ສປປ ລາວ ກໍາລັງກະກຽມຫຼຸດພົ້ນຈາກສະຖານະພາບປະເທດດ້ອຍພັດທະນາ (LDC) ແບບໂລ່ງລຽນ ຫຼື Smooth LDC Transition ໃນປີ 2026, ທ່າມກາງສິ່ງທ້າທາຍຕ່າງໆ ເຊັ່ນ: ການສູນເສຍສິດທິພິເສດທາງດ້ານການຄ້າ.
ໂດຍກອງປະຊຸມ ກອງປະຊຸມຮັບຮອງຮ່າງບົດແນະນຳສໍາລັບການຂ້າມຜ່ານສະຖານະພາບປະເທດດ້ອຍພັດທະນາແບບໂລ່ງລ່ຽນຂອງ ສປປ ລາວ: ແຜນງານການປະຕີບັດວຽກບູລິມະສິດຂອງຂະແໜງການຄ້າ ແລະ ຂົງເຂດອື່ນໆ ທີ່ກ່ຽວຂ້ອງ ໃນໄລຍະ ປີ 2024-2030 ໄດ້ຈັດຂຶ້ນໃນວັນທີ 30 ກັນຍາ, ໂດຍການເປັນປະທ່ານຂອງທ່ານ ປອ ມະໂນທອງ ວົງໄຊ ຮອງລັດຖະມົນຕີກະຊວງອຸດສາຫະກຳ ແລະ ການຄ້າ ແລະ ທ່ານ Heather Variava ເອກອັກຄະລະຖະທູດ ສະຫະລັດ ອາເມຣິກາ ປະຈຳລາວ.
ສປປ ລາວ ແມ່ນຖືກຈັດຢູ່ໃນລາຍຊື່ບັນດາປະເທດດ້ອຍພັດທະນານັບຕັ້ງແຕ່ການສ້າງຕັ້ງກຸ່ມດັ່ງກ່າວ ມາ ແຕ່ປີ 1971 ຕາມຢັດຕິຂອງ ສະມັດຊາໃຫ່ຍ ຂອງ ສປຊ. ຈຸດປະສົງໃນການສ້າງຕັ້ງກຸ່ມດັ່ງກ່າວ ກໍ່ເພື່ອຈະຊ່ວຍໃຫ້ປະເທດດ້ວຍພັດທະນາ ສາມາດເຂົ້າເຖິງມາດຕະການການສະໜັບສະໜູນຈາກສາກົນໄດ້ທັນການ ແລະ ວ່ອງໄວ ແລະ ສາມາດສະໜອງກັບຄວາມຕ້ອງການ ໃນການພັດທະນາ.
ຕະຫຼອດໄລຍະຜ່ານມາ, ລັດຖະບານ ກໍ່ໄດ້ກຳນົດນະໂຍບາຍ ແລະ ຖືເອົາເປັນບູລີມະສິດແຫ່ງຊາດໃນການລຶບລ້າງຄວາມທຸກຍາກຂອງປະຊາຊົນບັນດາເຜົ່າ, ຕັດສິນໃຈວ່າງຄາດໝາດສູ້ຊົນ ແລະ ສຸມທຸກຄວາມພະຍາຍາມ ນໍາພາປະເທດຊາດຫຫຼຸດພົ້ນອອກຈາກສະຖານະພາບປະເທດດ້ອຍພັດທະນາຕັ້ງແຕ່ຊຸມປີ 2000.
ໃນກອງປະຊຸມດັ່ງກ່າວ, ທ່ານ ປອ ມະໂນທອງ ໄດ້ເນັ້ນໜັກເຖິງຄວາມສຳຄັນຂອງຮ່າງບົດແນະນຳ, ເຊິ່ງໄດ້ວາງອອກເພື່ອເລັ່ງການພັດທະນາໃນທົ່ວຂະແໜງການທີ່ສຳຄັນ.
ທ່ານຊີ້ໃຫ້ເຫັນວ່າ, ການຫັນປ່ຽນຄັ້ງນີ້ບໍ່ພຽງແຕ່ໝາຍເຖິງຄວາມສຳເລັດທີ່ພົ້ນເດັ່ນເທົ່ານັ້ນ, ແຕ່ຍັງເປັນການເປີດຊ່ອງທາງໃໝ່ເພື່ອໃຫ້ສາກົນຮັບຮູ້ຄວາມຄືບໜ້າຂອງປະເທດລາວ. ການຫັນປ່ຽນນີ້ຄາດວ່າຈະເພີ່ມຄວາມເຊື່ອໝັ້ນໃນການລົງທຶນພາຍໃນຕ່ອງໂສ້ມູນຄ່າພາກພື້ນ ແລະ ສາກົນ.
ແຕ່ຢ່າງໃດກໍຕາມ, ທ່ານຮອງລັດຖະມົນຕີໄດ້ໃຫ້ຮູ້ອີກວ່າວ່າ ການອອກຈາກສະຖານະ LDC ມາພ້ອມກັບສິ່ງທ້າທາຍ, ໂດຍສະເພາະແມ່ນການສູນເສຍສິດທິພິເສດດ້ານການຄ້າ ແລະ ຜົນປະໂຫຍດອື່ນໆທີ່ອາດຈະກີດຂວາງການເຕີບໂຕຂອງເສດຖະກິດ.
ທ່ານ ດຣ ມາໂນທອງ ໄດ້ຍົກໃຫ້ເຫັນເຖິງ ໂອກາດທີ່ສຳຄັນ ທີ່ສາມາດອຳນວຍຄວາມສະດວກ ໃຫ້ແກ່ລາວ ອອກຈາກສະຖານະພາບ ປະເທດດ້ອຍພັດທະນາ ເຊັ່ນ: ການນຳໃຊ້ເສັ້ນທາງລົດໄຟ ແລະ ທ່າບົກ ຂອງປະເທດ ເພື່ອສົ່ງເສີມການຄ້າ, ຫຼຸດຜ່ອນການເພິ່ງພາອາໄສນໍ້າມັນເຊື້ອໄຟທີ່ນຳເຂົ້າ ໂດຍການນຳໃຊ້ພະລັງງານໄຟຟ້າທີ່ຜະລິດຢູ່ພາຍໃນປະເທດໃຫ້ໄດ້ສູງສຸດ ແລະ ນຳໃຊ້ຊັບພະຍາກອນກະສິກຳ ຢ່າງເຕັມທີ່ ເພື່ອຕອບສະໜອງໃຫ້ກັບທົ່ວໂລກ.
ທ່ານຮຽກຮ້ອງໃຫ້ເພີ່ມທະວີການສົ່ງອອກທີ່ມີຄວາມຫຼາກຫຼາຍ, ສ້າງຜະລິດຕະພັນທີ່ມີມູນຄ່າເພີ່ມສູງຂຶ້ນ ແລະ ເຊື່ອມໂຍງເຂົ້າກັບຕ່ອງໂສ້ມູນຄ່າຂອງພາກພື້ນ ແລະ ໂລກຢ່າງເລິກເຊິ່ງ.
ທ່ານຍັງໄດ້ເນັ້ນໜັກເຖິງຄວາມສຳຄັນຂອງການເຊື່ອມໂຍງເສດຖະກິດໂດຍຜ່ານສັນຍາການຄ້າເສລີ, ໂດຍສະເພາະແມ່ນກັບອາຊຽນ, ອາຊຽນ+6, ການພົວພັນຄູ່ຮ່ວມມືເສດຖະກິດຮອບດ້ານໃນພາກພື້ນ, ແລະເປີດກວ້າງການເຂົ້າເຖິງຕະຫຼາດໂດຍຜ່ານການເຈລະຈາກັບບັນດາປະເທດຄື: ຈີນ, ຍີ່ປຸ່ນ, ສ.ເກົາຫຼີ, ສະຫະພາບເອີລົບ. ການາດາ ແລະ ອາເມຣິກາ.
ການຮັບຮອງຮ່າງບົດແນະນຳກ່ຽວກັບການຫັນປ່ຽນຂອງລາວຈາກສະຖານະການ LDC ແມ່ນລວມມີການຮັບຮອງເອົາຢ່າງເປັນທາງການກ່ຽວກັບຂໍ້ແນະນຳທີ່ຊີ້ອອກບັນດາການກະທຳບຸລິມະສິດຂອງຂະແໜງການຄ້າ ແລະ ຂົງເຂດທີ່ກ່ຽວຂ້ອງແຕ່ປີ 2024 ຫາ 2030.
ທ່ານ Heather Variava ຍັງໄດ້ເນັ້ນເຖິງ ຄວາມສໍາຄັນ ຂອງການໃຫ້ລາວພົ້ນຈາກສະຖານພາບປະເທດ LDC ແລະ ຄວາມທ້າທາຍທີ່ຈະນຳມາ.
ໂດຍທ່ານ ທູດກ່າວວ່າ:“ກອງປະຊຸມສຳມະນາຮັບຮອງເອົາທິດຊີ້ນຳຄັ້ງນີ້ ແມ່ນຂີດໝາຍສຳຄັນໃນການເດີນທາງທີ່ສຳຄັນ, ແຕ່ຍັງນຳມາໃຫ້ບັນດາສິ່ງທ້າທາຍ, ໂດຍສະເພາະແມ່ນການສູນເສຍບຸລິມະສິດ, ເຊິ່ງສາມາດສົ່ງຜົນກະທົບຕໍ່ການສົ່ງອອກຕົ້ນຕໍຄື: ເຄື່ອງນຸ່ງ, ເກີບໜັງ, ເຂົ້າສານ, ນ້ຳຕານ. “
ທ່ານເອກອັກຄະລັດຖະທູດ ສະຫະລັດ ອາເມຣິກາ ປະຈຳລາວ ໄດ້ເນັ້ນໜັກເຖິງຄວາມສຳຄັນຂອງການກະກຽມໃຫ້ແກ່ການຫັນປ່ຽນທີ່ສຳຄັນນີ້ ເພື່ອຈະປະຕິບັດບັນດາມາດຕະການປ້ອງກັນຄວາມສ່ຽງຕ່າງໆທີ່ຈະເກີດໃນໄລຍະສັ້ນ.
ທ່ານນາງໄດ້ຊຸກຍູ້ໃຫ້ມີການການປະຕິຮູບຢ່າງຕໍ່ເນື່ອງ ແລະ ການເຊື່ອມໂຍງເຂົ້າກັນໃນທົ່ວໂລກ, ລວມທັງການເປີດກວ້າງ ແລະ ຄວາມຫຼາກຫຼາຍຂອງຕະຫຼາດສົ່ງອອກ ແລະ ແກ້ໄຂສິ່ງທ້າທາຍທີ່ອຳນວຍຄວາມສະດວກດ້ານການຄ້າ.
ອີງຕາມຄຳເວົ້າຂອງ ທ່ານ ມະໂນທອງ ວົງໄຊ, ນັບແຕ່ການສ້າງກຸ່ມປະເທດດ້ອຍພັດທະນາ ໃນປີ 1971 ໂດຍອົງການສະຫະປະຊາຊາດ ແລ້ວ ຮອດປັດຈຸບັນມີພຽງແຕ່ 07 ປະເທດເທົ່ານັ້ນ ທີ່ສາມາດຫຼຸດພົ້ນອອກຈາກສະຖານະພາບປະເທດດ້ອຍພັດທະນາໄດ້ ຄື: ປະເທດບົດສະວານາ ຫຼຸດພົ້ນໃນປີ 1994, ກັບແວກ ໃນປິ 2007, ມານດິວ ໃນປີ 2011, ຊາມົວ ໃນປີ 2014, ເອກົວຕໍເຣຍ ກີນີ ໃນປີ 2017, ວານຸອາຕູ ໃນປິ 2020 ແລະ ປະເທດບູຖານ ຈະຫຼຸດພົ້ນໃນທ້າຍປີນີ້.
