ທ່ານ ສັນຕິພາບ ພົມວິຫານ ລັດຖະມົນຕີກະຊວງການເງິນ ໄດ້ລົງຢ້ຽມຢາມ ແລະ ຊຸກຍູ້ວຽກງານການຈັດຕັ້ງປະຕິບັດວຽກ ການຫັນເປັນທັນສະໄໝກ້າວເປັນດິຈິຕອລຂອງຂະແໜງການເງິນ ຢູ່ກົມເທັກໂນໂລຢີຂໍ້ມູນຂ່າວສານການເງິນ, ພ້ອມເນັ້ນໃຫ້ກົມດັ່ງກ່າວເອົາໃຈໃສ່ຄົ້ນຄວ້າ ເພື່ອໃຫ້ລະບົບຫັນເປັນທັນສະໄໝຂອງຂະແໜງການເງິນ ສາມາດຄຸ້ມຄອງລວມສູນ.
ການລົງຢ້ຽມຢາມຄັ້ງດັ່ງກ່າວ ມີຂຶ້ນໃນອາທິດທີ່ຜ່ານມາ ໂດຍການຕ້ອນຮັບຂອງທ່ານ ປອ ວິໄລທອງ ສຸດທະວີໄລ ຮັກສາການ ຫົວໜ້າກົມເທັກໂນໂລຢີ ຂໍ້ມູນຂ່າວສານການເງິນ ກະຊວງການເງິນ ຄະນະກົມ ຄະນະຫ້ອງການກະຊວງ ພະນັກງານວິຊາການ ໄດ້ເຂົ້າຮ່ວມ.
![ລັດຖະມົນຕີ](https://laox.la/wp-content/uploads/2023/02/image-256.png)
ໂອກາດດັ່ງກ່າວ ທ່ານ ປອ ວິໄລທອງ ສຸດທະວິໄລ ໄດ້ລາຍງານໂດຍສັງເຂບກ່ຽວກັບສະພາບການຈັດຕັ້ງປະຕິບັດວຽກງານຫັນເປັນທັນສະໄໝດິຈິຕອລ ຂອງຂະແໜງການເງິນພາກລັດໃນໄລຍະທີ່ຜ່ານມາ ແລະ ກົງຈັກການຈັດຕັ້ງ-ພາລະບົດບາດ ຂອງກົມ. ບັນດາລະບົບຄຸ້ມຄອງລາຍຮັບ-ລາຍຈ່າຍ ລະບົບພື້ນຖານໂຄງລ່າງເຄືອຂ່າຍ ແລະ ຄວາມປອດໄພ. ລະບົບຊໍາລະພາສີ-ອາກອນ ຄ່າທໍານຽມ ແລະ ຄ່າບໍລິການແບບລວມສູນ ຢູ່ລະບົບ FINLINK ລະບົບຖານຂໍ້ມູນໃຫຍ່ລວມສູນ ລະບົບຄຸ້ມຄອງພະນັກງານ ແລະ ຫ້ອງການ ການບໍາລຸງຮັກສາລະບົບ ແລະ ທິດທາງແຜນວຽກຈຸດສຸມ ທີ່ສຳຄັນຈະຕ້ອງໄດ້ຮີບຮ້ອນພັດທະນາໃນຕໍ່ໜ້າ, ພ້ອມທັງສະເໜີສ້າງຫ້ອງຄວບຄຸມລະບົບຄຸ້ມຄອງຕິດຕາມເຄືອຂ່າຍ NOC ແລະ ຄຸ້ມຄອງຕິດຕາມ ແຈ້ງເຕືອນຄວາມປອດໄພຂໍ້ມູນ SOC ຄຸ້ມຄອງລະບົບຖານຂໍ້ມູນໃຫຍ່ລວມສູນ Lao FIDA ແລະ ສາງເກັບມ້ຽນອຸປະກອນ ໄອທີສຳຮອງໄວ້ເພື່ອແກ້ໄຂບັນຫາອຸປະກອນຂັດຂ້ອງໃຫ້ທັນເວລາ.
![ລັດຖະມົນຕີ](https://laox.la/wp-content/uploads/2023/02/image-257.png)
ໂອກາດນີ້ ທ່ານ ສັນຕິພາບ ພົມວິຫານ ລັດຖະມົນຕີກະຊວງການງເງິນ ໄດ້ມີຄຳເຫັນໂອ້ລົມຊີ້ນຳ ກ່ຽວກັບການຈັດຕັ້ງປະຕິບັດວຽກ ການຫັນເປັນທັນສະໄໝກ້າວເປັນດິຈິຕອລ ຂອງຂະແໜງການເງິນ ເຊິ່ງປັດຈຸບັນກະຊວງການເງິນແມ່ນມີຫຼາຍລະບົບໃນການນນຳໃຊ້ຄຸ້ມຄອງລາຍຮັບ-ລາຍຈ່າຍ ໃຫ້ເອົາໃຈໃສ່ຄົ້ນຄວ້າ ເພື່ອໃຫ້ລະບົບຫັນເປັນທັນສະໄໝຂອງຂະແໜງການເງິນ ສາມາດຄຸ້ມຄອງລວມສູນ ເພື່ອອຳນວຍຄວາມສະດວກ ໃນການຄຸ້ມຄອງ ບໍາລຸງຮັກສາ ແລະ ຈັດຕັ້ງປະຕິບັດວຽກງານ ກ່ຽວກັບການລົດຜ່ອນຂັ້ນຕອນຂອດຂັ້ນ ໃນການແຈ້ງຊຳລະ ແລະ ສາມາດເຊື່ອມຕໍ່ກັບຂະແໜງການທີ່ກ່ຽວຂ້ອງ.
ພ້ອມນັ້ນ ໃຫ້ຄົ້ນຄວ້າພັດທະນາລະບົບ ຈັດເກັບລາຍຮັບຄ່າທຳນຽມ ແລະ ຄ່າບໍລິການ ຕາມລັດຖະບັນຍັດ ເຂົ້າລະບົບງົບປະມານ ເອົາໃຈໃສ່ປັບປຸງລະບົບພື້ນຖານໂຄງລ່າງເຄືອຂ່າຍໃຫ້ເປັນທັນສະໄໝ ກ້າວໄປສູ່ລະບົບ Cloud ແລະ ກຳນົດແຜນວຽກຈຸດສຸມລະອຽດ ການພັດທະນາລະບົບຫັນວຽກງານເປັນທັນສະໄໝ ຕ້ອງຄຳນຶງໃຫ້ສາມາດລົດຜ່ອນຂັ້ນຕອນ ສ້າງຄວາມສະດວກໃນການຈັດຕັ້ງປະຕິບັດວຽກງານວິຊາສະເພາະຂອງຂະແໜງການເງິນ ແລະ ກຳນົດໄລຍະເວລາ ການຈັດຕັ້ງປະຕິບັດ ສຳຫຼວດກວດຄືນ ແລະ ກຳນົດມາດຕະຖານ ເງື່ອນໄຂລະອຽດໃຫ້ສອດຄ່ອງກັບການນຳໃຊ້ໜ້າວຽກຕົວຈິງ.
ຂອບໃຈຂໍ້ມູນຈາກ:
ຕິດຕາມຂ່າວທັງໝົດຈາກ LaoX: https://laox.la/all-posts/