CBRE (Coldwell Banker Richard Ellis – ບໍລິສັດລົງທຶນ ແລະ ການບໍລິການອະສັງຫາລິມະຊັບການຄ້າຂອງ ອາເມຣິກາ ເປີດເຜີຍວ່າ ຜົນສຳຫຼວດ ກ່ຽວກັບແນວຄິດ ແລະ ແຜນການຂອງນັກລົງທຶນຢູ່ ພາກພື້ນ ອາຊີ – ປາຊີຟິກ ໃນປີ 2024 ວ່າຫວຽດນາມ ຢືນຢູ່ອັນດັບທີ 2 ໃນຈໍານວນຕະຫຼາດທີ່ພົ້ນເດັ່ນ ແລະ ໜ້າສົນໃຈທີ່ສຸດ ໃນໂລກກ່ຽວກັບຍຸດທະສາດການລົງທຶນ, ໂອກາດ ແລະ ມູນຄ່າເພີ່ມ ໃນຂົງເຂດອະສັງຫາລິມະຊັບ.
ຜູ້ຕາງໜ້າ CBRE ປະຈຳຫວຽດນາມ ໃຫ້ຮູ້ວ່າ: ເມື່ອທຽບໃສ່ບັນດາປະເທດໃນພາກພື້ນ, ຫວຽດນາມ ພວມດຶງດູດຄວາມສົນໃຈຈາກບັນດານັກລົງທຶນໄດ້ຫຼາຍກວ່າ ຍ້ອນພື້ນຖານເສດຖະກິດມະຫາພາກໄດ້ຮັບການຮັກສາເປັນປົກກະຕິ ແລະ ລະດັບດອກເບ້ຍເພດານຍັງຢູ່ໃນລະດັບຕ່ຳ.
ທ່ານ ຫງວຽນຟ້າມແອງຢຸຍ ຫົວໜ້າພາກສ່ວນໃຫ້ຄຳປຶກສາການລົງທຶນຂອງ CBRE ຫວຽດນາມ ໃຫ້ຮູ້ວ່າ: ບັນດານັກລົງທຶນພວມຕັ້ງໜ້າຊອກຫາ ແລະ ເພີ່ມທະວິການດຳເນີນທຸລະກິດຂອງຕົນຢູ່ ຫວຽດນາມ. ຫວຽດນາມ ກໍໄດ້ຫຼຸດຜ່ອນດອກເບ້ຍໃນໄລຍະຜ່ານມາ, ສິ່ງດັ່ງກ່າວໄດ້ຊ່ວຍໃຫ້ຕະຫຼາດອະສັງຫາລິມະຊັບຂອງ ຫວຽດນາມ ສາມາດດຶງດູດນັກລົງທຶນຫຼາຍຂຶ້ນກວ່າເກົ່າ.
ຕາມການໄຈ້ແຍກຂອງ CBRE ແລ້ວ, 6 ເດືອນ ທ້າຍປີ 2024, ບັນດາການເຄື່ອນໄຫວຊື້-ຂາຍໂຄງການອະສັງຫາລິມະຊັບການຄ້າຢູ່ ຫວຽດນາມ ຈະເພີ່ມລະດັບຄວາມວ່ອງໄວ ເມື່ອຕະຫຼາດພວມມີຄວາມຫວັງກ່ຽວກັບການຫຼຸດຜ່ອນດອກເບ້ຍແຕ່ລະຄັ້ງຂອງບັນດາທະນາຄານສູນກາງຢູ່ພາກພື້ນ.
ກະຊວງແຜນການ ແລະ ການລົງທຶນຫວຽດນາມ ໃຫ້ຮູ້ວ່າ: ຂະແໜງອະສັງຫາລິມະຊັບຫວຽດນາມ ຍັງຄົງດຶງດູດນັກລົງທຶນຕ່າງປະເທດ, ດ້ວຍ FDI ເພີ່ມຂຶ້ນ 4,8% ເມື່ອທຽບໃສ່ປີ ຕໍ່ປີ. ໂດຍຂະແໜງການດັ່ງກ່າວໄດ້ດຶງດູດມູນຄ່າການລົງທຶນ FDI ເກືອບ 4,67 ຕື້ໂດລາສະຫະລັດໃນປີກາຍນີ້, ເປັນອັນດັບສອງໃນການດຶງດູດທຶນຕ່າງປະເທດໃນທົ່ວປະເທດ.
https://www.facebook.com/photo?fbid=935422438271213&set=a.563325788814215
ຕິດຕາມຂ່າວທັງໝົດຈາກ LaoX: https://laox.la/all-posts/