ເຈົ້າໜ້າທີ່ຕຳຫຼວດໄດ້ສັ່ງຟ້ອງເຈົ້າຂອງໂຮງງານຜະລິດເຫຼົ້າ ໄທເກີ ວອດກາ (Tiger Vodka) ແລະ ເຈົ້າຂອງ ແລະ ພະນັກງານ ໂຮງແຮມ Nana Backpackers ໃນຂະນະທີ່ກ່າວວ່າ ພວກເຂົາບໍ່ສາມາດກຳນົດສາເຫດການເສຍຊີວິດທາງກົດໝາຍ ຂອງນັກທ່ອງທ່ຽວຕ່າງຊາດ 5 ຄົນ ຢູ່ເມືອງວັງວຽງ ແຂວງວຽງຈັນໄດ້ ເນື່ອງຈາກບໍ່ໄດ້ພິສູດຊາກສົບ.

ການປະກາດດັ່ງກ່າວມີຂຶ້ນໃນລະຫວ່າງການຖະແຫຼງຂ່າວ ທີ່ຈັດຂຶ້ນຢູ່ກະຊວງປ້ອງກັນຄວາມສະຫງົບໃນວັນສຸກ, ເຊິ່ງຖືເປັນການຊີ້ແຈງຕໍ່ສາທາລະນະຊົນທີ່ລະອຽດທີ່ສຸດຂອງລັດຖະບານ ກ່ຽວກັບການສືບສວນສອບສວນການເສຍຊີວິດຂອງນັກທ່ອງທ່ຽວຕ່າງຊາດ 6 ຄົນ ໃນເດືອນພະຈິກ 2024, ອີງຕາມການລາຍງານຂອງໜັງສືພິມປ້ອງກັນຄວາມສະຫງົບ.

ຮອງຫົວໜ້າກອງບັນຊາການປ້ອງກັນຄວາມສະຫງົບແຂວງວຽງຈັນ, ທ່ານ ພັອ ຄຳຟອງ ວົງດາລາສານ ກ່າວວ່າ ເຈົ້າໜ້າທີ່ສືບສວນພົບລະດັບສານເມທານອນ (methanol) ເກີນມາດຕະຖານທີ່ອະນຸຍາດ ໃນເຫຼົ້າ Tiger Vodka ເຊິ່ງຜະລິດໂດຍໂຮງງານຂອງເອກະຊົນ ຢູ່ບ້ານໄຊມຸງຄຸນ, ເມືອງນາຊາຍທອງ, ນະຄອນຫຼວງວຽງຈັນ.

ນອກນີ້, ເຈົ້າໜ້າທີ່ຕຳຫຼວດຍັງໄດ້ຮັບການຢັ້ງຢືນຜ່ານສະຖານທູດອົດສະຕຣາລີວ່າ ໂຮງໝໍເອກອຸດອນ ປະເທດໄທ ໄດ້ກວດພົບສານເມທານອນໃນເລືອດຂອງແມ່ຍິງຊາວອົດສະຕຣາລີ 2 ຄົນທີ່ເສຍຊີວິດ.

ເຖິງຢ່າງໃດກໍຕາມ, ທ່ານ ພັອ ຄຳຟອງ ກ່າວວ່າ ເຈົ້າໜ້າທີ່ສືບສວນບໍ່ສາມາດສະຫຼຸບສາເຫດການເສຍຊີວິດຂອງທັງ 5 ຄົນ ທາງກົດໝາຍໄດ້ ເນື່ອງຈາກບໍ່ມີການຊັນນະສູດສົບ.

ແຕ່ທ່ານກ່າວວ່າ ການສືບສວນຈະຍັງຄົງດຳເນີນຕໍ່ໄປ ເພື່ອເກັບກຳຫຼັກຖານໃຫ້ມີຄວາມຄົບຖ້ວນ, ພາວະວິໄສ ແລະ ເຊື່ອຖືໄດ້.

ການຖະແຫຼງຂ່າວຄັ້ງນີ້ ມີຜູ້ຕາງໜ້າຈາກກະຊວງປ້ອງກັນຄວາມສະຫງົບ, ກະຊວງການຕ່າງປະເທດ, ແລະ ສະຖານທູດຂອງບັນດາປະເທດທີ່ພົນລະເມືອງຂອງຕົນເສຍຊີວິດ ເຂົ້າຮ່ວມ.

ຜູ້ເສຍຊີວິດໄດ້ຖືກລະບຸຊື່ຄື: ທ້າວ James Louis Hutson (ສັນຊາດອາເມລິກາ), ນາງ Freja Vennervald Sorensen ແລະ ນາງ Anne-Sofie Orkild Coyman (ສັນຊາດດານມາກ), ນາງ Bianca Jones ແລະ ນາງ Holly Bowles (ສັນຊາດອົດສະຕຣາລີ), ນາງ Simone White (ສັນຊາດອັງກິດ)

ການດຳເນີນຄະດີ 

ຕຳຫຼວດກ່າວວ່າ ເຈົ້າຂອງໂຮງງານເຫຼົ້າ Tiger Vodka ໄດ້ຖືກສັ່ງຟ້ອງໃນຂໍ້ຫາ ຜະລິດ ແລະ ຈຳໜ່າຍສິນຄ້າອຸປະໂພກບໍລິໂພກທີ່ເປັນອັນຕະລາຍຕໍ່ສຸຂະພາບ ຕາມມາດຕາ 275 ຂອງປະມວນກົດໝາຍອາຍາ ແລະ ດຳເນີນທຸລະກິດຜິດກົດໝາຍ ຕາມມາດຕາ 297. ຄະນີດັ່ງກ່າວໄດ້ຖືກສົ່ງໄປຍັງສານປະຊາຊົນແຂວງວຽງຈັນ ເພື່ອດຳເນີນການພິຈາລະນາຕັດສິນ.

ເຈົ້າໜ້າທີ່ສືບສວນກ່າວວ່າ ໃນເບື້ອງຕົ້ນອົງການໄອຍະການໄດ້ພິຈາລະນາຕັ້ງຂໍ້ຫາເຈົ້າຂອງໂຮງງານ ໃນຖານລະເມີດລະບຽບການດ້ານຄວາມປອດໄພຂອງອາຫານ ແຕ່ຕໍ່ມາໄດ້ຍົກເລີກຂໍ້ຫານັ້ນ ເນື່ອງຈາກຫຼັກຖານບໍ່ພຽງພໍ. ໄອຍະການຈຶ່ງໄດ້ຊີ້ນຳໃຫ້ຕຳຫຼວດດຳເນີນຄະດີໃນຂໍ້ຫາ ທີ່ກ່ຽວຂ້ອງກັບການຜະລິດ ແລະ ຈຳໜ່າຍສິນຄ້າອຸປະໂພກບໍລິໂພກທີ່ເປັນອັນຕະລາຍແທນ.

ເຈົ້າໜ້າທີ່ຕຳຫຼວດ ຍັງໄດ້ເປີດເຜີຍຜົນຂອງອີກຄະດີໜຶ່ງ ທີ່ກ່ຽວຂ້ອງກັບໂຮງແຮມ ນານາ ແບັກແພັກເກີ (Nana Backpackers Hostel), ເຊິ່ງນັກທ່ອງທ່ຽວຫຼາຍຄົນໄດ້ພັກເຊົາ.

ເຈົ້າໜ້າທີ່ສືບສວນພົບວ່າ ຫຼັງຈາກ ທ້າວ Hutson ຊາວອາເມລິກາ ໄດ້ເສຍຊີວິດໃນຫ້ອງ 205 ເມື່ອວັນທີ 13 ພະຈິກ 2024, ພະນັກງານໂຮງແຮມໄດ້ເຄື່ອນຍ້າຍສົບຂອງລາວໄປໂຮງໝໍເມືອງວັງວຽງ ກ່ອນທີ່ຈະແຈ້ງໃຫ້ຕຳຫຼວດຊາບ, ເຮັດໃຫ້ເຈົ້າໜ້າທີ່ບໍ່ສາມາດກວດກາສະຖານທີ່ເກີດເຫດໃນຫ້ອງດັ່ງກ່າວໄດ້.

ຕຳຫຼວດໄດ້ຕັ້ງຂໍ້ຫາເຈົ້າຂອງໂຮງແຮມ ແລະ ພະນັກງານອີກ 10 ຄົນ ໃນຖານທຳລາຍຫຼັກຖານ ຕາມມາດຕາ 383 ຂອງປະມວນກົດໝາຍອາຍາ.

ສານປະຊາຊົນເມືອງວັງວຽງ ໄດ້ຕັດສິນລົງໂທດຈຳເລີຍທັງ 10 ຄົນ. ແຕ່ອົງການໄອຍະການປະຊາຊົນເມືອງວັງວຽງ ໄດ້ຍື່ນອຸທອນຕໍ່ຄຳຕັດສິນດັ່ງກ່າວ ໂດຍລະບຸວ່າໂທດນັ້ນເບົາບາງເກີນໄປ ແລະ ໄດ້ຮຽກຮ້ອງໃຫ້ສານປະຊາຊົນແຂວງວຽງຈັນ ທົບທວນຄືນບົດລົງໂທດໃໝ່.

ຕຳຫຼວດກ່າວວ່າ ໂຮງແຮມ Nana Backpackers ຍັງຄົງຖືກປິດ ໃນຂະນະທີ່ຂະບວນການທາງກົດໝາຍຍັງດຳເນີນຢູ່. ເຈົ້າຂອງ ແລະ ພະນັກງານທັງ 10 ຄົນ ໄດ້ຖືກຢຶດໜັງສືເດີນທາງ ແລະ ຖືກຫ້າມບໍ່ໃຫ້ເດີນທາງອອກຈາກປະເທດລາວ ຈົນກວ່າຄະດີຈະສິ້ນສຸດ.

ເຈົ້າໜ້າທີ່ຕຳຫຼວດລະບຸວ່າ ພວກເຂົາຮັບຊາບກ່ຽວກັບການເສຍຊີວິດຂອງ ທ້າວ Hutson ເປັນຄັ້ງທຳອິດ ໃນວັນທີ 14 ພະຈິກ 2024, ຫຼັງຈາກໄດ້ຮັບແຈ້ງວ່າ ມີຊາວອາເມລິກາເສຍຊີວິດຢູ່ໂຮງໝໍເມືອງວັງວຽງ. ຕໍ່ມາເຈົ້າໜ້າທີ່ຈຶ່ງໄດ້ສືບສວນພົບວ່າ ລາວໄດ້ເສຍຊີວິດຢູ່ທີ່ໂຮງແຮມໃນມື້ກ່ອນໜ້ານັ້ນ ກ່ອນທີ່ສົບຂອງລາວຈະຖືກຍ້າຍໄປໂຮງໝໍ.

ເຈົ້າໜ້າທີ່ສືບສວນພົບສິ່ງຂອງຫຼາຍຢ່າງພາຍໃນຫ້ອງພັກ ລວມທັງຕຸກເບຍ, ຈອກທີ່ມີເຫຼົ້າ Tiger Vodka, ນໍ້າອັດລົມ, ນໍ້າດື່ມຕຸກ, ຢາປົວພະຍາດ, ແລະ ຈົດໝາຍລາຕາຍ. ຄອບຄົວຂອງ ທ້າວ Hutson ປະຕິເສດການຊັນນະສູດສົບ ແລະ ສົບຂອງລາວໄດ້ຖືກມອບໃຫ້ຄອບຄົວເພື່ອນຳໄປປະກອບພິທີທາງສາສະໜາ.

ການສືບສວນຍັງພົບວ່າ ແມ່ຍິງຊາວດານມາກ 2 ຄົນ ມີອາການປ່ວຍເຊັ່ນ: ຫາຍໃຈຝືດ, ວິນຫົວ ແລະ ປວດຮາກ ກ່ອນທີ່ຈະໄດ້ຮັບການປິ່ນປົວຢູ່ໂຮງໝໍເມືອງວັງວຽງ ແລະ ຖືກສົ່ງຕໍ່ໄປຍັງໂຮງໝໍ 103 ທີ່ນະຄອນຫຼວງວຽງຈັນ, ເຊິ່ງຕໍ່ມາພວກເຂົາກໍໄດ້ເສຍຊີວິດ. ຄອບຄົວຂອງພວກເຂົາກໍໄດ້ປະຕິເສດຄຳຮ້ອງຂໍໃຫ້ມີການຊັນນະສູດສົບເຊັ່ນກັນ.

ຕຳຫຼວດກ່າວວ່າ ແມ່ຍິງຊາວອົດສະຕຣາລີ 2 ຄົນ ໄດ້ເຂົ້າພັກຢູ່ໂຮງແຮມ Nana Backpackers ໃນວັນທີ 9 ພະຈິກ 2024. ເຈົ້າໜ້າທີ່ສືບສວນບໍ່ສາມາດກຳນົດການເຄື່ອນໄຫວທັງໝົດຂອງພວກເຂົາ ຫຼື ສິ່ງທີ່ພວກເຂົາກິນ ຫຼື ດື່ມ ໃນລະຫວ່າງການພັກເຊົາໄດ້. ຫຼັງຈາກມີອາການປ່ວຍໜັກ, ພວກເຂົາໄດ້ຮັບການປິ່ນປົວຢູ່ໂຮງໝໍເມືອງວັງວຽງ ກ່ອນຈະຖືກສົ່ງໄປຍັງໂຮງໝໍເສດຖາທິລາດ ໃນນະຄອນຫຼວງວຽງຈັນ. ຕາມການຮຽກຮ້ອງຂອງຄອບຄົວ, ຕໍ່ມາພວກເຂົາໄດ້ຖືກທີມແພດສົ່ງຕົວໄປປິ່ນປົວຕໍ່ທີ່ປະເທດໄທ, ເຊິ່ງຕໍ່ມາພວກເຂົາກໍໄດ້ເສຍຊີວິດລົງ.

ເຈົ້າໜ້າທີ່ສືບສວນກ່າວວ່າ ນາງ White ຊາວອັງກິດ ໄດ້ຖືກສົ່ງຕົວຈາກໂຮງໝໍມະໂຫສົດ ໄປຍັງໂຮງໝໍກະເສມຣາດ ອິນເຕີເນຊັນແນລ ໃນນະຄອນຫຼວງວຽງຈັນ ເມື່ອວັນທີ 13 ພະຈິກ 2024 ຫຼັງຈາກໝົດສະຕິລົງ, ແລະ ນາງໄດ້ເສຍຊີວິດໃນວັນທີ 21 ພະຈິກ.

ການສືບສວນຍັງດຳເນີນຕໍ່ໄປ

ຕຳຫຼວດກ່າວວ່າ ພວກເຂົາໄດ້ເປີດການສືບສວນສອບສວນການເສຍຊີວິດຂອງທັງ 5 ຄົນ ແຕ່ບໍ່ສາມາດກຳນົດຄວາມຮັບຜິດຊອບທາງອາຍາໄດ້ ເນື່ອງຈາກບໍ່ມີການຊັນນະສູດສົບ. ເຖິງແມ່ນວ່າຈະພົບສານເມທານອນເກີນມາດຕະຖານໃນເຫຼົ້າ Tiger Vodka ແລະ ພົບເມທານອນໃນເລືອດຂອງແມ່ຍິງຊາວອົດສະຕຣາລີທັງ 2 ຄົນກໍຕາມ, ແຕ່ ທ່ານ ພັອ ຄຳຟອງ ກ່າວວ່າ ຫຼັກຖານທີ່ມີຢູ່ຍັງບໍ່ພຽງພໍຕາມກົດໝາຍລາວ ທີ່ຈະຊີ້ຊັດວ່າການເສຍຊີວິດດັ່ງກ່າວ ເກີດຈາກການກະທຳຂອງບຸກຄົນໃດໜຶ່ງໂດຍສະເພາະ.

ທ່ານກ່າວວ່າ ເຈົ້າໜ້າທີ່ສືບສວນຈະສືບຕໍ່ເກັບກຳຫຼັກຖານຕາມກົດໝາຍວ່າດ້ວຍການດຳເນີນຄະດີອາຍາ ແລະ ຈະຮັກສາການຮ່ວມມືຢ່າງໃກ້ຊິດກັບສະຖານທູດສະຫະລັດອາເມລິກາ, ອົດສະຕຣາລີ, ດານມາກ ແລະ ສະຫະລາຊະອານາຈັກ (ອັງກິດ).

ທ່ານ ພັອ ຄຳຟອງ ໄດ້ສະແດງຄວາມໄວ້ອາໄລຢ່າງສຸດຊຶ້ງມາຍັງຄອບຄົວຂອງຜູ້ເສຍຊີວິດ ແລະ ກ່າວວ່າ ເຈົ້າໜ້າທີ່ຕຳຫຼວດຍັງຄົງມຸ່ງໝັ້ນທີ່ຈະດຳເນີນການສືບສວນສອບສວນຢ່າງໂປ່ງໃສ, ຍຸຕິທຳ ແລະ ຖືກຕ້ອງຕາມກົດໝາຍ.

ເຫດການເສຍຊີວິດດັ່ງກ່າວໄດ້ດຶງດູດຄວາມສົນໃຈຈາກທົ່ວໂລກ ຫຼັງຈາກຊາວຕ່າງຊາດ 6 ຄົນ ໄດ້ລົ້ມປ່ວຍໜັກໃນຂະນະທີ່ມາທ່ຽວທີ່ເມືອງວັງວຽງ ເຊິ່ງເປັນສະຖານທີ່ທ່ອງທ່ຽວຍອດນິຍົມ. ສື່ມວນຊົນສາກົນໄດ້ລາຍງານຢ່າງກວ້າງຂວາງເຖິງຂໍ້ສົງໄສກ່ຽວກັບການເປັນພິດຈາກເມທານອນ ເຊິ່ງເຊື່ອມໂຍງກັບການຜະລິດເຫຼົ້າທີ່ຜິດກົດໝາຍ, ເຮັດໃຫ້ຫຼາຍປະເທດອອກຄຳເຕືອນໃນການເດີນທາງມາປະເທດລາວ.

ເຫດການດັ່ງກ່າວຍັງເຮັດໃຫ້ໜ່ວຍງານຂອງລັດຖະບານລາວ ຕ້ອງເພີ່ມທະວີການກວດກາການຜະລິດເຄື່ອງດື່ມທີ່ມີທາດເຫຼົ້າ, ຄວາມປອດໄພດ້ານອາຫານ ແລະ ທຸລະກິດການທ່ອງທ່ຽວໃຫ້ເຂັ້ມງວດຂຶ້ນ, ໃນຂະນະທີ່ເຈົ້າໜ້າທີ່ໄດ້ເປີດການສືບສວນທາງອາຍາຕໍ່ກັບການເສຍຊີວິດດັ່ງກ່າວ.

ການຖະແຫຼງຂ່າວໃນວັນສຸກ ແມ່ນການອັບເດດຂໍ້ມູນຕໍ່ສາທາລະນະຊົນແບບຄົບຖ້ວນເປັນຄັ້ງທຳອິດ ກ່ຽວກັບການສືບສວນ ແລະ ຂະບວນການທາງກົດໝາຍທີ່ກ່ຽວຂ້ອງ ນັບຕັ້ງແຕ່ເກີດເຫດການດັ່ງກ່າວຂຶ້ນ.

#LaoX #ຂ່າວລາວ #ຂ່າວດ່ວນ #ວັງວຽງ #ຂ່າວວັງວຽງ #ຄວາມປອດໄພນັກທ່ອງທ່ຽວ #ເຫຼົ້າປອມ