ຄວາມແອອັດຢູ່ທ່າເຮືອຂົນສົ່ງສິນຄ້າຂອງສິງກະໂປແມ່ນຮ້າຍແຮງທີ່ສຸດນັບຕັ້ງແຕ່ການລະບາດຂອງ COVID-19, ສະທ້ອນໃຫ້ເຫັນເຖິງບັນຫາໃນການປ່ຽນເສັ້ນທາງການຂົນສົ່ງທາງທະເລເພື່ອຫຼີກເວັ້ນ “ວິກິດການທະເລແດງ” ສົ່ງຜົນກະທົບຕໍ່ການຂົນສົ່ງທາງທະເລໃນທົ່ວໂລກກໍ່ໃຫ້ເກີດຄວາມຫຼ້າຊ້າທັງທ່າເຮືອອາຊີ ແລະ ຢູໂຣບ.
ຂໍ້ມູນຈາກບໍລິສັດ Linerlytica ໃນເດືອນກໍລະກົດ ໄດ້ລະບຸວ່າ ຄວາມແອອັດຂອງທ່າເຮືອໃນທົ່ວໂລກໄດ້ບັນລຸລະດັບສູງສຸດໃນຮອບ 18 ເດືອນ, ໂດຍມີເຮືອປະມານ 60% ລໍຖ້າການຈອດຢູ່ໃນອາຊີ. ເຮືອທີ່ບັນທຸກຕູ້ຄອນເທນເນີ 20 ຟຸດ (TEUs) ຫຼາຍກວ່າ 2.4 ລ້ານຄັນໄດ້ລໍຖ້າຢູ່ບ່ອນຈອດເຮືອໃນກາງເດືອນມິຖຸນາທີ່ຜ່ານມາ.
ສິງກະໂປ ເຊິ່ງເປັນທ່າເຮືອຂົນສົ່ງສິນຄ້າທີ່ໃຫຍ່ທີ່ສຸດອັນດັບສອງຂອງໂລກ ໄດ້ປະເຊີນກັບຄວາມແອອັດຢ່າງໜັກໜ່ວງໃນອາທິດທີ່ຜ່ານມາ Linerlytica ແລະ PortCast ລາຍງານວ່າ ບັນດາເຮືອຕ່າງໆອາດຈະຕ້ອງລໍຖ້າເຖິງໜຶ່ງອາທິດເພື່ອເຂົ້າຈອດ, ແທນທີ່ຈະໃຊ້ເວລາໜ້ອຍກວ່າໜຶ່ງມື້.
ນອກຈາກນີ້, ຄວາມເຄັ່ງຕຶງໄດ້ແຜ່ລາມໄປສູ່ທ່າເຮືອ Klang ແລະ Tanjung Pelepas ຂອງມາເລເຊຍ, ໄລຍະເວລາການລໍຖ້າເຂົ້າຈອດຂອງທ່າເຮືອຈີນກໍເພີ່ມຂຶ້ນ. Shanghai ແລະ Qingdao ຈຳຕ້ອງປະເຊີນກັບການຫຼ້າຊ້າຫຼາຍທີ່ສຸດ.
ສຳລັບສາເຫດຂອງຄວາມແອອັດຢູ່ທ່າເຮືອສິງກະໂປມີດັ່ງນີ້:
1. ວິກິດການທະເລແດງ:
- ເຮືອທຸກສິນຄ້າປ່ຽນເສັ້ນທາງເພື່ອຫຼີກເວັ້ນການໂຈມຕີຈາກກຸ່ມກະບົດ Houthi ໃນເຢແມນ, ສົ່ງຜົນໃຫ້ທ່າເຮືອສິງກະໂປຕ້ອງຮອງຮັບເຮືອເປັນຈຳນວນຫຼາຍຂຶ້ນ
- ເຮືອໃຊ້ເວລາດົນຂຶ້ນໃນການເດີນທາງ ເນື່ອງຈາກຕ້ອງອ້ອມເສັ້ນທາງທະເລແດງ ເຮັດໃຫ້ເຮືອເຂົ້າທ່າສິງກະໂປຊ້າລົງ
2. ການຟື້ນຕົວທາງເສດຖະກິດພາຍຫຼັງ COVID-19:
- ຄວາມຕ້ອງການສໍາລັບຜະລິດຕະພັນຜູ້ບໍລິໂພກແມ່ນເພີ່ມຂຶ້ນໃນທົ່ວໂລກ. ສົ່ງຜົນໃຫ້ການຂົນສົ່ງສິນຄ້າທາງທະເລເປັນຈຳນວນຫຼາຍ.
- ທ່າເຮືອຫຼາຍແຫ່ງຍັງບໍ່ສາມາດກັບມາດຳເນີນການໄດ້ຢ່າງເຕັມທີ່ ເພາະຍັງມີມາດຕະການຄວບຄຸມການແຜ່ລະບາດຂອງພະຍາດໂຄວິດ-19.
3. ບັນຫາຫ່ວງໂຊ່ອຸປະທານ:
- ການຂາດແຄນຊິບ ແລະ ວັດຖຸດິບ ສົ່ງຜົນໃຫ້ການຜະລິດສິນຄ້າຊັກຊ້າ.
- ແຮງງານໃນຂະແໜງການຂົນສົ່ງແມ່ນຈໍາກັດ. ເຮັດໃຫ້ການຂົນສົ່ງສິນຄ້າຊ້າລົງ.
4. ພື້ນທີ່ຈອດຢູ່ທ່າເຮືອທີ່ຈຳກັດ:
- ທ່າເຮືອສິງກະໂປມີພື້ນທີ່ຈຳກັດ ຮອງຮັບເຮືອໄດ້ບໍ່ພຽງພໍ
- ການຂະຫຍາຍທ່າເຮືອແມ່ນມີຄວາມຫຍຸ້ງຍາກ ເນື່ອງຈາກຕິດຂໍ້ຈໍາກັດທາງດ້ານພື້ນທີ່.
ທັງນີ້ ອະນາຄົດຂອງທ່າເຮືອສິງກະໂປຍັງຄົງຕ້ອງປະເຊີນກັບຄວາມທ້າທາຍອີກຫຼາຍ, ແຕ່ກໍເພີ່ມໂອກາດຫຼາຍຂຶ້ນເຊັ່ນກັນ. ບັນດາທ່າເຮືອທີ່ປະສົບຜົນສໍາເລັດຕ້ອງປັບຕົວ, ພັດທະນາຄວາມສາມາດຂອງຕົນ ແລະ ຍຶດເອົາໂອກາດເຫຼົ່ານີ້.
ທີ່ມາ:
ຕິດຕາມຂ່າວທັງໝົດຈາກ LaoX: https://laox.la/all-posts/
