ອິນໂດເນເຊຍມຸ່ງໄປເຖິງຄວາມສຳເລັດໃນອຸດສາຫະກຳແບັດເຕີຣີ EV, ການລົງທຶນໂດຍກົງຈາກຕ່າງປະເທດ (FDI) ທີ່ເພີ່ມສູງຂຶ້ນ, ສະແດງໃຫ້ເຫັນເຖິງຄວາມສົດໃສດ້ານຂະແໜງການຜະລິດ.
ບົດລາຍງານຫຼ້າສຸດຈາກ JLL, ບໍລິສັດທີ່ປຶກສາດ້ານອະສັງຫາລິມະຊັບຊັ້ນນໍາ ແລະບໍລິການຄຸ້ມຄອງ ໄດ້ເປີດເຜີຍເຖິງການຂະຫຍາຍຕົວຢ່າງກ້າວກະໂດຂອງ FDI ໃນອຸດສາຫະກໍາການຜະລິດແບັດເຕີຣີ EV ຂອງອິນໂດເນເຊຍ, ດ້ວຍຕົວເລກ FDI ເພີ່ມຂຶ້ນຈາກໜ້ອຍກວ່າ 2 ຕື້ໂດລາຈົນໄປແຕະ 20 ຕື້ໂດລາສະຫະລັດໃນປີ 2023,
ໂດຍແຮງຈູງໃຈຕົ້ນຕໍແມ່ນມາຈາກນະໂຍບາຍສະໜັບສະໜູນຂອງລັດຖະບານ ຜ່ານມາດຕະການຫຼຸດຜ່ອນພາສີ ແລະ ຜົນປະໂຫຍດຕ່າງໆເພີ່ມເຕີມໃຫ້ກັບອຸດສາຫະກໍາແບັດເຕີຣີ EV, ພ້ອມກັບນະໂຍບາຍການເປີດເສລີໃຫ້ນັກລົງທຶນຕ່າງປະເທດສາມາດເປັນເຈົ້າຂອງກິດຈະການໄດ້ 100%.
ອິນໂດເນເຊຍມີທ່າແຮງອັນໃຫຍ່ຫຼວງໃນຖານະທີ່ເປັນຜູ້ຫຼິ້ນທີ່ສຳຄັນ ຂອງຫ່ວງໂສ້ອຸປະທານ EV ລະດັບໂລກດ້ວຍເຫດຜົນດັ່ງຕໍ່ໄປນີ້:
- ເປັນແຫຼ່ງຊັບພະຍາກອນທີ່ສໍາຄັນ: ອິນໂດເນເຊຍມີແຫຼ່ງ nickel ສຳຮອງຢູ່ໃນອັນດັບຕົ້່ນໆຂອງໂລກ, nickel ເປັນແຮ່ທາດທີ່ສຳຄັນໃນການຜະລິດແບດເຕີຣີ EV.
- ນະໂຍບາຍສະໜັບສະໜູນ: ລັດຖະບານໃຫ້ການສະໜັບສະໜູນທີ່ເຂັ້ມແຂງ. ມຸ່ງໄປເຖິງການຊຸກຍູ້ໃຫ້ປະເທດເປັນສູນກາງການຜະລິດ EV ໃນໂລກ.
- ແຮງງານ: ອິນໂດເນເຊຍມີປະຊາກອນ ແລະ ກຳລັງແຮງງານຂະໜາດໃຫຍ່.
ເຖິງຢ່າງໃດກໍຕາມ, ໂອກາດບໍ່ໄດ້ຈຳກັດຢູ່ພຽງອິນໂດເນເຊຍຢ່າງດຽວ ຍັງມີປະເທດອື່ນໆໃນເຂດອາຊີຕາເວັນອອກສຽງໃຕ້ ເຊັ່ນ: ຫວຽດນາມ, ໄທ, ຟີລິບປິນ, ມາເລເຊຍ, ສິງກະໂປ ແລະ ອິນເດຍ ເຊິ່ງຈະໄດ້ຮັບຜົນປະໂຫຍດຈາກການຍົກຍ້າຍຖານການຜະລິດໃນຄັ້ງນີ້ເຊັ່ນກັນ.
Michael Ignatiadis ຫົວໜ້າຝ່າຍກົນລະຍຸດການຜະລິດໃນອາຊີ-ປາຊີຟິກຂອງ JLL ເຫັນວ່າ ສ່ວນໜຶ່ງຂອງການດຶງດູດນັກລົງທຶນມາຈາກ ຄວາມຫຼາກຫຼາຍຂອງຄວາມສ່ຽງດ້ານຫ່ວງໂຊ້ອຸປະທານ, ພ້ອມກັບສັກກະຍາພາບຂອງພາກພື້ນທີ່ມີປະຊາກອນ ແລະ ກຳລັງແຮງງານຫຼາຍ, ຕົ້ນທຶນໃນການຜະລິດທີ່ເອື້ອອໍານວຍ ແລະ ຜົນປະໂຫຍດທີ່ຫນ້າສົນໃຈຕ່າງໆ.
ໃນດ້ານ Agus Kartasasmita, ລັດຖະມົນຕີກະຊວງອຸດສາຫະກຳອິນໂດເນເຊຍ ຄາດວ່າຈະຜະລິດລົດ EV ໃຫ້ໄດ້ 600.000 ຄັນໃນປີ 2030.
ນອກຈາກອຸດສາຫະກໍາລົດ ຍັງມີກຸ່ມທຶນເພີ່ມເຕີມຈາກຈີນທີ່ຄ່ອຍໆທະຍອຍເຂົ້າມາລົງທຶນໃນອຸດສາຫະກຳແຜ່ນແພ, ໂລຫະພື້ນຖານ, ເຄມີ, ການຢາ ແລະ ອາຫານອີກດ້ວຍ.
ທີ່ມາ:
ຕິດຕາມຂ່າວທັງໝົດຈາກ LaoX: https://laox.la/all-posts/
