ຫຼັງຈາກຕະຫຼາດຫຼັກຊັບລອນດອນ ໄດ້ປະກາດຮອງຮັບເອົາການຍື່ນຂໍ ETN (Exchange Traded Notes) ສໍາລັບ Bitcoin ແລະ Ethereum ເມື່ອສອງອາທິດທີ່ຜ່ານມາ. ຫຼ້າສຸດກໍໄດ້ມີການປະກາດມື້ສຳລັບການການຊື້ຂາຍ ETN ຢ່າງເປັນທາງການ ໂດຍຈະເລີ່ມຕົ້ນໃນວັນທີ 28 ພຶດສະພາທີ່ຈະມາເຖິງນີ້.
ຕະຫຼາດຫຼັກຊັບລອນດອນ (LSE) ກ່າວວ່າ “ເພື່ອຮັບປະກັນວ່າຜູ້ສະເໜີຂາຍອອກຫຼັກຊັບ ETN ຈະປະຕິບັດຕາມຂໍ້ກໍານົດທີ່ໄດ້ລະບຸໄວ້ໃນເອກະສານຂໍ້ມູນ Crypto ETN ຢ່າງຄົບຖ້ວນ. ນອກຈາກນີ້ຍັງໄດ້ໃຫ້ອົງການຈັດຕັ້ງເຫຼົ່ານີ້ໃຊ້ເວລາໃນການກະກຽມເອກະສານສໍາລັບການສ້າງໂປຣແກຣມ Crypto ETN. ເຊິ່ງຈໍາເປັນຕ້ອງມີໃບສະເໜີແນະພື້ນຖານ (base prospectus) ຈາກ FCA ຈຶ່ງໄດ້ກໍານົດໃຫ້ວັນທີ 28 ພຶດສະພາເປັນມື້ເລີ່ມຕົ້ນໃນການຊື້ຂາຍ.
ອີງຕາມທີ່ໄດ້ລະບຸໄວ້ໃນເອກະສານຂໍ້ມູນ Crypto ETN, ໄດ້ມີຂໍ້ກໍານົດບາງຢ່າງເຊິ່ງໄດ້ແກ່ “ETNs ທີ່ໄດ້ຮັບອະນຸຍາດສໍາລັບການຊື້ຂາຍໃນຕະຫຼາດຫຼັກຊັບລອນດອນ (LSE) ແມ່ນເໝາະສໍາລັບນັກລົງທຶນມືອາຊີບເທົ່ານັ້ນ ແລະ ມີການຊື້ຂາຍພຽງແຕ່ຢູ່ໃນກຸ່ມການຄ້າທີ່ກໍານົດຢ່າງຊັດເຈນວ່າ ສໍາລັບນັກລົງທຶນມືອາຊີບເທົ່ານັ້ນ”
ETN (Exchange Traded Notes) ແມ່ນ ຕາສານໜີ້ຊະນິດໜຶ່ງທີ່ມີການເຄື່ອນໄຫວຕາມລາຄາສິນຊັບອ້າງອີງ. ດັ່ງນັ້ນ, Crypto ETN ຈະຊ່ວຍໃຫ້ນັກລົງທຶນສາມາດຊື້ຂາຍຫຼັກຊັບທີ່ລາຄາສະທ້ອນໃຫ້ເຫັນເຖິງການເໜັງຕີງຂອງສິນຊັບດິຈິຕອນໃນຕະຫຼາດຫຼັກຊັບໄດ້.
ທັງນີ້, ໃນປະກາດຍັງໄດ້ລະບຸວ່າ ຜູ້ສະເໜີຂາຍ ETN ທີ່ຕ້ອງການຍື່ນຂໍອະນຸມັດການຊື້ຂາຍຫຼັກຊັບ ຈະຕ້ອງຍື່ນເອກະສານກ່ອນກຳນົດເສັ້ນຕາຍໃນວັນທີ 15 ເມສາ ແລະ ຈະໄດ້ຮັບການອະນຸມັດພາຍໃນວັນທີ 22 ພຶດສະພາ.
ທີ່ມາ:
ຕິດຕາມຂ່າວທັງໝົດຈາກ LaoX: https://laox.la/all-posts/