ໃນປັດຈຸບັນ, ເຕັກໂນໂລຊີປັນຍາປະດິດ (AI) ໄດ້ເຂົ້າມາມີບົດບາດສໍາຄັນໃນໂລກການສຶກສາຂອງສະຫະລັດຫຼາຍຂຶ້ນ. ນັກຮຽນສ່ວນຫຼາຍເລີ່ມທີ່ຈະນຳໃຊ້ AI ເພື່ອຂຽນບົດຄວາມ (essay), ໃນສ່ວນຂອງຄູສອນກໍໄດ້ໃຊ້ AI ເພື່ອກວດກາວຽກງານຂອງເຂົາເຈົ້າ, ຈຶ່ງເຮັດໃຫ້ຄວາມສະດວກ ແລະ ວ່ອງໄວຍິ່ງຂຶ້ນ. ແຕ່ຄວາມສະດວກສະບາຍນີ້ກຳລັງຂ້າມເສັ້ນຂອງຈັນຍາບັນການສຶກສາບໍ?
- ນັກຮຽນທີ່ໃຊ້ AI ໃນການຂຽນບົດຄວາມ (essay)
AI ຈາກບໍລິສັດເຕັກໂນໂລຊີເຊັ່ນ ChatGPT, Copilot, Gemini ຕ່າງກໍເຂົ້າມາມີບົດບາດໃນໂລກຂອງການສອນ ແລະ ການຮຽນຮູ້. ນັກຮຽນໃຊ້ເຄື່ອງມືເຫຼົ່ານີ້ເພື່ອຊ່ວຍເຮັດວຽກບ້ານ ນັບຕັ້ງແຕ່ການຄິດໄລ່ໄປຈົນເຖິງການຂຽນບົດຄວາມວິເຄາະ. ໂດຍເຄື່ອງມືເຫຼົ່ານີ້ຊ່ວຍປັບປຸງຮູບແບບພາສາໃຫ້ເໝາະສົມ, ສາມາດກວດສອບເບິ່ງໄວຍາກອນວ່າຖືກຕ້ອງຫຼືບໍ່, ໃຫ້ຄະແນນສຳລັບບົດທີ່ຂຽນ ແລະ ຊ່ວຍໃຫ້ນັກຮຽນໄດ້ຮັບຄະແນນທີ່ສູງຂຶ້ນ.
ແຕ່ໃນການໃຊ້ AI ໃນການຂຽນບົດຄວາມ (essay) ອາດຈະເຮັດໃຫ້ບົດຄວາມຂອງເຮົາບໍ່ລ່ຽນໄຫຼສະເໝີໄປ, ເນື່ອງຈາກ AI ຈະປະມວນຜົນຈາກແຫຼ່ງຂໍ້ມູນທີ່ມີ ແລະ ອາດມີການຄັດລອກເອົາເນື້ອຫາອື່ນໆ, ອາດຈະຜິດບໍລິບົດ ຫຼື ບໍ່ກົງກັບໂຈດທີ່ໄດ້ມາ.
ແລະທີ່ສໍາຄັນກໍຍັງມີບັນຫາ ຫຼື ຜິດຈັນຍາບັນໃນການຮຽນ-ການສອນ ທີ່ໃນຄວາມເປັນຈິງ, ການເຮັດວຽກບ້ານຈະຕ້ອງເຮັດດ້ວຍຕົວຕົວເອງ, ໃຊ້ທັກສະທີ່ເຮົາມີໃນການຂຽນ ລວມທັງການກວດສອບຄວາມເປັນລະບຽບຮຽບຮ້ອຍເພື່ອສະທ້ອນເຖິງປະສິດທິພາບຂອງນັກຮຽນໃນດ້ານນີ້ວ່າມີຫຼາຍໜ້ອຍເທົ່າໃດ.
- ຄູສອນທີ່ໃຊ້ AI ໃນການກວດວຽກບ້ານຂອງນັກຮຽນ
ໃນທາງກົງກັນຂ້າມ, ຄູສອນກໍເລີ່ມໃຊ້ AI ເພື່ອກວດເບິ່ງວຽກບ້ານຂອງນັກຮຽນເຊັ່ນດຽວກັນ. ໂດຍ Diane Gateski ອາຈານສອນດ້ານຍຸດທະສາດການສື່ສານຂອງມະຫາວິທະຍາໄລ Ithaca ກ່າວວ່າ ລາວໄດ້ໃຊ້ ChatGPT ເພື່ອກວດເບິ່ງບົດຂຽນຂອງນັກຮຽນ ແລະ ແນະນໍາໃຫ້ນັກຮຽນໃຊ້ເຄື່ອງມືດັ່ງກ່າວໃນການກວດສອບຄືນຮ່າງທໍາອິດຂອງ essay ເພື່ອປັບປຸງວຽກງານໃຫ້ດີຂຶ້ນ.
ເຊິ່ງການນຳໃຊ້ AI ໃນການກວດ Essay ຈະມີຂໍ້ດີບ່ອນທີ່ເຮົາສາມາດກວດວຽກຄືນໄດ້ຢ່າງວ່ອງໄວ ແລະ ເໝາະສຳລັບການຮຽນການສອນເປັນກຸ່ມໃຫຍ່. ແຕ່ຂໍ້ເສຍກໍມີເຊັ່ນກັນ ເພາະມັນບໍ່ສາມາດແນະນໍາຄວາມຄິດສ້າງສັນ, ການວິເຄາະໃນເຊີງເລິກ ເຊິ່ງນີ້ຄູສອນຄວນທີ່ຈະກວດເບິ່ງວຽກງານຂອງນັກຮຽນດ້ວຍຕົນເອງ.
ທັງນີ້, ສະຖາບັນການສຶກສາຫຼາຍແຫ່ງໃນສະຫະລັດອາເມຣິກາເລີ່ມພັດທະນານະໂຍບາຍກ່ຽວກັບ AI ເພື່ອໃຊ້ກັບນັກຮຽນ ແລະ ຄູສອນ, ບໍ່ວ່າຈະເປັນເລື່ອງການຢືນຢັນຕົນເອງເພື່ອໃຫ້ມີຄວາມໂປ່ງໃສທີ່ຈະບໍ່ໃຊ້ AI ເຂົ້າໃນການຊ່ວຍຂຽນບົດຄວາມ ຫຼື ເຕືອນ ບໍ່ໃຫ້ໃຊ້ AI ໃນການສົ່ງມອບວຽກຕ່າງໆ, ແຕ່ນັ້ນກໍ່ບໍ່ແມ່ນເລື່ອງງ່າຍທີ່ຈະຢຸດການນຳໃຊ້ AI ເຂົ້າໃນການສຶກສາ ເພາະເຕັກໂນໂລຊີມີການປ່ຽນແປງຢູ່ຕະຫຼອດເວລາ.
ທີ່ມາ:
ຕິດຕາມຂ່າວທັງໝົດຈາກ LaoX: https://laox.la/all-posts/
