ລາວ-ເກົາຫຼີ ຈັບມືສຶກສາໂຄງການ “ຟາມໝູອັດສະລິຍະພະລັງງານແສງຕາເວັນ” ມຸ່ງຫຼຸດຕົ້ນທຶນ ແລະ ຊຸກຍູ້ກະສິກຳສີຂຽວ
ສປປ ລາວ ແລະ ສ.ເກົາຫຼີ ພວມຮ່ວມກັນສຶກສາຄວາມເປັນໄປໄດ້ໃນການສ້າງໂຄງການ “ຟາມໝູອັດສະລິຍະພະລັງງານແສງຕາເວັນ” ຢູ່ແຂວງອຸດົມໄຊ ເຊິ່ງເປັນການປະສົມປະສານລະຫວ່າງການລ້ຽງສັດແບບທັນສະໄໝ ເຂົ້າກັບການນຳໃຊ້ພະລັງງານສະອາດຈາກໂຊລາເຊວ ແລະ ລະບົບກັກເກັບດ້ວຍແບັດເຕີຣີ, ຕັ້ງເປົ້າເພື່ອແກ້ໄຂບັນຫາຄວາມໝັ້ນຄົງດ້ານພະລັງງານໃນຟາມ, ຫຼຸດຜ່ອນຕົ້ນທຶນການຜະລິດໃນໄລຍະຍາວ, ຍົກລະດັບຄຸນນະພາບສັດລ້ຽງ ພ້ອມທັງຊຸກຍູ້ການຫັນໄປສູ່ຮູບແບບກະສິກຳສີຂຽວທີ່ຍືນຍົງ ແລະ ຫວັງສ້າງເປັນໂຄງການຕົ້ນແບບຂອງປະເທດໃນອະນາຄົດ.
ນ ສະຖາບັນນິເວດວິທະຍາ ແລະ ເຕັກໂນໂລຊີ ຊີວະພາບ ກະຊວງກະສິກຳ ແລະ ສິ່ງແວດລ້ອມ ແລະ ບໍລິສັດ ລູມິເທັກ ຈາກ ສ.ເກົາຫຼີ ໄດ້ລົງນາມໃນບົດບັນທຶກຄວາມເຂົ້າໃຈ ທີ່ນະຄອນຫຼວງວຽງຈັນ ໃນວັນທີ 9 ຕຸລາ ເພື່ອດຳເນີນການສຶກສາຄວາມເປັນໄປໄດ້ເບື້ອງຕົ້ນສຳລັບໂຄງການດັ່ງກ່າວ. ຂ່າວສານກະຊວງກະສິກຳ ແລະ ສິ່ງແວດລ້ອມ ລາຍງານ.
ແຜນການດັ່ງກ່າວລວມມີ ລະບົບຜະລິດໄຟຟ້າພະລັງງານແສງຕາເວັນຂະໜາດ 1 ເມກາວັດ ແລະ ລະບົບກັກເກັບພະລັງງານດ້ວຍແບັດເຕີຣີ ທີ່ມີຄວາມຈຸ 2,5 ເມກາວັດ. ການສຶກສາຈະປະເມີນເຖິງຄວາມຕ້ອງການທາງດ້ານເຕັກນິກ, ຕົ້ນທຶນ ແລະ ຄວາມເປັນໄປໄດ້ທາງດ້ານການເງິນ ໃນການເຊື່ອມໂຍງລະບົບພະລັງງານເຂົ້າກັບຟາມ.
ໄຟຟ້າທີ່ໝັ້ນຄົງແມ່ນສິ່ງຈຳເປັນສຳລັບການລ້ຽງໝູແບບທັນສະໄໝ ເຊິ່ງລະບົບລະບາຍອາກາດ, ການທຳຄວາມເຢັນ, ການສະໜອງນ້ຳ ແລະ ອຸປະກອນອື່ນໆ ຕ້ອງເຮັດວຽກຢ່າງຕໍ່ເນື່ອງ ເພື່ອຮັກສາສະພາບແວດລ້ອມທີ່ເໝາະສົມສຳລັບສັດລ້ຽງ. ການປະສົມປະສານພະລັງງານແສງຕາເວັນເຂົ້າກັບການກັກເກັບພະລັງງານດ້ວຍແບັດເຕີຣີ ຈະຊ່ວຍໃຫ້ໂຄງການຟາມດັ່ງກ່າວສາມາດຄຸ້ມຄອງການສະໜອງພະລັງງານໄດ້, ເຖິງແມ່ນວ່າການປະຢັດ ແລະ ສັດສ່ວນຂອງໄຟຟ້າທີ່ຈະໄດ້ຮັບຈາກພະລັງງານແສງຕາເວັນນັ້ນຍັງບໍ່ທັນໄດ້ກຳນົດຊັດເຈນກໍຕາມ.
ການສຶກສາດັ່ງກ່າວ ຈະຄົ້ນຄວ້າຮູບແບບເຕັກນິກທີ່ເໝາະສົມສຳລັບແຜງໂຊລາເຊວ, ການກັກເກັບດ້ວຍແບັດເຕີຣີ ແລະ ສິ່ງອຳນວຍຄວາມສະດວກອື່ນໆ. ນອກຈາກນີ້ຍັງຈະປະເມີນການລົງທຶນເບື້ອງຕົ້ນ ແລະ ຕົ້ນທຶນການດຳເນີນງານ, ປະເມີນຄວາມເປັນໄປໄດ້ທາງດ້ານເສດຖະກິດຂອງໂຄງການ ແລະ ກຳນົດຮູບແບບການຈັດຫາທຶນທີ່ເໝາະສົມ.
ຜົນຂອງການສຶກສາຈະຖືກນຳໄປໃຊ້ເພື່ອສ້າງບົດສະເໜີໂຄງການ ເພື່ອຍື່ນສະເໜີຕໍ່ແຫຼ່ງທຶນໃນ ສ.ເກົາຫຼີ. ການອະນຸມັດທຶນ ແລະ ການພັດທະນາໂຄງການໃນອະນາຄົດແມ່ນຈະຂຶ້ນກັບຜົນຂອງການສຶກສາ ແລະ ການຕັດສິນໃຈໃນຂັ້ນຕໍ່ໄປ.
ພາກສ່ວນທີ່ກ່ຽວຂ້ອງຍັງມີຈຸດປະສົງທີ່ຈະຊອກຫາວິທີການໃນການສ້າງໂຄງການທົດລອງ ແລະ ພັດທະນາມັນໃຫ້ກາຍເປັນຮູບແບບສາທິດ ເຊິ່ງສາມາດຂະຫຍາຍຜົນໄດ້ໃນອະນາຄົດ ຖ້າຫາກພິສູດໄດ້ວ່າມີຄວາມເປັນໄປໄດ້ທາງດ້ານເຕັກນິກ ແລະ ເສດຖະກິດ.
ບົດບັນທຶກດັ່ງກ່າວໄດ້ລົງນາມຕາງໜ້າສະຖາບັນເຕັກໂນໂລຊີຊີວະພາບ ແລະ ນິເວດວິທະຍາ ໂດຍ ທ່ານ ສີປະໄພ ໄຊສົງຄາມ ແລະ ທ່ານ ເທວະລັກ ພອນແກ້ວ ແລະ ຝ່າຍ ສ. ເກົາຫຼີ ໂດຍແມ່ນທ່ານ ອິນບູມ ຊິນ ແລະ ຮ່ວມເປັນສັກຂີພະຍານໃນພິທີໂດຍ ທ່ານ ປອ. ນ. ຈັນທະຄອນ ບົວລະພັນ ຮອງລັດຖະມົນຕີ ກະຊວງກະສິກຳ ແລະ ສິ່ງແວດລ້ອມ ພ້ອມດ້ວຍບັນດາທ່ານແຂກທີ່ຖືກເຊີນ.
ພິທີລົງນາມໃນຄັ້ງນີ້ໄດ້ຮັບກຽດເຂົ້າຮ່ວມເປັນສັກຂີພິຍານໂດຍ ດຣ ຈັນທະກອນ ບົວລະພັນ, ຮອງລັດຖະມົນຕີກະຊວງກະສິກຳ ແລະ ສິ່ງແວດລ້ອມ ພ້ອມດ້ວຍຜູ້ຕາງໜ້າຈາກກົມ, ສະຖາບັນ, ບໍລິສັດ ແລະ ພະນັກງານເຕັກນິກທີ່ກ່ຽວຂ້ອງຂອງທັງສອງຝ່າຍ.
ການສຶກສາຄັ້ງນີ້ຖືເປັນບາດກ້າວເບື້ອງຕົ້ນໃນການປະເມີນວ່າ ໂຄງການລ້ຽງສັດທີ່ປະສົມປະສານກັບພະລັງງານທົດແທນ ຈະສາມາດເປັນຮູບແບບທີ່ເໝາະສົມສຳລັບການພັດທະນາກະສິກຳໃນລາວໄດ້ຫຼືບໍ່. ທັງສອງຝ່າຍຍັງບໍ່ທັນໄດ້ປະກາດກຳລັງການຜະລິດຂອງຟາມ, ມູນຄ່າການລົງທຶນທັງໝົດ ຫຼື ກຳນົດເວລາໃນການກໍ່ສ້າງເທື່ອ.
#LaoXperts #Laos #Oudomxay #SmartFarming #SolarEnergy #RenewableEnergy #PigFarm #ລາວ #ອຸດົມໄຊ #ຟາມໝູອັດສະລິຍະ #ພະລັງງານແສງຕາເວັນ #ກະສິກຳທັນສະໄໝ #ພະລັງງານທົດແທນ
