ໄລຍະນີ້ ຄົງເປັນໄລຍະທີ່ຫຼາຍໆຄົນກຳລັງໄປຂຶ້ນທະບຽນເລກໝາຍໂທລະສັບ 3 ແກຼັບ ເພາະວ່າ ພາຍຫຼັງວັນທີ 31 ທ້າຍເດືອນທັນວາທີ່ຈະມາເຖິງໄວໆນີ້ ເລກໝາຍໂທລະສັບໃດທີ່ຍັງບໍ່ໄດ້ຂຶ້ນທະບຽນຈະບໍ່ສາມາດນຳໃຊ້ໄດ້
ຈາກການແຈ້ງການ ຂອງກະຊວງໄປສະນີ, ໂທລະຄົມມະນາຄົມ ແລະ ການສື່ສານ ໃນວັນ 17 ມິຖຸນາທີ່ຜ່ານມາວ່າດ້ວຍເລື່ອງການທະບຽນໝາຍເລກໂທລະສັບ ແລະ ຊິມເນັດ ໃນທົ່ວປະເທດ ເຊິ່ງໄດ້ມີການປະຕິບັດຮັບລົງທະບຽນເລກໝາຍໂທລະສັບນັບແຕ່ນັ້ນເປັນຕົ້ນມາ ແຕ່ກໍຍັງຫຼາຍຄົນທີ່ຍັງສົງໄສຢູ່ວ່າ ຈະສາມາດລົງທະບຽນເບີໄດ້ແນວໃດ? ແລະ ການຂຶ້ນທະບຽນເບີລະບົບ 3 ແກຼັບ ມັນແມ່ນຫຍັງກັນແທ້?
ການຂຶ້ນທະບຽນເລກໝາຍໂທລະສັບ ປະເພດລາຍເດືອນ,ຕື່ມເງິນ ແລະ ຊິມເນັດ ທີ່ທ່ານກຳລັງໃຊ້ ຫຼື ຈະເປີດນຳໃຊ້ໃໝ່ ທ່ານສາມາດຂຶ້ນທະບຽນໄດ້ໂດຍຜ່ານ 2 ວິທີຄື:
ວີທີທີ 1: ສຳລັບເລກໝາຍເກົ່າທີ່ເປີດນຳໃຊ້ແລ້ວ ແລະ ເລກໝາຍທີ່ຈະເປີດນຳໃຊ້ໃໝ່ແມ່ນທ່ານສາມາດໄປຂຶ້ນທະບຽນຢູ່ຕາມສູນບໍລິການ, ສຳນັກງານໃຫຍ່, ຫ້ອງການສາຂາຂອງຜູ້ໃຫ້ບໍລິການ ແລະ ຕົວແທນຈຳໜ່າຍທີ່ໄດ້ຮັບອະນຸຍາດໃນຂອບເຂດທົ່ວປະເທດ ພຽງແຕ່ທ່ານນຳເອົາເລກໝາຍໂທລະສັບຂອງທ່ານ ແລະ ເອກະສານຢັ້ງຢືນໃດໜຶ່ງ ເຊັ່ນ: ບັດປະຈຳຕົວ, ໜັງສືຜ່ານແດນ (passport), ຫຼື ປຶ້ມສຳມະໂນຄົວ ທີ່ຍັງບໍ່ທັນໝົດອາຍຸມາຂຶ້ນທະບຽນ
ວິທີທີ 2: ວິທີນີ້ໃຊ້ສຳລັບໝາຍເລກເກົ່າທີ່ເປີດນຳໃຊ້ແລ້ວເທົ່ານັ້ນ ເຊິ່ງທ່ານສາມາດດຳເນີນການຂຶ້ນທະບຽນເລກໝາຍໂທລະສັບ ດ້ວຍຕົວຂອງທ່ານເອງອອນລາຍ ຜ່ານ 8 ຂັ້ນຕອນດັ່ງນີ້:
- ດາວໂຫຼດ ແລະຕິດຕັ້ງແອັບພລິເຄຊັນ Lao KYC
- ຂຶ້ນທະບຽນຜ່ານແອັບ 3 ແກຼັບ
- ເລືອກເຄືອຂ່າຍທີ່ທ່ານນຳໃຊ້
- ເລືອກປະເພດເອກະສານຢັ້ງຢືນຕົວຕົນໃດໜຶ່ງ
- ຖ່າຍຮູບໃບໜ້າຂອງເຈົ້າຂອງຊິມ
- ຖ່າຍຮູບເອກະສານຢັ້ງຢືນໂຕຕົນ
- ປ້ອນຂໍ້ມູນພື້ນຖານຂອງເຈົ້າຂອງຊິມ
- ສຳເລັດການຂຶ້ນທະບຽນຊິມ
ພຽງເທົ່ານີ້ ກໍສຳເລັດການຂຶ້ນທະບຽນເລກມໝາຍໂທລະສັບເປັນທີ່ຮຽນຮ້ອຍ ແລະ ຍັງກວດຜົນການຂຶ້ນເລກໝາຍໂທລະສັບໄດ້ດ້ວຍໂຕເອງຜ່ານທາງ USSD Code ພຽງແຕ່ກົດ **1021# ແລ້ວໂທອອກ
ແຕ່ມາຮອດນີ້ ບາງຄົນກໍອາດຈະຍັງສົງໄສວ່າ ເປັນຫຍັງຕ້ອງຄຳວ່າ “3 ແກຼັບ” , ແລະ ຄຳວ່າ “ແກຼັບ” ກ່ຽວຫຍັງກັບການຂຶ້ນທະບຽນເບີ ?
ທີ່ຈິງແລ້ວ 3 ແກຼັບແມ່ນລະບົບຂຶ້ນທະບຽນຢັ້ງຢືນຕົວຕົນໝາຍເລກໂທລະສັບຂອງ ສ.ປ.ປ ລາວ
ໂດຍທີ່ຄຳວ່າ ແກຼັບ ນັ້ນແມ່ນສຽງຖ່າຍຮູບ ມີທີ່ມາຈາກການຖ່າຍຮູບ 3 ຄັ້ງຄື:
ແກຼັບ 1 – ຖ່າຍຮູບເບີໂທ
ແກຼັບ 2 – ຖ່າຍຮູບຜູ້ໃຊ້
ແກຼັບ 3 – ຖ່າຍຮູບເອກະສານຢັ້ງຢືນຕົວຕົນ (ບັດປະຈຳໂຕ ຫຼື ພາດສະປໍ)
ເຊິ່ງ 3 ແກຼັບນີ້ ປຽບເປັນດັ່ງຄຳຂວັນປະຈຳການຂຶ້ນທະບຽນເບີທີ່ໝາຍເຖິງ ຂຶ້ນທະບຽນເລກໝາຍໂທລະສັບງ່າຍພຽງຖ່າຍ 3 ແກຼັບເທົ່ານັ້ນ. ມາຮອດນີ້ ອີກບໍ່ທໍ່ໃດເດືອນກໍຈະເຂົ້າສູ່ປີໃໝ່ແລ້ວ ຖ້າໃຜທີ່ຍັງບໍ່ທັນໄດ້ຂຶ້ນທະບຽນ ກໍຢ່າລືມໄປຂຶ້ນທະບຽນໄດ້ ງ່າຍໆພຽງ 3 ແກຼັບ ເທົ່ານັ້ນ.
ທີ່ມາ: https://www.simreg.gov.la/
