12 ປີຫຼັງຈາກເກີດແຜ່ນດິນໄຫວ ແລະ ຄື້ນສຶນາມິໄດ້ໂຈມຕີໂຮງໄຟຟ້ານິວເຄຼຍ Fukushima Daiichi ແຮງສັ່ນສະເທືອນຍັງສົ່ງຜົນກະທົບຕໍ່ຕະຫຼາດອາຫານທະເລໂລກ, ໂດຍສະເພາະແມ່ນເມືອງຟຸກຸຊິມະ, ອະດີດທ່າກຳປັ່ນສຳຄັນທີ່ສົ່ງອອກອາຫານທະເລໄປທົ່ວໂລກ.
ການປ່ອຍນໍ້າເປື້ອນ ຈາກໂຮງງານໄຟຟ້ານິວເຄຼຍ Fukushima ລົງສູ່ທະເລໃນປີ 2023 ເຮັດໃຫ້ເກີດຄວາມກັງວົນຕໍ່ຜູ້ບໍລິໂພກທົ່ວໂລກ. ໂດຍສະເພາະແມ່ນຈີນ ເຊິ່ງເປັນຕະຫຼາດນໍາເຂົ້າຫຼັກທີ່ໄດ້ປະກາດຊະລໍການນໍາເຂົ້າອາຫານທະເລຈາກຍີ່ປຸ່ນ ເຮັດໃຫ້ສ່ວນແບ່ງຕະຫຼາດຂອງຍີ່ປຸ່ນຫຼຸດລົງ.
ເຖິງວ່າຍີ່ປຸ່ນໄດ້ອອກມາອະທິບາຍວ່າມີມາດຕະການຄວາມປອດໄພລະດັບສາກົນຫຼາຍປານໃດໃນການບຳບັດນ້ຳ. ແຕ່ເຖິງຢ່າງໃດກໍຕາມ, ບໍລິສັດໄຟຟ້າໂຕກຽວ (TEPCO) ໄດ້ສືບຕໍ່ປ່ອຍນ້ຳບຳບັດໃນວັນທີ 28 ກຸມພາ 2024, ເຊິ່ງເປັນຄັ້ງທີ 4 ຫຼັງຈາກໄດ້ປ່ອຍອອກມາ 3 ຄັ້ງໃນປີ 2023.
ສະມາຄົມຮ່ວມມືການປະມົງຢູ່ຍີ່ປຸ່ນກວ່າ 80% ຂອງ ໄດ້ຮັບຜົນກະທົບຈາກການຊະລໍການນຳເຂົ້າຂອງຈີນ. ໃນທາງກົງກັນຂ້າມ, ໄທກັບໄດ້ຮັບໂອກາດໃນການຂະຫຍາຍຕະຫຼາດອາຫານທະເລ ແລະ ອາຫານທະເລເເປຮູບ.
ທ່ານ ວິສິດ ລິມລືຊາ ຮອງປະທານສະພາການຄ້າໄທໄດ້ວິເຄາະວ່າ: ຜູ້ບໍລິໂພກໄທອາດມີຄວາມວິຕົກກັງວົນ ແລະ ຊະລໍການບໍລິໂພກອາຫານທະເລຈາກຍີ່ປຸ່ນ. ແຕ່ໄທຍັງມີມາດຕະການກວດກາຢ່າງເຂັ້ມງວດ.
ໃນຂະນະທີ່ອຸດສາຫະກໍາອາຫານທະເລແປຮູບ ໄທກໍໄດ້ນຳເຂົ້າວັດຖຸດິບຈາກຫຼາຍປະເທດໂດຍມີຂະບວນການທົດສອບທີ່ເຄັ່ງຄັດເພື່ອສ້າງຄວາມໝັ້ນໃຈໃຫ້ກັບຜູ້ບໍລິໂພກ.
ອີງຈາກຂໍ້ມູນທີ່ໄດ້ຮັບມາສະແດງໃຫ້ເຫັນການປ່ຽນແປງຂອງ ຕະຫຼາດອາຫານທະເລທີ່ນໍາເຂົ້າໃນປະເທດຈີນດັ່ງຕໍ່ໄປນີ້:
ໃນປີ 2022
- ໄທເປັນຄູ່ຮ່ວມມືການຄ້າອັນດັບ 11 ຂອງຈີນສຳລັບຜະລິດຕະພັນພິກັດ 03 ອາຫານທະເລສົດ, ເເຊ່ເຢັນ, ແຊ່ແຂງ ແລະ ແຫ້ງກວມປະມານ 2%, ເປັນມູນຄ່າ 382.3 ລ້ານໂດລາ.
- ໄທເປັນຄູ່ການຄ້າໃຫຍ່ອັນດັບສາມຂອງຈີນສຳລັບຜະລິດຕະພັນພິກັດ 1604 ແລະ 1605. ປາແປຮູບ ແລະ ອາຫານທະເລກວມເອົາປະມານ 14%, ຄິດເປັນມູນຄ່າ 47.5 ລ້ານໂດລາ.
ປີ 2023
- ໄທຄອງສ່ວນແບ່ງຕະຫຼາດ ເພີ່ມຂຶ້ນເປັນ 2.2% ສຳລັບຜະລິດຕະພັນພິກັດ 03, ຄິດເປັນມູນຄ່າ 415.8 ລ້ານໂດລາ.
- ໄທຄອງສ່ວນແບ່ງຕະຫຼາດ ເພີ່ມຂຶ້ນເປັນ 16% ສຳລັບຜະລິດຕະພັນພິກັດ 1604 ແລະ 1605, ຄິດເປັນມູນຄ່າ 55 ລ້ານໂດລາ.
- ການສົ່ງອອກອາຫານທະເລຂອງໄທໄປຈີນໄດ້ເພີ່ມຂຶ້ນ 41 ລ້ານໂດລາ.
ສິນຄ້າທີ່ຈີນມັກນໍາເຂົ້າຈາກໄທປະກອບມີ:
- ກຸ້ງແຊ່ແຂງ
- ປາແຊ່ແຂງ
- ປູແຊ່ເຢັນ ແລະ ແຊ່ແຂງ
- ກຸ້ງກະປ໋ອງ
- ປາທູນ່າກະປ໋ອງ
- ປາໝຶກກະປ໋ອງ
- ປາຊາດີນກະປ໋ອງ ແລະ ປາແມັກເຄີເຣວ
ທ່ານວິສິດຍັງກ່າວຕື່ມວ່າ, ຖ້າໄທສ້າງຄວາມໝັ້ນໃຈຕໍ່ຄວາມປອດໄພຂອງອາຫານທະເລ ແລະ ມາດຕະການກວດກາການນຳເຂົ້າຢ່າງເຂັ້ມງວດ, ຈະເປັນໂອກາດທີ່ດີໃນການຂະຫຍາຍຕະຫຼາດສົ່ງອອກ.
ສະຫຼຸບ, ເຫດການ Fukushima ໄດ້ສົ່ງຜົນກະທົບຕໍ່ຕະຫຼາດອາຫານທະເລຂອງໂລກ. ໄທມີໂອກາດໃນການຂະຫຍາຍຕະຫຼາດອາຫານທະເລ ແລະ ອາຫານເເປຮູບ, ເເຕ່ຕ້ອງສ້າງຄວາມເຊື່ອໝັ້ນດ້ານຄວາມປອດໄພ ແລະ ມາດຕະການກວດກາທີ່ເຂັ້ມງວດຂຶ້ນ ເພື່ອຄວາມສະບາຍໃຈຂອງຜູ້ບໍລິໂພກ.
ທີ່ມາ:
ຕິດຕາມຂ່າວທັງໝົດຈາກ LaoX: https://laox.la/all-posts/