ໃນວັນທີ 5 ມັງກອນທີ່ຜ່ານມາ, ສຳນັກຂ່າວຕ່າງປະເທດໄດ້ມີການລາຍງານວ່າ ກຸ່ມວິສາຫະກິດ Zhongzhi (Zhongzhi Enterprise Group) ເຊິ່ງເປັນທະນາຄານເງົາທີ່ສໍາຄັນຂອງຈີນໄດ້ຍື່ນຂໍສຳລັບການລົ້ມລະລາຍ ຫຼັງຈາກທີ່ບໍ່ສາມາດຊໍາລະໜີ້ສິນໄດ້, ເນື່ອງຈາກບໍລິສັດບໍ່ສາມາດຕໍ່ສູ້ກັບການຖົດຖອຍໃນຕະຫຼາດອະສັງຫາລິມະສັບທີ່ໄດ້ທະວີຄວາມຮຸນເເຮງຂຶ້ນ.
ທະນາຄານເງົາ (Shadow Bank) ແມ່ນຕົວກາງທີ່ເຮັດໜ້າທີ່ຄ້າຍຄືກັນກັບທະນາຄານ. ໂດຍພວກເຂົາຮັບເງິນຝາກຈາກລູກຄ້າ ແລະ ໃຫ້ກູ້ຢືມໃນຮູບແບບຂອງຕາສານໜີ້ (ພັນທະບັດ) ຫຼື ຕາສານຮຸ້ນ (ຮຸ້ນ) ແລະ ໃຫ້ຜົນຕອບແທນທີ່ສູງກວ່າການຝາກເງິນກັບທະນາຄານ.
ໃນເດືອນພະຈິກຂອງປີທີ່ຜ່ານມາ, ເຈົ້າໜ້າທີ່ຈີນໄດ້ເປີດເຜີຍວ່າເຂົາເຈົ້າໄດ້ເລີ່ມຕົ້ນການສືບສວນທາງອາຍາຕໍ່ກັບທຸລະກິດການບໍລິຫານເງິນຂອງ Zhongzhi , ກ່ອນທີ່ບໍລິສັດຈະເປີດເຜີຍງົບດຸນທີ່ຂາດສະພາບຄ່ອງຫຼາຍເຖິງ 36,4 ຕື້ໂດລາ. ເຊິ່ງກ່ອນໜ້ານີ້ໄດ້ມີລາຍງານໂດຍອ້າງອີງຈາກເອກະສານລັບຂອງທາງການຈີນວ່າ Zhongzhi ມີໂອກາດທີ່ຈະລົ້ມລາຍສູງ ເນື່ອງຈາກປະລິມານໜີ້ສິນສູງກວ່າສິນຊັບທີ່ມີຢູ່ເຖິງສອງເທົ່າ (ບໍລິສັດມີໜີ້ສິນປະມານ 420-460 ຕື້ຢວນ)
Zhongzhi Enterprise Group ເປັນໜື່ງໃນບໍລິສັດທະນາຄານເງົາທີ່ໃຫຍ່ທີ່ສຸດຂອງຈີນ, ໃນ 2 – 3 ປີທີ່ຜ່ານມາ Zhongzhi ແລະ ບໍລິສັດໃນເຄືອໄດ້ຂະຫຍາຍສິນເຊື່ອການໃຫ້ກູ້ຢືມແກ່ຜູ້ພັດທະນາອະສັງຫາລິມະຊັບທີ່ປະສົບກັບຄວາມຫຍຸ້ງຍາກ, ລວມທັງກຸ່ມບໍລິສັດ China Evergrande ເຊິ່ງເປັນຜູ້ພັດທະນາອະສັງຫາລິມະຊັບທີ່ໃຫຍ່ທີ່ສຸດຂອງຈີນ.
ການຂະຫຍາຍສິນເຊື່ອໃຫ້ແກ່ຜູ້ພັດທະນາອະສັງຫາລິມະຊັບທີ່ປະສົບກັບຄວາມຫຍຸ້ງຍາກແມ່ນມີຄວາມສ່ຽງສູງ. ເນື່ອງຈາກຜູ້ພັດທະນາອະສັງຫາລິມະສັບເຫຼົ່ານີ້ກໍາລັງປະເຊີນກັບໜີ້ສິນທີ່ເພີ່ມຂຶ້ນ ແລະ ການຂາຍທີ່ຫຼຸດລົງ. ດັ່ງນັ້ນ, ເຂົາເຈົ້າບໍ່ສາມາດຊໍາລະໜີ້ໄດ້. ນອກຈາກນີ້ Zhongzhi ຍັງລົງທຶນໃນສິນຊັບທີ່ມີຄວາມສ່ຽງອື່ນໆເຊັ່ນ: ອະສັງຫາລິມະສັບທີ່ມີລາຄາສູງ ແລະ ຮຸ້ນຂອງບໍລິສັດທີ່ມີບັນຫາອີກອື່ນໆດ້ວຍ. ການລົງທຶນໃນຊັບສິນທີ່ມີຄວາມສ່ຽງເຫຼົ່ານີ້ເຮັດໃຫ້ Zhongzhi ມີຄວາມສ່ຽງທາງດ້ານການເງິນເພີ່ມຂຶ້ນຈົນນຳມາສູ່ການລົ້ມລະລາຍ.
ທີ່ມາ:
ຕິດຕາມຂ່າວທັງໝົດຈາກ LaoX: https://laox.la/all-posts/
