ທະນາຄານ ສົ່ງເສີມກະສິກຳ ຈຳກັດ (ທ.ກ.ສ) ໄດ້ລົງນາມໃນບົດບັນທຶກຂໍ້ຕົກລົງຮ່ວມມື (MOU) ກັບບໍລິສັດລົດໄຟລາວ-ຈີນ ຈຳກັດ (LCRC) ເພື່ອພັດທະນາລະບົບການຊຳລະຄ່າປີ້ລົດໄຟຜ່ານແອັບພລິເຄຊັ່ນ Mepom (ມີພ້ອມ) ຂອງ ທ.ກ.ສ ໂດຍມີເປົ້າໝາຍເພື່ອອຳນວຍຄວາມສະດວກໃຫ້ແກ່ລູກຄ້າທັງສອງຝ່າຍ. ທັງສອງຝ່າຍໃນການຈ່າຍຄ່າປີ້ລົດໄຟໂດຍຜ່ານເເອັບ Mepom ໃນຮູບແບບທີ່ທັນສະໄໝ, ສະດວກ, ວ່ອງໄວ ແລະ ປະຢັດເວລາ.
ພິທີລົງນາມ MOU ໄດ້ຖືກຈັດຂຶ້ນໃນວັນທີ 28 ເມສາ 2024 ທີ່ໂຮງແຮມຄຣາວພລາຊາ (Crowne Plaza Hotel), ໂດຍມີ ທ່ານ ສົມສະຫວາດ ເລັ່ງສະຫວັດ ອະດີດຮອງນາຍົກລັດຖະມົນຕີ ແຫ່ງ ສປປ ລາວ ເປັນປະທານໃນພິທີ.
ທ່ານ ພົງສະຫວັດ ເສນາພວນ ປະທານສະພາບໍລິຫານ ທະນາຄານ ສົ່ງເສີມກະສິກຳ ຈຳກັດ ກ່າວວ່າ “ການຮ່ວມມືກັນໃນຄັ້ງນີ້, ທ,ກ.ສ ມຸ່ງຫວັງທີ່ຈະພັດທະນາລະບົບຊຳລະເງິນໃຫ້ທັນສະໄໝ. ຕອບໂຈດຄວາມຕ້ອງການຂອງລູກຄ້າໃນຍຸກດິຈິຕອນ ແລະ ຫຼຸດຂັ້ນຕອນໃນການຊຳລະເງິນໂດຍການນຳໃຊ້ແອັບພລິເຄຊັນ Mepom, ແອັບພລິເຄຊັນທະນາຄານໃນໂທລະສັບ ທີ່ໃຊ້ງານງ່າຍ, ສະດວກ, ວ່ອງໄວປະຢັດເວລາ ແລະ ປອດໄພ, ມາເປັນຊ່ອງທາງໃນການຊຳລະຄ່າປີ້ລົດໄຟ. ພ້ອມທັງຊຸກຍູ້ການທ່ອງທ່ຽວ ແລະ ເສດຖະກິດໃນປະເທດອີກດ້ວຍ”
ທ່ານ LIU HONG, ຜູ້ອຳນວຍການໃຫຍ່ ບໍລິສັດ ລົດໄຟ ລາວ-ຈີນ ຈຳກັດ ກ່າວວ່າ “ບໍລິສັດ ມຸ່ງໝັ້ນພັດທະນາການບໍລິການລົດໄຟໃຫ້ມີຄວາມສະດວກ, ວ່ອງໄວ ແລະ ທັນສະໄໝ ເພື່ອຕອບສະໜອງຄວາມຕ້ອງການຂອງລູກຄ້າ. ການຮ່ວມມືກັບ ທ.ກ,ສ ໃນຄັ້ງນີ້, ບໍລິສັດເຊື່ອໝັ້ນວ່າ ຈະຂະຫຍາຍຊ່ອງທາງການຊຳລະຄ່າປີ້ລົດໄຟໃຫ້ມີຄວາມສະດວກສະບາຍ ແລະ ວ່ອງໄວຍິ່ງຂຶ້ນ. ພ້ອມກັບກະຕຸ້ນການທ່ອງທ່ຽວ ແລະ ສົ່ງເສີມເສດຖະກິດຂອງປະເທດທັງສອງຝ່າຍ”
ໃນປັດຈຸບັນ, ການຈອງຊື້ ແລະ ຊໍາລະຄ່າປີ້ລົດໄຟໄດ້ເພີ່ມຊ່ອງທາງໃຫ້ຫຼາຍຂຶ້ນ ໂດຍລູກຄ້າຜູ້ທີ່ປະສົງຈະເດີນທາງດ້ວຍລົດໄຟ ແມ່ນສາມາດຈອງຊື້ປີ້ລົດໄຟຜ່ານແອັບ LCR Ticket ແລະ ພາຍຫຼັງທີ່ຈອງຊື້ສຳເລັດ. ໃນຂັ້ນຕອນການຊໍາລະແມ່ນລະບົບຈະເຊື່ອມຕໍ່ຫາແອັບ Mepom ໂດຍຈະໃຫ້ລູກຄ້າພຽງແຕ່ກົດຢືນຢັນ, ລະບົບກໍຈະຕັດເງິນຈາກບັນຊີຂອງລູກຄ້າເພື່ອຊໍາລະຄ່າປີ້ລົດໄຟໄດ້ທັນທີ ແລະ ລະບົບກໍຈະຢັ້ງຢືນບິນອອນລາຍໃຫ້, ສຳລັບຜູ້ໂດຍສານທີ່ຈະເດີນທາງສາມາດນໍາໃຊ້ບິນອອນລາຍຈາກລະບົບພ້ອມກັບເອກະສານຢັ້ງຢືນຕົວຕົນກໍສາມາດຂຶ້ນລົດໄຟໄດ້ເລີຍ.
ພິເສດສຳລັບລູກຄ້າທີ່ຈ່າຍຄ່າປີ້ລົດໄຟຜ່ານແອັບພລິເຄຊັນ Mepom ຈະໄດ້ຮັບເງິນຄືນ 10% ສູງສຸດ 50,000 ກີບ/ບັນຊີ/ມື້. ນັບຕັ້ງແຕ່ວັນທີ 29 ເມສາ 2024 ເປັນຕົ້ນໄປ.
ລິ້ງດາວໂຫຼດແອັບ Mepom: https://www.apb.com.la/apps/
ທີ່ມາ:
ຕິດຕາມຂ່າວທັງໝົດຈາກ LaoX: https://laox.la/all-posts/