Perfectionist ຫຼື ບຸກຄົນທີ່ຫຼົງໃຫຼໃນຄວາມສົມບູນແບບນັ້ນ ທຸກສິ່ງທຸກຢ່າງທີ່ເຮັດ ຫຼື ວ່າທຸກສິ່ງຢ່າງທີ່ພວກເຂົາພົບຕ້ອງບໍ່ມີຂໍ້ບົກພ່ອງ, ບໍ່ຄວນເກີດຂໍ້ຜິດພາດ ແລະ ລົ້ມເຫຼວ ບໍ່ວ່າຈະເປັນການເຮັດວຽກ, ການເງິນ, ທຸລະກິດ, ຫລື ຄວາມສຳເລັດໃນທຸກດ້ານ. ສະນັ້ນ, ການດຳລົງຊີວິດຂອງບຸກຄົນປະເພດນີ້ ແມ່ນຕ້ອງລະວັງທຸກຢ່າງເພື່ອໃຫ້ວຽກງານ ຫຼື ສິ່ງໃດກໍຕາມທີ່ພວກເຂົາກຳລັງເຮັດຢູ່ນັ້ນ ຕ້ອງອອກມາສົມບູນແບບຫຼາຍທີ່ສຸດເທົ່າທີ່ຈະເປັນໄປໄດ້.
ລັກສະນະສັນຍານທີ່ບອກເຖິງຄົນທີ່ເປັນ Perfectionist
1. ຕັ້ງເປົ້າໝາຍສູງ, ເຮັດວຽກໜັກເພື່ອເປົ້າໝາຍທີ່ຕັ້ງໄວ້. ຖ້າຫາກວ່າເຮັດແລ້ວ ແຕ່ບໍ່ໄດ້ຕາມເປົ້າໝາຍຂອງຕົນຈະຮູ້ສຶກຜິດຫວັງຫຼາຍ ແລະ ຮູ້ສຶກລົ້ມເຫຼວ
2. ເຄັ່ງຄັດໃນຄວາມບໍ່ສົມບູນຂອງຕົນເອງ. ຖ້າຕົນເອງເຄີຍເຮັດຜິດແລ້ວຈະບໍ່ປ່ອຍວາງຄວາມຜິດພາດນັ້ນໄປ
3. Perfectionist ຈະມີຄວາມຮູ້ສຶກຢ້ານວ່າ ຖ້າບໍ່ບັນລຸເປົ້າໝາຍ ຫຼື ປະສົບຜົນສຳເລັດໜ້ອຍກວ່າເປົ້າໝາຍທີ່ຕົນຕັ້ງໄວ້ ນັ້ນມັນຄືເປັນຄວາມລົ້ມເຫຼວ
4. ການຕັ້ງເປົ້າໝາຍໄວ້ສູງຈົນບາງຄັ້ງເປົ້າໝາຍນັ້ນເກີນຂອບເຂດຂອງທີ່ຕົນເອງເຮັດໄດ້ ສົ່ງຜົນໃຫ້ກົດດັນໃນຕົນເອງສູງ
5. Perfectionist ມີຄວາມຕັ້ງໃຈຫຼາຍທີ່ຈະບັນລຸເປົ້າໝາຍຈຶ່ງເຮັດໃຫ້ລະຫວ່າງທາງ ພວກເຂົາຮູ້ສຶກວ່າເຮັດວຽກບໍ່ມ່ວນ, ເຮັດມັນອອກຈາກຄວາມອິດເມື່ອຍ ແລະ ບໍ່ມີຄວາມສຸກ
6. ຖ້າມື້ນີ້ເຮັດໄດ້ບໍ່ດີ ເຂົາຈະບໍ່ເຮັດຫຍັງເລີຍໃນມື້ນັ້ນ ເພື່ອຫຼີກເວັ້ນຄວາມລົ້ມເຫຼວ
7. ບຸກຄົນທີ່ມີຄວາມສົມບູນແບບ ມັກມີການຕອບໂຕ້ ຫຼື ຕັ້ງຖ້າຮັບສຳລັບຄຳວິພາກວິຈານທີ່ໄດ້ຮັບ
8. Perfectionist ຈະມີການວິພາກວິຈານຕົນເອງ, ຫຼຸດຜ່ອນຄຸນຄ່າຂອງຕົນເອງ. ມີຄວາມນັບຖືຕົນເອງຕໍ່າ ເມື່ອຕົນລົ້ມເຫຼວ ເຊິ່ງສົ່ງຜົນກະທົບຮ້າຍແຮງຕໍ່ສຸຂະພາບຈິດໄດ້
9. ມັກມີການຄາດຄະເນໄວ້ລ່ວງໜ້າ
ຂໍ້ດີຂອງຄົນທີ່ມີນິດໄສຮັກໃນຄວາມສົມບູນແບບ
1. ມີຄວາມຮອບຄອບ ແລະ ເກັບທຸກລາຍລະອຽດ ເຊັ່ນ: ວຽກທີ່ໄດ້ຖືກມອບໝາຍ ແມ່ນອອກມາຢ່າງສົມບູນ, ລາຍລະອຽດຊັດເຈນ
2. ມີເປົ້າໝາຍໜັກແໜ້ນ ສົ່ງຜົນໃຫ້ອັດຕາຜົນສຳເລັດສູງ
3. ຖືກເລືອກໃຫ້ເປັນຜູ້ນໍາ
4. Perfectionist ຈະມີຄວາມຮູ້, ຄວາມສາມາດ, ພິບໄຫວ ແລະ ແກ້ໄຂບັນຫາສະເພາະໜ້າໄດ້ທັນທີ
5. ບຸກຄະລິກ Perfectionist ແມ່ນເໝາະສໍາລັບການເຮັດວຽກທີ່ຕ້ອງການຄວາມລະອຽດສູງ
ເຖິງຢ່າງໃດກໍຕາມ, ຂໍ້ດີກໍຍ່ອມຄຽງຄູ່ກັບການມີຂໍ້ເສຍເຊັ່ນກັນ. ຂໍ້ເສຍຂອງຄົນທີ່ມີນິດໄສຮັກໃນຄວາມສົມບູນແບບ:
- ຄວາມສົມບູນແບບ ອາດຈະກົດດັນຄົນອື່ນໂດຍບໍ່ຮູ້ຕົວ.
- ຄວາມຄາດຫວັງສູງຈົນສົ່ງພະລັງງານທາງລົບໃຫ້ກັບຜູ້ອື່ນ.
- ບັນຍາກາດໃນການເຮັດວຽກເຕັມໄປດ້ວຍຄວາມເຄັ່ງຕຶງ
- ເມື່ອຜົນງານບໍ່ດີ ຫຼື ພົບກັບຄວາມບໍ່ສົມບູນ ຈະຮູ້ສຶກຫງຸດງິດໃຈ
- ຄຽດງ່າຍ, ສຸຂະພາບກາຍ ແລະ ຈິດໃຈຂອງຕົນຊຸດໂຊມໂດຍບໍ່ຮູ້ຕົວ.
ອ້າງອີງ:
ຕິດຕາມຂ່າວທັງໝົດຈາກ LaoX: https://laox.la/all-posts/