ທ່ານ ນາງ ວາລີ ເວດສະພົງ ສສຊ ປະຈຳ ເຂດເລືອກຕັ້ງທີ 1 ນະຄອນຫຼວງວຽງຈັນ ສະເໜີຢູ່ ກອງປະຊຸມສະໄໝສາມັນ ເທື່ອທີ 4 ຂອງສະພາແຫ່ງຊາດ ຊຸດທີ IX ໃນວັນທີ 7 ທັນວາ 2022 ໃຫ້ແກ້ໄຂບັນຫາການເບີກຈ່າຍເງິນເດືອນທີ່ຊັກຊ້າ ເຊິ່ງ ທ່ານ ນາງ ວາລີ ໄດ້ປະກອບຄໍາຄິດເຫັນ ແລະ ສະເໜີ ໃນກອງປະຊຸມວ່າ: ເງິນເດືອນພະນັກງານບໍ່ແມ່ນແນວຕິດໜີ້ ເດືອນໜຶ່ງຕ້ອງໄດ້ເບີກເງິນ ເຖິງຈະມີຄວາມຫຍຸ້ງຍາກພຽງໃດກໍຕາມ ຢາກສະເໜີໃຫ້ກະຊວງການເງິນຫາວິທີແກ້ໄຂ ເພາະບາງຄົນກໍຖ້າກິນແຕ່ເງິນເດືອນ ບາງຄົນບໍ່ໄດ້ຮອດ 3 ເດືອນ ເຂົາເຈົ້າຈະຢູ່ແນວໃດ ບັນຫານີ້ຍາກພຽງໃດກໍຕ້ອງແກ້ ແລະ ບໍ່ຄວນມີອີກ.
![ທ່ານ ນາງ ວາລີ](https://laox.la/wp-content/uploads/2022/12/efbb0864-8636-4769-a05a-5b02c3afa2d5.jpg)
ທ່ານ ບຸນໂຈມ ອຸບົນປະເສີດ ລັດຖະມົນຕີ ກະຊວງການເງິນ ກໍໄດ້ຕໍ່ຄຳສະເໜີຂອງ ສສຊ ຢູ່ ກອງປະຊຸມສະໄໝສາມັນ ເທື່ອທີ 4 ຂອງສະພາແຫ່ງຊາດ ຊຸດທີ IX ໃນວັນທີ 7 ທັນວາ 2022 ວ່າ: ສຳລັບຂັ້ນຕອນການເບີກເງິນເດືອນ ຈະບໍ່ໃຫ້ມີ 24 ລາຍເຊັນ ສະເພາະເງິນເດືອນລັດຖະມົນຕີກະຊວງທີ່ກ່ຽວຂ້ອງເຈົ້າແຂວງເຊັນແມ່ນສາມາດປະຕິບັດໄດ້ເລີຍ ທີ່ຜ່ານມາແມ່ນຜ່ານເຖິງ 24 ລາຍເຊັນ ຈຶ່ງຜ່ານການອະນຸມັດແບບຄົບຖ້ວນ ເຮັດໃຫ້ມີການຊັກຊ້າໃນການຈ່າຍເງິນເດືອນ ແຕ່ລະປີໃນເດືອນມັງກອນ ແມ່ນໄດ້ຂໍຢືມລ່ວງໜ້າໃນແຕ່ລະແຂວງ ທຸກກະຊວງບໍ່ສາມາດປະຕິບັດແຜນລາຍຈ່າຍ. ຕໍ່ໄປຈະໃຫ້ລັດຖະມົນຕີເຊັນແມ່ນສຳເລັດ ບໍ່ຈຳເປັນຕ້ອງຮອດ 24 ລາຍເຊັນ ຄືທີ່ຜ່ານມາ, ສ່ວນເງິນເດືອນທີ່ຢູ່ຫ່າງໄກສອກຫຼີກ ກະຊວງການເງິນກໍໄດ້ຄົ້ນຄວ້າແລ້ວ ເຖິງຈະບໍ່ມາເອົາເງິນກໍຕາມ ທາງກະຊວງຈະເປີດບັນຊີເງິນຝາກໄວ້ ເມື່ອຮອດມື້ແລ້ວຈະເອົາເງິນຝາກບັນຊີໄວ້ ບໍ່ມາຖອນກໍບໍ່ໃຫ້ມາຕິລັດຖະບານອີກ.
ຂອບໃຈຂໍ້ມູນຈາກ:
ຕິດຕາມຂ່າວທັງໝົດຈາກ LaoX: https://laox.la/all-posts/