ຮຸ້ນ AI ກັບມາຄຶກຄັກ! ດັນຕະຫຼາດຮຸ້ນໂລກຟື້ນຕົວ ຫຼັງຜະເຊີນແຮງຂາຍຮຸນແຮງ
ຮຸ້ນເຕັກໂນໂລຊີໃນສະຫະລັດ, ເກົາຫຼີໃຕ້ ແລະ ໄຕ້ຫວັນ ປັບຕົວຂຶ້ນ ຫຼັງຜົນປະກອບການ CoreWeave ຊ່ວຍຟື້ນຄວາມເຊື່ອໝັ້ນ ແຕ່ຄວາມສ່ຽງຈາກດອກເບ້ຍຍັງຄົງຢູ່
ຕະຫຼາດຮຸ້ນໂລກສົ່ງສັນຍານຟື້ນຕົວໃນວັນພຸດທີ 11 ພະຈິກ 2026 ຫຼັງຮຸ້ນກຸ່ມເຕັກໂນໂລຊີ ແລະ ປັນຍາປະດິດ (AI) ປັບຕົວຂຶ້ນຢ່າງໂດດເດັ່ນ ຊ່ວຍຟື້ນຄວາມເຊື່ອໝັ້ນຂອງນັກລົງທຶນ ຫຼັງຈາກຕະຫຼາດປະເຊີນກັບການເທຂາຍຮຸ້ນເຕັກໂນໂລຊີຢ່າງຮຸນແຮງໃນຊ່ວງກ່ອນໜ້າ.
ສຳນັກຂ່າວ Reuters ລາຍງານວ່າ ແຮງຊື້ຮຸ້ນ AI ກັບຄືນມາ ຫຼັງບໍລິສັດ CoreWeave ຜູ້ໃຫ້ບໍລິການລະບົບ Cloud ແລະ ໂຄງສ້າງພື້ນຖານຄອມພິວເຕີສຳລັບ AI ເປີດເຜີຍຜົນປະກອບການທີ່ດີກວ່າຄາດ.
CoreWeave ລະບຸວ່າ ບໍລິສັດຄາດວ່າຈະເລີ່ມມີກຳໄລຕາມເກນປັບປຸງທາງບັນຊີໃນເຄິ່ງປີທຳອິດຂອງປີ 2028 ເຊິ່ງຊ່ວຍຫຼຸດຄວາມກັງວົນໃນໄລຍະສັ້ນ ກ່ຽວກັບຄວາມຄຸ້ມຄ່າຂອງການລົງທຶນ AI.
ຮຸ້ນ CoreWeave ເພີ່ມຂຶ້ນປະມານ 16% ໃນການຊື້ຂາຍກ່ອນຕະຫຼາດສະຫະລັດເປີດ ຂະນະທີ່ຮຸ້ນ Nvidia ກໍຟື້ນຕົວ ຫຼັງຈາກຜະເຊີນແຮງຂາຍໃນຊ່ວງຜ່ານມາ.
ການຟື້ນຕົວບໍ່ໄດ້ຈຳກັດຢູ່ສະເພາະສະຫະລັດ ແຕ່ຍັງຂະຫຍາຍໄປສູ່ຕະຫຼາດອາຊີ ແລະ ເອີຣົບ.
ໃນການຊື້ຂາຍວັນທີ 11 ພະຈິກ, ດັດຊະນີຮຸ້ນເກົາຫຼີໃຕ້ KOSPI ເພີ່ມຂຶ້ນປະມານ 2.6%, ຕະຫຼາດໄຕ້ຫວັນເພີ່ມ 3.6% ແລະ ດັດຊະນີ Nikkei ຂອງຍີ່ປຸ່ນເພີ່ມຂຶ້ນປະມານ 1.3%.
ສ່ວນດັດຊະນີ STOXX 600 ຂອງເອີຣົບປັບຕົວຂຶ້ນປະມານ 0.3% ໃນຊ່ວງກາງວັນ ແລະ ເຂົ້າໃກ້ລະດັບສະຖິຕິສູງສຸດທີ່ເຄີຍບັນທຶກໄວ້ໃນເດືອນສິງຫາ.
ໃນສະຫະລັດ ດັດຊະນີ Nasdaq Composite ເພີ່ມຂຶ້ນ 1.54% ທັນທີທີ່ຕະຫຼາດເປີດ ຂະນະທີ່ S&P 500 ເພີ່ມຂຶ້ນ 0.97%.
ໃນຊ່ວງຕົ້ນເດືອນພະຈິກ ຕະຫຼາດຮຸ້ນເຕັກໂນໂລຊີປະເຊີນກັບແຮງຂາຍຢ່າງໜັກ ຍ້ອນນັກລົງທຶນເລີ່ມກັງວົນວ່າ ບັນດາບໍລິສັດ AI ອາດໃຊ້ຈ່າຍທຶນຫຼາຍເກີນໄປ ໂດຍຍັງບໍ່ສາມາດສ້າງຜົນຕອບແທນໄດ້ໃນລະດັບທີ່ຄາດຫວັງ.
ໃນເດືອນຕຸລາ, ນັກລົງທຶນຕ່າງຊາດຖອນທຶນສຸດທິປະມານ 49.77 ຕື້ໂດລາ ອອກຈາກຕະຫຼາດຮຸ້ນເຈັດແຫ່ງໃນອາຊີ ທ່າມກາງຄວາມກັງວົນຕໍ່ມູນຄ່າຮຸ້ນ AI ແລະ ຕົ້ນທຶນການລົງທຶນ.
ນອກຈາກນີ້ ຄວາມຄາດຫວັງທີ່ວ່າ ທະນາຄານກາງສະຫະລັດອາດຂຶ້ນອັດຕາດອກເບ້ຍອີກ ຍັງເປັນປັດໄຈກົດດັນຕໍ່ຮຸ້ນເຕັກໂນໂລຊີ ເພາະດອກເບ້ຍທີ່ສູງຂຶ້ນຈະເພີ່ມຕົ້ນທຶນການກູ້ຢືມຂອງບໍລິສັດ.
ສະນັ້ນ ເຖິງວ່າຕະຫຼາດຈະຟື້ນຕົວໃນມື້ນີ້ ແຕ່ນັກວິເຄາະຍັງມອງວ່າ ຕ້ອງຕິດຕາມຜົນກຳໄລຂອງບໍລິສັດ AI, ລະດັບໜີ້ສິນ, ການລົງທຶນໃນສູນຂໍ້ມູນ ແລະ ທິດທາງດອກເບ້ຍ ກ່ອນຈະສະຫຼຸບໄດ້ວ່າ ຕະຫຼາດໄດ້ຜ່ານຈຸດຕ່ຳສຸດແລ້ວ.
#LaoXperts #AIStocks #ArtificialIntelligence #Nvidia #CoreWeave #StockMarket #Nasdaq #WallStreet #GlobalMarkets #TechnologyStocks #ຕະຫຼາດຮຸ້ນ #ເຕັກໂນໂລຊີ
