ເງິນເຢນ ແມ່ນໜຶ່ງໃນຫ້າສະກຸນເງິນສຳຮອງຫຼັກຂອງໂລກ ໄດ້ມີການສືບຕໍ່ຫຼຸດລົງ, ໂດຍມີສາເຫດຫຼັກໆມາຈາກນະໂຍບາຍການເງິນທີ່ຜ່ອນຄາຍຂອງທະນາຄານກາງຍີ່ປຸ່ນ (BOJ).
ບໍລິສັດ Metaplanet ທີ່ລົງທະບຽນຢູ່ໃນຕະຫຼາດຫຼັກຊັບໂຕກຽວໄດ້ຮອງຮັບເອົາ Bitcoin (BTC) ມາໃຊ້ເປັນສິນຊັບສຳຮອງໃນເຊີງກົນລະຍຸດເພື່ອປ້ອງກັນພາລະໜີ້ສິນຂອງຍີ່ປຸ່ນ ແລະ ຄວາມຜັນຜວນຂອງເງິນເຢນ.
“Metaplanet ປະກາດການຮັບຮອງເອົາ Bitcoin ເປັນສິນຊັບສຳຮອງທ່າມກາງການອ່ອນຄ່າລົງຂອງເງິນເຢນ. ການຕັດສິນໃຈໃນຄັ້ງນີ້ແມ່ນການຕອບໂຕ້ໂດຍກົງຕໍ່ຄວາມກົດດັນດ້ານເສດຖະກິດໃນຍີ່ປຸ່ນຢ່າງຕໍ່ເນື່ອງ. ໂດຍສະເພາະໜີ້ສິນຂອງລັດຖະບານທີ່ຢູ່ໃນລະດັບສູງ, ພາວະອັດຕາດອກເບ້ຍທີ່ແທ້ຈິງຕິດລົບຢ່າງຕໍ່ເນື່ອງ ແລະ ເງິນເຢນອ່ອນຄ່າ” ບໍລິສັດກ່າວໃນຖະແຫຼງການຂ່າວໃນວັນຈັນ.
ນັບຕັ້ງແຕ່ເດືອນເມສາທີ່ຜ່ານມາ, Metaplanet ໄດ້ຊື້ໄປແລ້ວ 117.7 BTC (ມູນຄ່າ 7.19 ລ້ານໂດລາ) ໂດຍປະຕິບັດຕາມກົນລະຍຸດຂອງ MicroStrategy (MSTR) ບໍລິສັດທີ່ຈົດທະບຽນໃນສະຫະລັດທີ່ໄດ້ຊື້ Bitcoin ຫຼາຍຕື້ໂດລາ (ອີງຂໍ້ມູນຈາກ Bitcointreasuries.net), Metaplanet ປັດຈຸບັນໄດ້ຖອນຕົວອອກຈາກການມີສ່ວນຮ່ວມທັງໝົດໃນ Web3 ແລະ ປັດຈຸບັນໄດ້ສຸມໃສ່ Bitcoin ຢ່າງດຽວ. ຄຽງຄູ່ກັບການລົງທຶນໃນອະສັງຫາລິມະຊັບການຄ້າ.
ການເຄື່ອນໄຫວໃນຄັ້ງນີ້ແມ່ນມີຄວາມໂດດເດັ່ນໂດຍສະເພາະ. ເນື່ອງຈາກວ່າມັນເກີດຂຶ້ນໃນເວລາທີ່ວິກິດການດ້ານການເງິນຂອງຍີ່ປຸ່ນໄດ້ຮັບຜົນກະທົບຕໍ່ຕະຫຼາດເງິນຕາ. ຜູ້ສະໜັບສະໜູນ Cryptocurrency ຕ່າງກໍຍ້ອງຍໍ Bitcoin ມາເປັນເວລາດົນນານໃນຖານະທີ່ເປັນສິນຊັບທີ່ປ້ອງກັນຄວາມສ່ຽງຈາກຄວາມປະໝາດທາງການຄັງ ແລະ ການເງິນ.
ອີງຕາມກອງທຶນການເງິນສາກົນ ອັດຕາໜີ້ສິນຕໍ່ຍອດຜະລິດຕະພັນພາຍໃນ (GDP) ຂອງຍີ່ປຸ່ນແມ່ນຫຼາຍກວ່າ 254%, ສູງທີ່ສຸດໃນບັນດາປະເທດທີ່ພັດທະນາແລ້ວ. ໃນຂະນະນັ້ນ, ອັດຕາສ່ວນໜີ້ສິນຕໍ່ຜະລິດຕະພັນພາຍໃນປະເທດ (GDP) ຂອງສະຫະລັດແມ່ນຫຼາຍກວ່າ 123%.
![](https://laox.la/wp-content/uploads/2024/05/image-4.png)
ໜີ້ສິນທີ່ສູງກວ່າປະເທດອື່ນໆນີ້ ເຮັດໃຫ້ທະນາຄານກາງຍີ່ປຸ່ນ (BOJ) ບໍ່ສາມາດເພີ່ມອັດຕາດອກເບ້ຍທີ່ສອດຄ່ອງກັບທະນາຄານກາງສະຫະລັດ (Fed) ແລະທະນາຄານກາງທີ່ສໍາຄັນອື່ນໆໄດ້.
ໃນຂະນະທີ່ Fed ໄດ້ເພີ່ມອັດຕາດອກເບ້ຍຫຼາຍກວ່າ 5% ນັບຕັ້ງແຕ່ຕົ້ນປີ 2022, ອັດຕາດອກເບ້ຍມາດຕະຖານສໍາລັບການກູ້ຢືມໃນປະເທດຍີ່ປຸ່ນຍັງຄົງຢູ່ໃກ້ກັບສູນ, ສົ່ງຜົນໃຫ້ເງິນເຢນເຊິ່ງເປັນໜຶ່ງໃນ 5 ສະກຸນເງິນສຳຮອງຫຼັກຂອງໂລກໄດ້ອ່ອນຄ່າລົງຢ່າງຫຼວງຫຼາຍ. ຄວາມແຕກຕ່າງຂອງອັດຕາດອກເບ້ຍສົ່ງຜົນກະທົບອັນໃຫຍ່ຫຼວງຕໍ່ອັດຕາແລກປ່ຽນເງິນຕາ.
ຂໍ້ມູນຈາກແພລັດຟອມການວິເຄາະ TradingView ສະແດງໃຫ້ເຫັນວ່າ ເງິນເຢນຍີ່ປຸ່ນອ່ອນຄ່າລົງ 50% ເມື່ອທຽບໃສ່ເງິນໂດລາສະຫະລັດ. ນັບຕັ້ງແຕ່ຕົ້ນປີ 2021, ໂດຍຫຼ້າສຸດເງິນເຢນໄດ້ຫຼຸດລົງຕໍ່າກວ່າ 155 ຕໍ່ 1 ໂດລາສະຫະລັດ ແຕະລະດັບຕໍ່າສຸດໃນຮອບ 34 ປີ. ນອກຈາກນີ້ຍັງມີລາຍງານວ່າ ທະນາຄານກາງຍີ່ປຸ່ນ (BOJ) ໄດ້ເທຂາຍເງິນໂດລາເພື່ອຊຸກຍູ້ໃຫ້ລາຄາເງິນເຢນສູງຂຶ້ນ. ເຊິ່ງແມ່ນການແຊກແຊງຕະຫຼາດສະກຸນເງິນແບບ classic.
ບໍລິສັດວາງແຜນທີ່ຈະຖື Bitcoin ໃນໄລຍະຍາວເພື່ອຮັບປະກັນຜົນກໍາໄລທີ່ຕ້ອງເສຍພາສີໜ້ອຍທີ່ສຸດ ແລະ ການຊື້ Bitcoin ເພີ່ມເຕີມອີກ ໂດຍການອອກຕາສານໜິ້ໃນໄລຍະຍາວເມື່ອມີໂອກາດ.
ທີ່ມາ:
ຕິດຕາມຂ່າວທັງໝົດຈາກ LaoX: https://laox.la/all-posts/