ອັບເດດສະຖານະການສົງຄາມຢູເຄຣນ-ຣັດເຊຍ ແລະ ຄວາມເຄື່ອນໄຫວຂອງນານາຊາດ

27/02/2022

ປະທານາທິບໍດີຣັດເຊຍ ວະລາດິເມຍ ປູຕິນ ພ້ອມສົ່ງຜູ້ແທນເຈລະຈາກັບຢູເຄຣນທີ່ເບລາຣຸສ ທາງດ້ານຢູເຄຣນກໍພ້ອມເຈລະຈາ.

ດະມິທຣີ ເພສຄອຟ ໂຄສົກປະຈຳທຳນຽບຂອງປະທານາທິບໍດີຣັດເຊຍກ່າວວ່າ ວະລາດິເມຍ ປູຕິນ ຜູ້ນຳ ຣັດເຊຍ ພ້ອມທີ່ຈະສົ່ງຜູ້ແທນລະດັບສູງ ເພື່ອເຈລະຈາກັບຜູ້ນໍາຢູເຄຣນ ທີ່ເມືອງ ມິນສ໌ ເມືອງຫຼວງຂອງ ປະເທດ ເບລາຣຸສ ເຊິ່ງກ່ອນໜ້ານີ້ເຄີຍເປັນເຈົ້າພາບຈັດການໂອ້ລົມສັນຕິພາບວິກິດຢູເຄຣນຫຼາຍຄັ້ງ.

ທາງດ້ານ ມິໄຄໂລ ໂປໂດລຍາຄ ທີ່ປຶກສາຂອງປະທານາທິບໍດີຢູເຄຣນກ່າວວ່າ ຢູເຄຣນຕ້ອງການສັນຕິພາບແລະພ້ອມເຈລະຈາກັບຣັດເຊຍພ້ອມກັບສະຖານະເປັນກາງກ່ຽວກັບ NATO.

ຜູ້ນຳຢູເຄຣນຮ້ອງຂໍໃຫ້ລັດຖະມົນຕີອິດສະຣາເອລຊ່ວຍເປັນຕົວກາງໃນການເຈລະຈາກັບຣັດເຊຍ

ໃນວັນທີ 26 ກຸມພາທີ່ຜ່ານມາ ເຍຟເກນ ກໍຣະນີຍ໌ຊຸກ ທູດຢູເຄຣນປະຈຳອິດສະຣາເອລ ເຜີຍວ່າ ປະທານາທິບໍດີ ໂວໂລດິເມຍ ເຊເລນສະກີ ຂອງຢູເຄຣນ ຮ້ອງຂໍໃຫ້ນາຍົກລັດຖະມົນຕີ ນາຟຕາລີ ເບນເນຕ໌ ຂອງອິດສະຣາເອລຊ່ວຍເປັນຕົວກາງໃນການເຈລະຈາໄກ່ເກ່ຍ ກັບຣັດເຊຍທີ່ ເຍຣູຊາເລັມ (Jerusalem) ເມືອງສັກສິດໃນອິດສະຣາເອລ.

ປະທານາທິບໍດີເຊື່ອໝັ້ນວ່າ ອິສະຣາເອລເປັນພຽງລັດປະຊາທິປະໄຕພຽງລັດດຽວທີ່ມີຄວາມສຳພັນທີ່ດີຕໍ່ຢູເຄຣນແລະຣັດເຊຍ ດັ່ງນັ້ນຈຶ່ງໜ້າຈະອຳນວຍຄວາມສະດວກໃຫ້ກັບການເຈລະຈາໄກ່ເກ່ຍ ເພື່ອຫາທາງອອກໃຫ້ກັບວິກິດການຄັ້ງນີ້ໄດ້.

ໃນເບື້ອງຕົ້ນທາງການ ອິດສະຣາເອລ ຍັງບໍ່ໄດ້ໃຫ້ຄຳຕອບກັບເລື່ອງນີ້ ແຕ່ຍັງຢູ່ໃນລະຫວ່າງການປຶກສາຫາລືກັນ.

ຜູ້ແທນຈາກສະຫະປະຊາຊາດ 50 ປະເທດຮ່ວມກັນລົງນາມປະນາມຣັດເຊຍ

ເອກອັກຄະລັດຖະທູດ ຜູ້ແທນຖາວອນປະຈຳສະຫະປະຊາຊາດຈາກ 50 ປະເທດ ຮ່ວມລົງນາມໃນຖະແຫຼງການປະນາມຣັດເຊຍ ໂດຍຊີ້ວ່າໃຊ້ອຳນາດໃນທາງບໍ່ຖືກຕ້ອງ ໃນຖານະສະມາຊິກຖາວອນຂອງຄະນະມົນຕີຄວາມໝັ້ນຄົງແຫ່ງສະຫະປະຊາຊາດ (UNSC) ຍົກວີໂຕ້ (Veto) ຄັດຄ້ານການອອກມະຕິຂອງທີ່ປະຊຸມ ເພື່ອສະແດງຈຸດຢືນຕໍ່ປະເດັນການຮຸກຮານຂອງຣັດເຊຍຕໍ່ຢູເຄຣນ.

ໂດຍ ຜູ້ແທນຄະນະມົນຕີຄວາມໝັ້ນຄົງ ທັງ 15 ປະເທດ ໄດ້ປະຊຸມຫາລືກັນເມື່ອຕອນເຊົ້າວັນສຸກທີ 25 ກຸມພາທີ່ຜ່ານມາ ຕາມເວລາທ້ອງຖິ່ນ ກ່ອນທີ່ຈະໂຫວດມະຕິທີ່ປະຊຸມປະນາມການກະທຳຂອງຣັດເຊຍໂດຍມີ 11 ປະເທດສະມາຊິກເຫັນດີນຳມະຕິດັ່ງກ່າວ ຂະນະດຽວກັນຣັດເຊຍກໍໄດ້ໃຊ້ວີໂຕ້ຄັດຄ້ານ ສ່ວນຈີນ, ອິນເດຍ ແລະ ສະຫະລັດອາຣັບເອມິເຣດ ແມ່ນງົດອອກສຽງ.

ຣັດເຊຍເຕືອນຖ້າ ຟິນແລນ ຫຼື ສະວີເດັນເຂົ້າເປັນສະມາຊິກຂອງ NATO ອາດພົບກັບການຕອບໂຕ້ຢ່າງຈິງຈັງຈາກຣັດເຊຍ

ໃນວັນທີ 25 ກຸມພາ ທີ່ຜ່ານມາ ມາເຣຍ ຊາຄາໂຣວາ ໂຄສົກກະຊວງຕ່າງປະເທດຂອງຣັດເຊຍ ໄດ້ເຕືອນວ່າຫາກຟິນແລນ ຫຼື ສະວີເດນເຂົ້າຮ່ວມເປັນສະມາຊິກ NATO ຈະມີຜົນຕາມທາງການທະຫານ ແລະ ການເມືອງຢ່າງຮ້າຍແຮງຈາກຣັດເຊຍ.

ສະຫະລັດອາເມຣິກາມອບງົບປະປະມານ 350 ລ້ານໂດລາເພື່ອຊ່ວຍຢູເຄຣນ

ມື້ວານນີ້ (25 ກຸມພາ) ຕາມເວລາທ້ອງຖິ່ນຂອງ ສະຫະລັດອາເມຣິກາ ປະທານາທິບໍດີ ໂຈ ໄບເດັນ ໄດ້ມີຄຳສັ່ງໃຫ້ ແອນໂທນີ ບິງເຄນ ລັດຖະມົນຕີຕ່າງປະເທດຂອງສະຫະລັດອາເມຣິກາ ອະນຸມັດງົບປະມານເພີ່ມເປັນ 350 ລ້ານໂດລາ ເພື່ອສະໜັບສະໜູນກິດຈະການດ້ານຄວາມຄວາມໝັ້ນຄົງຂອງຢູເຄຣນຢ່າງຮີບດ່ວນ.

ປະທານາທິບໍດີ ປູຕິນ ພ້ອມດ້ວຍລັດຖະມົນຕີຕ່າງປະເທດຂອງຣັດເຊຍ ຖືກບັນດາຊາດຕາເວັນອອກສັ່ງຂວ້ຳບາດ

ບັນດາຊາດຕາເວັນອອກໄດ້ອອກຄຳສັ່ງຂວ້ຳບາດຕໍ່ປະທານາທິບໍດີ ວະລາດິເມຍ ປູຕິນ ແຫ່ງຣັດເຊຍ ລວມທັງ ເຊີເກ ລາຟຣອຟ ລັດຖະມົນຕີຕ່າງປະເທດຂອງຣັດເຊຍ ເນື່ອງຈາກຣັດເຊຍໄດ້ເປີດສາກບຸກໂຈມຕີຢູເຄຣນເມື່ອວັນພະຫັດ ທີ 24 ກຸມພາທີ່ຜ່ານມາ ໂດຍມີຄຳສັ່ງຄື ອາຍັດຊັບສິນຂອງທັງສອງຄົນໃນສະຫະລັດອາເມຣິກາ, ຢູໂຣບ, ສະຫະຣາຊະອານາຈັກ ແລະ ແຄນນາດາ ລວມໄປຮອດຫ້າມເດີນທາງເຂົ້າສະຫະລັດອາເມຣິກາ.

ເຊິ່ງການຂວໍ້າບາດໃນຄັ້ງນີ້ເຮັດໃຫ້ ປະທານາທິບໍດີ ວະລາດິເມຍ ປູຕິນ ຈັດຢູ່ໃນກຸ່ມດຽວກັບ ຄິມຈອງອຶນ ຜູ້ນຳສູງສຸດເກົາຫຼີເໜືອ, ອາເລັກຊານເດີ ລູກາເຊນໂກ ປະທານາທິບໍດີເບລາຣຸສ ແລະ ບາຊາຣ໌ ອັລ ອັດຊາດ ຜູ້ນຳຂອງ ຊີເຣຍ.

ປະທານາທິບໍດີຂອງຢູເຄຣນພິຈາລະນາການເຂົ້າຮ່ວມເປັນສະມາຊິກ EU ອີກຄັ້ງ

ວັນທີ 26 ກຸມພາ ປະທານາທິບໍດີຂອງຢູເຄຣນ ໂວໂລດິເມຍ ເຊເລນສະກີ ທະວີດຂໍ້ຄວາມຜ່ານ Twitter ສ່ວນຕົວ ໂດຍລະບຸວ່າ ນີ້ຄືໄລຍະເວລາທີ່ສຳຄັນທີ່ຕ້ອງພິຈາລະນາຫົວຂໍ້ທີ່ຫາລືກັນມາເປັນເວລາຍາວນານ ກ່ຽວກັບການສະໝັກການເປັນສະມາຊິກສະຫະພາບຢູໂຣບອີກຄັ້ງ ເຊິ່ງໄດ້ເວົ້າກັບ ຊາລ ມີແຊລ ປະທານຄະນະມົນຕີຢູໂຣບ (European Council) ເຖິງແນວທາງຊ່ວຍເຫຼືອທີ່ມີປະສິດທິພາບແລະຕໍ່ກັນຢ່າງກ້າຫານຂອງຊາວຢູເຄຣນເພື່ອອະນາຄົດທີ່ມີເຈດຈຳນົງເສຣີຂອງພວກເຂົາ.

ທັງນີ້ ຜູ້ນຳຢູເຄຣນໃຫ້ຄຳໝັ້ນວ່າຈະບໍ່ຍອມຖິ້ມອາວຸດ ຈະປົກປ້ອງປະເທດນີ້ ພ້ອມເນັ້ນຍ້ຳວ່າ ອາວຸດຂອງຢູເຄຣນຄືຄວາມຈິງ ຄວາມຈິງທີ່ວ່າແຜ່ນດິນນີ້ເປັນຂອງເຮົາ ເປັນປະເທດຂອງເຮົາ ເປັນລູກຫຼານຂອງເຮົາ ເຮົາຈະປົກປ້ອງສິ່ງຕ່າງໆ ເຫຼົ່ານີ້.

ຜູ້ນຳຢູເຄຣນປະຕິເສດຂໍ້ສະເໜີລີ້ໄພຂອງສະຫະລັດອາເມຣິກາ

ທູດຢູເຄຣນປະຈຳສະຫະຣາຊະອານາຈັກ ໄດ້ທະວີດຂໍ້ຄວາມຜ່ານ Twitter ເຜີຍວ່າ ໂວໂລດິເມຍ ເຊເລນສະກີ ຜູ້ນຳຢູເຄຣນ ປະຕິເສດຂໍ້ສະເໜີຂອງທາງການສະຫະລັດອາເມຣິກາທີ່ແນະນຳໃຫ້ ເຊເລນສະກີ ອົບພະຍົບລີ້ໄພອອກຈາກເມືອງຫຼວງ Kyiv ຫຼັງກອງທັບຣັດເຊຍເຄື່ອນພົນເຂົ້າມາຮອດເມືອງຫຼວງ.

ນອກຈາກນີ້ ສະຖານທູດຍັງອ້າງອີງຄຳເວົ້າຂອງຜູ້ນຳຢູເຄຣນ ໂດຍລະບຸວ່າ “ການຕໍ່ສູ້ເກີດຂຶ້ນທີ່ນີ້ ຂ້ອຍຕ້ອງການອາວຸດຕໍ່ສູ້ບໍ່ແມ່ນພາຫະນະຫຼົບໜີ” ພ້ອມກ່າວອີກວ່າ “ຊາວຢູເຄຣນພູມໃຈໃນຕົວປະທານາທິບໍດີຂອງພວກເຂົາ”.

ເຮືອສົ່ງສິນຄ້າຍີ່ປຸ່ນຖືກຍິງລູກສອນໄຟນອກຊາຍຝັ່ງຢູເຄຣນ

ບໍລິສັດຂົນສົ່ງທາງເຮືອຈາກເມືອງອິມາບາຣິ ແຂວງເອຮິເມະ ຕັ້ງຢູ່ພາກຕາເວັນຕົກຂອງປະເທດຍີ່ປຸ່ນ ເປີດເຜີຍວ່າເຮືອບັນທຸກສິນຄ້າ ນາມູຣະ ຄວີນ (Namura Queen) ເຊິ່ງຈົດທະບຽນໃນປະເທດປານາມາໄດ້ຮັບຄວາມເສຍຫາຍໃນຂະນະແລ່ນເຮືອຜ່ານທະເລດຳນອກຊາຍຝັ່ງຢູເຄຣນ ເມື່ອວັນສຸກທີ 25 ກຸມພາທີ່ຜ່ານມາ ເຮັດໃຫ້ລູກເຮືອ 1 ຄົນໄດ້ຮັບບາດເຈັບ ທາງດ້ານເຈົ້າໜ້າທີ່ຂອງຢູເຄຣນເປີດເປີຍວ່າ ຂີປະນາວຸດທີ່ຍິງໃສ່ເຮືອບັນທຸກສິນຄ້າຂອງຍີ່ປຸ່ນຖືກຍິງໂດຍກອງທັບຣັດເຊຍ ຫຼັງຈາກທີ່ມີການບຸກໂຈມຕີຢູເຄຣນໃນວັນທີ 24 ກຸມພາທີ່ຜ່ານມາ.

ທີ່ມາ:

ຕິດຕາມຂ່າວທັງໝົດຈາກ LaoX: https://laox.la/all-posts/