະຊຸມແມ່ນການຊຸກຍູ້ວຽກງານເມືອງອັດສະລິຍະ (Smart City) ແລະ ການພັດທະນາເຕັກໂນໂລຊີຂໍ້ມູນຂ່າວສານ (ICT) ໃນລາວ.
ສຄອຊ ໄດ້ສະເໜີໃຫ້ລິເລີ່ມໂຄງການດັ່ງກ່າວທີ່ເມືອງວັງວຽງເປັນແຫ່ງທຳອິດ ກ່ອນຈະຂະຫຍາຍໄປຍັງນະຄອນຫຼວງພະບາງ ແລະ ນະຄອນຫຼວງວຽງຈັນ. ໃນຕອນທ້າຍ, ຕາງໜ້າຈາກຝ່າຍລາວ ໄດ້ໃຫ້ຄຳໝັ້ນສັນຍາຢ່າງໜັກແໜ້ນວ່າ ຈະອຳນວຍຄວາມສະດວກ ແລະ ປົກປ້ອງສິດຜົນປະໂຫຍດອັນຊອບທຳຂອງນັກລົງທຶນຈີນ ເພື່ອຮັບປະກັນການຮ່ວມມືທີ່ຕ່າງຝ່າຍຕ່າງໄດ້ຮັບຜົນປະໂຫຍດສູງສຸດ.
ການເຄື່ອນໄຫວດັ່ງກ່າວສະທ້ອນໃຫ້ເຫັນເຖິງບາດກ້າວອັນສຳຄັນ ຂອງການຮ່ວມມືລະຫວ່າງພາກທຸລະກິດລາວ ແລະ ຈີນ ໃນການຍົກລະດັບສະພາບແວດລ້ອມການລົງທຶນ ເພື່ອຮອງຮັບການຂະຫຍາຍຕົວຂອງການຄ້າຂ້າມແດນ ແລະ ການຫັນເປັນດິຈິຕອນໃນພາກພື້ນ.
#LaoXperts #ສຄອຊ #BusinessMatching #SmartCity #ທາງລົດໄຟລາວຈີນ #ການລົງທຶນ #ເສດຖະກິດລາວ
