ໜີ້ສິນທົ່ວໂລກໄດ້ເພີ່ມຂຶ້ນເຖິງລະດັບສູງສຸດຕະຫຼອດການ (All-Time High) ທີ່ 313 ພັນຕື້ໂດລາ ແລະ ຈາກການສຶກສາໄດ້ພົບເຫັນວ່າຫຼາຍປະເທດມີຄວາມສ່ຽງທີ່ຈະບໍ່ສາມາດຊໍາລະໜີ້ໄດ້.
ອີງຈາກການລາຍງານຂອງສຳນັກຂ່າວຕ່າງປະເທດໄດ້ລະບຸວ່າ ສະຖາບັນການເງິນສາກົນ (IIF) ກ່າວວ່າໜີ້ສິນທົ່ວໂລກເພີ່ມຂຶ້ນ 15 ພັນຕື້ໂດລາລະຫວ່າງໄຕມາດທີ 4 ປີ 2022 ເຖິງໄຕມາດທີ 4 ປີ 2023. ແລະເມື່ອເບິ່ງກັບຄືນໃນໄລຍະ 10 ປີທີ່ຜ່ານມາກໍພົບວ່າໜີ້ສິນທົ່ວໂລກໄດ້ເພີ່ມຂຶ້ນເປັນ 210 ພັນຕື້ໂດລາ.
IIF ກ່າວວ່າ 55% ຂອງການເພີ່ມຂຶ້ນແມ່ນມາຈາກ “ຕະຫຼາດທີ່ອິ່ມຕົວ” ເຊິ່ງນໍາໂດຍສະຫະລັດ, ຝຣັ່ງ ແລະ ເຢຍລະມັນ.
ເຖິງແມ່ນວ່າບັນດາປະເທດທີ່ພັດທະນາແລ້ວຈະເຮັດໃຫ້ອັດຕາສ່ວນໜີ້ສິນຕໍ່ GDP ຂອງໂລກຫຼຸດລົງ 2% ໃນປີກາຍນີ້, ແຕ່ການສຶກສາກໍໄດ້ລະບຸວ່າ ຍັງມີອີກຫຼາຍປະເທດທີ່ເລີ່ມຈະສົ່ງສັນຍານບໍ່ດີອອກມາ.
“ຕະຫຼາດທີ່ເກີດໃໝ່ບາງແຫ່ງມີປະລິມານໜີ້ສິນເພິ່ມຂຶ້ນບັນລຸລະດັບສູງສຸດໃໝ່, ເຊິ່ງນີ້ຊີ້ໃຫ້ເຫັນເຖິງຄວາມສາມາດໃນການຊໍາລະໜີ້ຂອງປະເທດ.
ອິນເດຍ, ອາເຈນຕິນາ, ຈີນ, ຣັດເຊຍ, ມາເລເຊຍ ແລະ ອາຟຣິກາໃຕ້ມີໜີ້ສິນເພີ່ມຂຶ້ນຫຼາຍທີ່ສຸດ. ເຊິ່ງນີ້ເປັນສັນຍານທີ່ຈະສະແດງໃຫ້ເຫັນເຖິງການຜິດນັດໃນການຊຳລະໜີ້ເພີ່ມຂຶ້ນ”
ການຂາຍໜີ້ສິນໃນຕະຫຼາດທີ່ເກີດໃໝ່ກຳລັງເພີ່ມຂຶ້ນ ແລະ ໄດ້ບັນລຸເປັນສະຖິຕິສູງສຸດ 47 ຕື້ໂດລາໃນເດືອນມັງກອນຂອງປີນີ້.
IIF ເຊື່ອວ່າການເພີ່ມຂຶ້ນຂອງໜີ້ສິນເຫຼົ່ານີ້ແມ່ນມາຈາກການກູ້ຢືມ ແລະ ການລົງທຶນໃນຢູໂຣບ ແລະ ໃນກຸ່ມບໍລິສັດທີ່ບໍ່ແມ່ນຂະແໜງການເງິນໂດຍກົງ.
ນອກຈາກນີ້, IIF ຍັງໄດ້ເຕືອນວ່າອີກວ່າ ຄວາມເຄັ່ງຕຶງທາງດ້ານການເມືອງໃນທົ່ວໂລກກໍາລັງສົ່ງຜົນກະທົບຕໍ່ໂຄງສ້າງຕະຫຼາດ. ໂດຍລັດຖະບານຍັງມີການຂາດດຸນສູງກວ່າໄລຍະກ່ອນການເກີດໂຣກລະບາດ.
ທີ່ມາ:
ຕິດຕາມຂ່າວທັງໝົດຈາກ LaoX: https://laox.la/all-posts/
