ຖ້າເວົ້າເຖິງການບໍລິຈາກສິ່ງຂອງຕາມໂຄງການຕ່າງໆ ຫຼາຍຄົນອາດຈະນຶກເຖິງພາບທີ່ເຮົານຳເອົາສິ່ງຂອງ, ອາຫານ ຫຼື ອຸປະກອນຕ່າງໆໄປມອບໃຫ້ກັບໂຄງການ ແຕ່ສຳລັບໂຄງການ Pubes for the Planet ການບໍລິຈາກສິ່ງຂອງໃນຮູບແບບເກົ່າໆ ອາດຈະຟັງເບິ່ງທໍາມະດາໄປ ເພາະວ່າໂຄງການນີ້ຈະເປີດຮັບບໍລິຈາກຂົນໝໍອ້ອຍ (ຂົນທີ່ຂຶ້ນບໍລິເວນອະໄວຍະວະເພດ) ເພື່ອເປັນການຮັກສາໂລກ ແລະ ຍັງສາມາດນຳຂົນດັ່ງກ່າວມາແລກກັບຄຣີມໂກນຂົນໄດ້.
ສຳລັບຄົນທີ່ໄດ້ອ່ານເນື້ອຫາຂອງໂຄງການ ຫຼື ເບິ່ງຜ່ານໆ ອາດຈະຟັງຮູ້ສຶກວ່າມັນແປກ ແລະ ຄິດສົງໄສວ່າຜູ້ທີ່ເປັນຄົນຕົ້ນຄິດໂຄງການນີ້ ແມ່ນເຮັດເພື່ອຫຍັງ? ຕ້ອງການຫຍັງ? ແຕ່ໃນຄວາມເປັນຈິງແລ້ວເສັ້ນຂົນຂອງຄົນເຮົານັ້ນມີຄຸນສົມບັດທີ່ສາມາດຊ່ວຍໂລກໄດ້.
ເຖິງຈະເປັນແບບນັ້ນແຕ່ຫຼາຍໆຄົນເວລາທີ່ໂກນຫຼືແຖຂົນຕ່າງໆ ແມ່ນເລືອກທີ່ຈະຖິ້ມມັນລົງທໍ່ນ້ຳ ຫຼື ຖັງຂີ້ເຫຍື້ອ ເຊິ່ງມັນສາມາດໄຫຼສູ່ແຫຼ່ງນ້ຳໃກ້ຄຽງເຮັດໃຫ້ເກີດພາວະ ຢູໂທຣຟິເຄຊັ່ນ (Eutrophication) ໂດຍມັນເປັນມົນລະພິດປະເພດໜຶ່ງທີ່ເປັນອັນຕະລາຍຕໍ່ສິ່ງທີ່ມີຊີວິດໃນທະເລ.
ເພື່ອປ້ອງກັນການເກີດເລື່ອງທີ່ກ່າວມາຂ້າງເທິງ ໂຄງການ Pubes for the Planet ຈຶ່ງມີຈຸດປະສົງອອກມາເກັບຮວບຮວມຂົນພວກນັ້ນ ເພື່ອຊ່ວຍໂລກ.
ສາມາດເບິ່ງວິດີໂອການແນະນຳກ່ຽວກັບໂຄງການໄດ້ທີ່: https://cutt.ly/CSwJUEk
ໂຄງການດັ່ງກ່າວ ໄດ້ຮັບຜົນຕອບຮັບດີແບບບໍ່ໜ້າເຊື່ອ ຈົນເລື່ອງລາວທີ່ຟັງວ່າແປກຢູ່ນີ້ ເກີດເປັນຂ່າວທີ່ແປກຍິ່ງກວ່າເກົ່າ ເພາະຕັ້ງແຕ່ເປີດໂຄງການມາທາງບໍລິສັດ EOS (ບໍລິສັດຜະລິດລິບມັນ) ແລະ ອົງກອນບໍ່ສະແຫວງຫາຜົນກຳໄລ Matter of Trust ຜູ້ທີ່ຢູ່ເບື້ອງຫຼັງຂອງໂຄງການນີ້ ພົບວ່າ ມີຜູ້ຄົນຈຳນວນຫຼວງຫຼາຍ ໄດ້ສົ່ງຂົນໝໍອ້ອຍຂອງຕົນເອງມາໃຫ້ກັບໂຄງການຢ່າງມະຫາສານ ຈົນເຮັດໃຫ້ຂະໜາດຂອງສະຖານທີ່ເກັບຂົນທີ່ໂຄງການໄດ້ກຽມໄວ້ບໍ່ພໍຕໍ່ຈຳນວນທີ່ທາງຜູ້ຄົນສົ່ງມາ.
ຈາກກະແສຕອບຮັບທີ່ດີເກີນຄາດ ທາງໂຄງການກໍໄດ້ອອກມາກ່າວວ່າ “ຂອບໃຈທຸກຄົນແທ້ໆ ທີ່ມອບເປົ້າໝາຍໃຫ້ກັບຂົນໝໍອ້ອຍຂອງພວກເຈົ້າ” ແລະ ຈາກຄວາມສຳເລັດນີ້ໃນປັດຈຸບັນໂຄງການ Pubes for the Planet ກໍໄດ້ອອກມາບອກວ່າພວກເຂົາກຳລັງມີແຜນທີ່ຈະສ້າງສວນສາທາລະນະເຊິ່ງມີການເຮັດ “ຂອງເສຍທີ່ຍ່ອຍສະຫຼາຍໄດ້” ມານຳໃຊ້ເພື່ອເປັນການບຳລຸງດິນແລະປູກຄົ້ນໄມ້ໂດຍສະເພາະ.
ສຳລັບຜູ້ທີ່ໄດ້ສົ່ງຂົນໝໍອ້ອຍມາໃຫ້ກັບທາງໂຄງການ ແມ່ນຈະໄດ້ຄຣີມໂກນຂົນຈາກ EOS ເປັນການຕອຍແທນ ເອີ້ນໄດ້ວ່າໂຄງການນີ້ທັງໄດ້ຮັກສາໂລກ ແລະ ນຳໃຊ້ຂົນໝໍອ້ອຍແບບບໍ່ສູນເປົ່າ ບໍ່ແນ່ວ່າໃນອະນາຄົດໂຄງການນີ້ອາດຈະເປັນໂຄງການໜຶ່ງທີ່ກະຈາຍໄປທົ່ວໂລກກໍເປັນໄດ້.
ທີ່ມາ:
ຕິດຕາມຂ່າວທັງໝົດຈາກ LaoX: https://laox.la/all-posts/
