ໃນວັນຄານຜ່ານມາ, ນາຍົກລັດຖະມົນຕີອອສເຕຣເລຍ ໄດ້ປະກາດສ້າງຕັ້ງກອງທຶນມູນຄ່າ 2 ຕື້ໂດລາອອສສເຕຣເລຍ (ປະມານ 1.3 ຕື້ໂດລາສະຫະລັດ) ໃນກອງປະຊຸມສຸດຍອດອາຊຽນ-ອອສເຕຣເລຍ (ASEAN-Australia Summit 2024) ທີ່ນະຄອນ Melbourne. ເພື່ອສົ່ງເສີມການຄ້າ ແລະ ການລົງທຶນຢູ່ອາຊີຕາເວັນອອກສ່ຽງໃຕ້, ສະໜັບສະໜູນການຫັນປ່ຽນໄປສູ່ພະລັງງານສະອາດ ແລະ ພັດທະນາພື້ນຖານໂຄງສ້າງໃນພູມິພາກ.
ກອງທຶນການລົງທຶນອາຊີຕາເວັນອອກສຽງໃຕ້ Southeast Asia Investment Financing Facility : SEAIFF) ໄດ້ສຸມໃສ່ການສະໜັບສະໜູນ:
- ພະລັງງານສະອາດ: ສະໜັບສະໜູນໂຄງການພະລັງງານທົດແທນ, ພະລັງງານແສງຕາເວັນ, ພະລັງງານລົມ, ແລະ ເຕັກໂນໂລຊີພະລັງງານສະອາດອື່ນໆ
- ພື້ນຖານໂຄງສ້າງ: ພັດທະນາພື້ນຖານໂຄງລ່າງທີ່ຈຳເປັນເຊັ່ນ: ເສັ້ນທາງ, ທາງລົດໄຟ, ທ່າເຮືອ ແລະ ລະບົບໂທລະຄົມມະນາຄົມ.
ໂດຍສຳລັບຮູບແບບໃນການສະໜັບສະໜູນຈະປະກອບໄດ້ດ້ວຍ:
- ສິນເຊື່ອ: ເງິນທຶນໄລຍະຍາວສໍາລັບໂຄງການຂະໜາດໃຫຍ່.
- ການຄ້ຳປະກັນ: ເພື່ອຫຼຸດຜ່ອນຄວາມສ່ຽງສໍາລັບນັກລົງທຶນ
- ຕຣາສານທຶນ: ລົງທຶນໃນບໍລິສັດ ແລະ ໂຄງການທີ່ມີທ່າແຮງ.
- ການປະກັນໄພ: ກວມເອົາຄວາມສ່ຽງຈາກໄພພິບັດທໍາມະຊາດ, ການປ່ຽນແປງຂອງສະພາບດິນຟ້າອາກາດ ແລະ ຄວາມສ່ຽງທາງດ້ານການເມືອງ
ນາຍົກລັດຖະມົນຕີ Albanese ກ່າວວ່າ “ອະນາຄົດດ້ານເສດຖະກິດຂອງ ອອສເຕຣເລຍ ແມ່ນຢູ່ໃນພູມິພາກນີ້. ການສ້າງກອງທຶນ SEAIFF ສະແດງໃຫ້ເຫັນເຖິງຄວາມມຸ່ງໝັ້ນຂອງອອສເຕຣເລຍ ໃນການເພີ່ມທະວີການພົວພັນດ້ານການຄ້າ ແລະ ການລົງທຶນກັບອາຊຽນເພື່ອສ້າງຄວາມຈະເລີນຮຸ່ງເຮືອງຮ່ວມກັນ”
ສຳນັກງານນາຍົກລັດຖະມົນຕີ ອອສເຕຣເລຍ ໄດ້ອະທິບາຍເຖິງການພົວພັນດ້ານເສດຖະກິດຂອງອອສເຕຣເລຍກັບອາຊຽນວ່າ: ໃນປີ 2022, ການລົງທຶນໃນສອງທາງລະຫວ່າງອອສເຕຣເລຍ ແລະ ອາຊຽນ ມີມູນຄ່າ 307 ຕື້ໂດລາອອສເຕຣເລຍ. ການຄ້າສອງທາງກັບອາຊຽນມີມູນຄ່າ 178 ຕື້ໂດລາອອສເຕຣເລຍ ແລະ ກວມເອົາ 15% ຂອງການຄ້າທັງໝົດຂອງອອສເຕຣເລຍ. ເຊິ່ງນີ້ແມ່ນຫຼາຍກ່ວາການຄ້າຂອງອອສເຕຣເລຍກັບຍີ່ປຸ່ນ ຫຼື ກັບສະຫະລັດ.
ນອກເໜືອໄປຈາກກອງທຶນ SEAIFF ຍັງມີ:
- ເງິນທຶນ 140 ລ້ານໂດລາອອສເຕຣເລຍ ທີ່ສະໜັບສະໜູນໂຄງການກໍ່ສ້າງພື້ນຖານໃນອາຊຽນເປັນເວລາ 4 ປີ.
- ໂຄງການເຕັກໂນໂລຊີ “Landing Pads” ຢູ່ ຈາກາຕາ ແລະ ນະຄອນ ໂຮ່ຈິມິນ ທີ່ສະໜັບສະໜູນທຸລະກິດອອສເຕຣເລຍສົ່ງອອກການບໍລິການດ້ານເຕັກໂນໂລຢີ
- ຂະຫຍາຍເວລາໃນການພັກເຊົາຢູ່ໃນອອສເຕຣເລຍຈາກ 3 ປີເປັນ 5 ປີສໍາລັບວີຊາເຈລະຈາທຸລະກິດ.
- ຂະຫຍາຍການເຂົ້າເຖິງວີຊາ Frequent Traveller stream ໄລຍະ 10 ປີໃຫ້ແກ່ພົນລະເມືອງຂອງ Timor-Leste.
“ຄວາມລິເລີ່ມເຫຼົ່ານີ້ສະແດງເຖິງການລົງເພິ່ມເຕີມໃນອະນາຄົດຂອງພວກເຮົາ ແລະ ຮັບປະກັນວ່າພວກເຮົາເຮັດວຽກຮ່ວມກັບອາຊີຕາເວັນອອກສຽງໃຕ້. ໃນຂະນະທີ່ ອາຊີຕາເວັນອອກສຽງໃຕ້ຍັງຄົງມີການຂະຫຍາຍຕົວຢ່າງຕໍ່ເນື່ອງ ທັງດ້ານຂະໜາດຂອງເສດຖະກິດ ແລະ ການເຂົ້າເຖິງຕະຫຼາດ
ເມື່ອພູມິພາກຂອງພວກເຮົາຈະເລີນຮຸ່ງເຮືອງ ອອສເຕຣເລຍກໍຈະມີຄວາມຈະເລີນຮຸ່ງເຮືອງຕາມ” ນາຍົກລັດຖະມົນຕີອອສເຕຣເລຍກ່າວ.
ທີ່ມາ:
ຕິດຕາມຂ່າວທັງໝົດຈາກ LaoX: https://laox.la/all-posts/
