ກະຊວງການເງິນແຫ່ງ ສປປ ລາວ ໄດ້ອອກມາສະແດງຄວາມຄິດເຫັນຂອງຕົນວ່າ ດ້ວຍການຜັນຜວນຂອງເສດຖະກິດໂລກທີ່ອາດຈະເຮັດໃຫ້ປະເທດລາວໄດ້ຮັບຜົນກະທົບທາງດ້ານເສດຖະກິດ. ແຕ່ເຖິງແບບນັ້ນ, ເມື່ອເບິ່ງຈາກຕົວເລກເສດຖະກິດຂອງ ສປປ ລາວໃນປັດຈຸບັນແລ້ວ, ມັນໄດ້ສະແດງໃຫ້ເຫັນວ່າ ສປປ ລາວ ມີທ່າແຮງໃນຂະຫຍາຍຕົວ ແລະ ພັດທະນາຢ່າງຕໍ່ເນື່ອງ ໂດຍອີງຕາມຂໍ້ມູນດັ່ງນີ້:
- ສປປ ລາວ ໄດ້ມີການບໍລິຫານຈັດການກັບງົບປະມານທີ່ດີຂຶ້ນຢ່າງຕໍ່ເນື່ອງ. ໂດຍອັດຕາສ່ວນການຂາດດຸນງົບປະມານຕໍ່ GDP ໃນປີ 2022 ຫຼຸດລົງ -0.30% ເນື່ອງຈາກລາຍຮັບງົບປະມານເພີ່ມຂຶ້ນຢ່າງຫຼວງຫຼາຍ. ຄຽງຄູ່ກັບການຄວບຄຸມລາຍຈ່າຍງົບປະມານຢ່າງເຂັ້ມງວດ, ໃນ 6 ເດືອນຕົ້ນປີ 2023, ສປປ ລາວ ສາມາດເປັນປະເທດທີ່ມີຍອດເກີນດຸນງົບປະມານ (Fiscal Surplus) ໂດຍມີອັດຕາສ່ວນເກີນດຸນງົບປະມານຕໍ່ GDP ຢູ່ທີ່ລະດັບ 2,30%.
- ເງິນທຶນສຳຮອງເງິນລະຫວ່າງປະເທດ (FX Reserve) ມີການເພີ່ມຂຶ້ນຢ່າງຕໍ່ເນື່ອງ. ໂດຍສາມາດຂຶ້ນຢືນຢູ່ທີ່ລະດັບ 1,781.96 ລ້ານໂດລາສະຫະລັດ ໃນເດືອນກັນຍາປີ 2023 ແລະ ລັດຖະບານຍັງມີແຜນການທີ່ຈະເພີ່ມ ແລະ ຮັກສາລະດັບຂອງເງິນທຶນສຳຮອງລະຫວ່າງປະເທດຢ່າງເຂັ້ມງວດ.
- ນັບແຕ່ປີ 2020 ເປັນຕົ້ນມາ, ສປປ ລາວ ຍັງຄົງຮັກສາການເກີນດຸນການຄ້າໄດ້ຢ່າງຕໍ່ເນື່ອງທັງໃນປັດຈຸບັນ ແລະ ອະນາຄົດ, ໃນ 9 ເດືອນຕົ້ນປີ 2023, ມີການເກີນດຸນທາງການຄ້າຢູ່ທີ່ 943 ລ້ານໂດລາ.
- ໂຄງການຕ່າງໆເຊັ່ນ: ໂຄງການເຂື່ອນໄຟຟ້າ, ໂຄງການລົດໄຟໄຟຟ້າລາວ-ຈີນ ໂຄງການທາງດ່ວນ ວຽງຈັນ – ບໍ່ເຕັນ, ເຂດໂລຈິສຕິກນະຄອນຫຼວງວຽງຈັນ ແລະ ອື່ນໆ ໄດ້ເລີ່ມສ້າງສຳເລັດເທື່ອລະກ້າວ, ເຊິ່ງໃນຂະນະນີ້ຢູ່ໃນໄລຍະດຳເນີນການຢູ່ໃນການປະຕິບັດ ແລະ ເກັບກ່ຽວຜົນປະໂຫຍດດ້ານເສດຖະກິດ. ລວມທັງຜົນປະໂຫຍດທາງດ້ານການສົ່ງອອກ
- ສໍາລັບໂຄງການສາຍສົ່ງ (EDL-Transmission) ໄດ້ຜ່ານມະຕິຕົກລົງໃນກອງປະຊຸມສະພາແລ້ວ. ປັດຈຸບັນ, ຢູ່ໃນລະຫວ່າງການປະຕິບັດແຜນການພັດທະນາໃນຂອບເຂດຂອງໂຄງການ.
ນອກຈາກນັ້ນ, ສປປ ລາວ ມີແຫຼ່ງລາຍຮັບຫຼາຍແຫຼ່ງທີ່ເປັນສະກຸນເງິນຕ່າງປະເທດ. ເຊິ່ງລັດຖະບານໄດ້ຈັດສັນແຫຼ່ງທຶນຕ່າງໆໃຫ້ສອດຄ່ອງ ແລະ ພຽງພໍເພື່ອຊໍາລະໜີ້ເງິນຕາຕ່າງປະເທດໃນແຕ່ລະປີ. ແລະໄດ້ມີການວາງແຜນການຊໍາລະໜີ້ສິນເງິນຕາຕ່າງປະເທດ ໂດຍນຳໃຊ້ແຫຼ່ງເງິນທຶນຈາກຕ່າງປະເທດ ເຊິ່ງຈະບໍ່ເຮັດໃຫ້ເກີດຄວາມສ່ຽງດ້ານອັດຕາແລກປ່ຽນ. ດັ່ງນັ້ນ, ໃນສະຖານະການເງິນກີບທີ່ອ່ອນຄ່າຢ່າງຮຸນແຮງໃນປັດຈຸບັນຈະບໍ່ມີຜົນກະທົບຢ່າງຫຼວງຫຼາຍຕໍ່ການຊໍາລະໜີ້ໃນສະກຸນເງິນຕາຕ່າງປະເທດ ແລະ ການຊໍາລະຄືນພັນທະບັດ.
ໂດຍຫຼ້າສຸດ ກະຊວງການເງິນແຫ່ງ ສປປ ລາວ ໄດ້ຊຳລະຄືນພັນທະບັດສະກຸນເງິນບາດຕາມກຳນົດໃນວັນທີ 18 ແລະ 29 ພະຈິກ 2023, ລວມມູນຄ່າທັງໝົດ 3,610,30 ລ້ານບາດ, ຄົບຕາມເງື່ອນໄຂ ແລະ ບໍ່ເຄີຍມີປະຫວັດການຜິດນັດຊໍາລະໜີ້ສິນຕະຫຼອດໄລຍະການອອກພັນທະບັດໃນປະເທດໄທເປັນເວລາຫຼາຍກວ່າ 10 ປີ, ຜ່ານມາ ພັນທະບັດໄດ້ຮັບການຊໍາລະຄືນດ້ວຍມູນຄ່າທັງໝົດ 31,452,60 ລ້ານບາດ.
ທີ່ມາ:
ຕິດຕາມຂ່າວທັງໝົດຈາກ LaoX: https://laox.la/all-posts/