ທ່ານສອນໄຊ ສີພັນດອນ ນາຍົກລັດຖະມົນຕີ ແຫ່ງ ສປປ ລາວ ແນະນຳໃຫ້ ອຳນາດການປົກຄອງແຂວງ ຈຳປາສັກ ເປີດບໍລິການສາຍການບິນເພີ່ມ ເພື່ອອໍານວຍຄວາມສະດວກ, ດຶງດູດການລົງທຶນ, ດຶງດູດການທ່ອງທ່ຽວ ແລະ ອື່ນໆ.
ຄຳເຫັນດັ່ງກ່າວມີຂຶ້ນເມື່ອບໍ່ດົນມານີ້ ໃນໂອກາດ ທ່ານ ສອນໄຊ ສີພັນດອນ ນາຍົກລັດຖະມົນຕີ ພ້ອມດ້ວຍຄະນະ ໄດ້ລົງເຄື່ອນໄຫວຢ້ຽມຢາມ, ຕິດຕາມຊຸກຍູ້ ແລະ ຊີ້ນຳວຽກງານການພັດທະນາເສດຖະກິດ-ສັງຄົມ ຢູ່ແຂວງຈຳປາສັກ ໂດຍມີທ່ານ ວິໄລວົງ ບຸດດາຄຳ ເຈົ້າແຂວງຈຳປາສັກ ພ້ອມດ້ວຍການນຳຫຼັກແຫຼ່ງຂອງແຂວງ, ເມືອງ ແລະ ພາກສ່ວນທີ່ກ່ຽວຂ້ອງ ໃຫ້ການຕ້ອນຮັບ.
ອີງຕາມຂໍ້ມູນຈາກ ເວັບໄຊ ການບິນລາວ ປັດຈຸບັນ ຖ້ຽວບິນວຽງຈັນ-ປາກເຊ ມີ 2 ຖ້ຽວຕໍ່ມື້ ແລະ ມີ 3 ຖ້ຽວຕໍ່ມື້ ສຳລັບວັນ ວັນອັງຄານ, ວັນພະຫັດ ແລະ ວັນເສົາ, ຖ້ຽວບິນຈາກ ຫຼວງພະບາງ-ປາກເຊ ອີກ ມື້ລະ 1 ຖ້ຽວ ສຳລັບທຸກໆວັນ ອັງຄານ, ພະຫັດ ແລະ ວັນເສົາ. ສ່ວນສາຍການບິນ ລາວສະກາຍເວ ແມ່ນມີປະມານ 2 ຖ້ຽວ ຕໍ່ ອາທິດ ໃນວັນ ສຸກ ແລະ ວັນອາທິດ.
ສຳລັບພາກການທ່ອງທຽວ ອີງຕາມຄຳໃຫ້ສຳພາດຂອງ ທ່ານ ໂສມ ບຸດຕະກຸນ ຮອງເຈົ້າແຂວງຈຳປາສັກ ຜູ້ຊີ້ນຳຂົງເຂດວັດທະນະທຳ-ສັງຄົມ ເຫັນວ່າໃນປີ 2024 ຄາດຄະເນຈະມີນັກທ່ອງທ່ຽວສາກົນເດີນທາງມາທ່ຽວແຂວງຈຳປາສັກປະມານ 330 ພັນກວ່າເທື່ອຄົນ,ຈະສາມາດສ້າງລາຍຮັບຈາກການທ່ອງທ່ຽວໄດ້ປະມານ 64 ລ້ານກວ່າໂດລາ ແລະ ໃນປີ 2025 ນັກທ່ອງທ່ຽວສາກົນຈະບັນລຸເຖິງ 350 ພັນກວ່າເທື່ອຄົນ ແລະ ຈະສ້າງລາຍຮັບໄດ້ 68 ລ້ານກວ່າໂດລາ.
ທ່ານ ນາຍົກລັດຖະມົນຕີ ແຫ່ງ ສປປ ລາວ ຍັງໄດ້ເນັ້ນໜັກໃຫ້ ອຳນາດການປົກຄອງແຂວງ ຈຳປາສັກ ສືບຕໍ່ຕິດຕາມ ແລະ ຄຸ້ມຄອງລາຄາສິນຄ້າບູລິມະສິດ ທີ່ກະທົບຕໍ່ຊີວິດການເປັນຢູ່ຂອງປະຊາຊົນ ຢ່າງເຂັ້ມງວດ; ຄຸ້ມຄອງບັນດາບໍລິສັດນຳເຂົ້າ-ສົ່ງອອກສິນຄ້າພາຍໃນແຂວງ ການຊຳລະສະສາງ ໃຫ້ຜ່ານລະບົບທະນາຄານ ຢ່າງຖືກຕ້ອງ ແລະ ເຂັ້ມງວດ; ນຳໃຊ້ເງິນເກີນແຜນ ປີ 2023 ໃຫ້ຖືກເປົ້າໝາຍທີ່ລັດຖະບານ ໄດ້ກຳນົດໄວ້; ສົ່ງເສີມການນຳໃຊ້ຜະລິດຕະພັນພາຍໃນໃຫ້ຫຼາຍຂຶ້ນ ໄປຄຽງຄູ່ກັບການສົ່ງເສີມການຜະລິດທີ່ມີທ່າແຮງ ແລະ ສົ່ງອອກ ຕິດພັນກັບການປຸງແຕ່ງພາຍໃນ ແລະ ຫັນເປັນອຸດສາຫະກຳ ໃຫ້ຫຼາຍກວ່າເກົ່າ.
ໃນປີ 2023 ທີ່ຜ່ານມາ ເສດຖະກິດ ແຂວງຈຳປາສັກ ຂະຫຍາຍຕົວຕໍ່ເນື່ອງ ລະດັບ 5,63% ໂດຍສາມາດເກັບລາຍຮັບໄດ້ 2.483 ຕື້ກີບ (ລື່ນແຜນ 29%).
ອຳນາດການປົກຄອງ ແຂວງ ຍັງຖືກແນະນຳໃຫ້ ເອົາໃຈໃສ່ປະຕິບັດ ມາດຕະການປະຢັດມັດທະຍັດ ເປັນຕົ້ນ ໄຟຟ້າ, ນໍ້າມັນເຊື້ອໄຟ, ພະລັງງານທົດແທນ, ການນຳໃຊ້ພາຫະນະ, ເຄື່ອງໃຊ້ຫ້ອງການ ແລະ ອື່ນໆ; ຄົ້ນຄວ້າແກ້ໄຂ ບັນດາໂຄງການລົງທຶນ ທີ່ແກ່ຍາວເວລາມາດົນ ບໍ່ມີປະສິດທິຜົນ ໃຫ້ເດັດຂາດ; ສືບຕໍ່ຕິດຕາມ, ຄຸ້ມຄອງການເຄື່ອນໄຫວຂອງແຮງງານ, ການເຄື່ອນໄຫວຂອງພົນລະເມືອງ ກໍຄື ການເຄື່ອນໄຫວທົ່ວສັງຄົມ ໃຫ້ສາມາດກໍາໄດ້ສະພາບ; ຍົກລະດັບການພັດທະນາສີມືແຮງງານ ທັງດ້ານຈໍານວນ ແລະ ຄຸນະພາບ; ສືບຕໍ່ກະກຽມດໍາເນີນກອງປະຊຸມໃຫຍ່ 3 ຂັ້ນຂອງພັກ ໃຫ້ຖືກຕາມຂັ້ນຕອນ ແລະ ລະບຽບການ, ຮັບປະກັນທາງດ້ານເນື້ອໃນ, ບຸກຄະລາກອນ ຕາມມາດຖານເງື່ອນໄຂ ແລະ ສໍາເລັດຕາມແຜນການທີ່ກຳນົດໄວ້.
ປັດຈຸບັນ ການແກ້ໄຂຄວາມທຸກຍາກ ທົ່ວແຂວງຈຳປາສັກ ມີຄອບຄົວພົ້ນທຸກ ກວມ 96,86%, ບ້ານພົ້ນທຸກ ກວມ 98,44%, ນອກນັ້ນ ຍັງສາມາດປະກາດເປັນບ້ານພັດທະນາ ປະຊາຊົນຢູ່ດີກິນດີ ໄດ້ 10 ກວ່າບ້ານແລ້ວ, ສາມາດປະກາດເປັນແຂວງຫົວໜ່ວຍຍຸດທະສາດ ໃນປີຜ່ານມາ, ສ້າງເມືອງເປັນຫົວໜ່ວຍເຂັ້ມແຂງຮອບດ້ານ ໄດ້ 6 ເມືອງ ແລະ 1 ນະຄອນ, ສ້າງບ້ານພັດທະນາ ກວມ 73%, ສ້າງບ້ານປ້ອງກັນຄວາມສະຫງົບດີ ກວມ 88%, ບ້ານປອດຢາເສບຕິດ ກວມ 74,76%.
ຕິດຕາມຂ່າວທັງໝົດຈາກ LaoX: https://laox.la/all-posts/
