ໃນວັນຈັນທີ່ຜ່ານມາ, ໜັງສືພິມເສດຖະກິດລາຍວັນ (Economic Daily) ຂອງລັດຖະບານຈີນໄດ້ເຜີຍແຜ່ບົດຄວາມເຕືອນນັກລົງທຶນກ່ຽວກັບຄວາມສ່ຽງຂອງການລົງທຶນໃນ crypto. ບົດຄວາມນີ້ໄດ້ຖືກພິມເຜີຍແຜ່ໃນເວລາທີ່ລາຄາຂອງ Bitcoin ເພີ່ມຂຶ້ນເເຕະລະດັບ 64,000 ໂດລາເຊິ່ງເປັນຈຸດສູງສຸດໃນຮອບ 2 ປີ. ໂດຍໃນປັດຈຸບັນລາຄາຂອງ Bitcoin ກໍໄດ້ເເຕະລະດັບ 68,000 ໂດລາເຮັດຈຸດສູງສຸດໃໝ່ເປັນທີ່ຮຽບຮ້ອຍເເລ້ວ.
ໜັງສືພິມໄດ້ລະບຸວ່າ ລາຄາ Bitcoin ທີ່ຟື້ນຕົວນັ້ນບໍ່ໄດ້ໝາຍຄວາມວ່າ ຄວາມສ່ຽງພື້ນຖານທີ່ກ່ຽວຂ້ອງກັບສິນຊັບດິຈິຕອນນີ້ຈະໝົດໄປ.
“ນັກລົງທຶນຄວນລະວັງຄວາມສ່ຽງທີ່ກ່ຽວຂ້ອງກັບ Bitcoin ແລະ ຜະລິດຕະພັນທີ່ມີມູນຄ່າທີ່ເຊື່ອມໂຍງກັບ cryptocurrencies”
ໜັງສືພິມ Economic Daily ຂອງລັດຖະບານຈີນ ຍັງອ້າງເຖິງຄໍາເວົ້າຂອງທະນາຍຄວາມຊາວປັກກິ່ງ Xiao Sa ກ່ຽວກັບການອະນຸມັດ Bitcoin Spot ETFs ທີ່ຜ່ານມາໃນສະຫະລັດ. ໂດຍທະນາຍຄວາມຄົນນີ້ໃຫ້ຄວາມເຫັນວ່າ ການອະນຸມັດ Bitcoin Spot ETFs ໃນສະຫະລັດຈະຊ່ວຍຫຼຸດອຸປະສັກໃນການເຂົ້າສູ່ຕະຫຼາດສໍາລັບນັກລົງທຶນຕ່າງຊາດ ເເລະ ຍັງຊ່ວຍກະຕຸ້ນກິດຈະກໍາການຊື້ຂາຍໃນຕະຫຼາດ crypto
ແນວໃດກໍດີ, Xiao Sa ກ່າວຢ້ຳວ່າ ບໍລິສັດທີ່ເຮັດໜ້າທີ່ເປັນຕົວແທນຈໍາໜ່າຍເງິນທຶນເຫຼົ່ານັ້ນຢູ່ຕ່າງປະເທດ ບໍ່ສາມາດຂາຍຜະລິດຕະພັນທາງດ້ານການເງິນທີ່ກ່ຽວຂ້ອງກັບ Bitcoin ໃຫ້ກັບປະຊາຊົນຊາວຈີນໄດ້. ທັງນີ້, ຈີນຍັງໄດ້ຫ້າມບໍ່ໃຫ້ຊື້ຜະລິດຕະພັນທາງດ້ານການເງິນທີ່ກ່ຽວຂ້ອງໂດຍກົງກັບ crypto ໂດຍຜ່ານເຄື່ອງມືທາງດ້ານການເງິນໃດໆ
Zhao Wei ນັກຄົ້ນຄວ້າອາວຸໂສຂອງ OKX ກ່າວຕື່ມວ່າມີຄວາມກັງວົນອື່ນໆໃນຕະຫຼາດ crypto ເຊັ່ນ: ຄວາມບໍ່ແນ່ນອນທາງດ້ານເສດຖະກິດມະຫາພາກເພີ່ມຂຶ້ນ, ເຫດການທີ່ບໍ່ຄາດຄິດໃນອຸດສາຫະກໍາ ເເລະ ນະໂຍບາຍກົດລະບຽບທີ່ບໍ່ຊັດເຈນ.
ຄຳເຕືອນດັ່ງກ່າວໄດ້ເກີດຂຶ້ນຫຼັງຈາກທີ່ລາຄາຂອງ Bitcoin ໄດ້ເພີ່ມຂຶ້ນ 60% ໃນປີນີ້, ໂດຍເພີ່ມຂຶ້ນສູງໃນອາທິດທີ່ຜ່ານມາ ເເລະ ໃນມື້ນີ້ລາຄາຂອງ Bitcoin ກໍສາມາດຢືນເໜືອລະດັບ 68,000 ໂດລາໄດ້ເຊິ່ງເປັນສະຖິຕິສູງສຸດໃໝ່. ປະລິມານການຊື້ຂາຍຂອງ Bitcoin ເເມ່ນໄດ້ຮັບເເຮງຂັບເຄື່ອນຈາກກອງທຶນ Bitcoin ທີ່ໄດ້ລົງທະບຽນຢູ່ໃນສະຫະລັດ, ເຊິ່ງເພີ່ມຂຶ້ນຢ່າງຫຼວງຫຼາຍ ໃນອາທິດທີ່ຜ່ານມາ ກາຍເປັນຫົວຂໍ້ຮ້ອນແຮງໃນແພລັດຟອມອອນລາຍຂອງຈີນເຊັ່ນເວັບໄຊ microblogging Weibo.
ສື່ມວນຊົນຂອງລັດຖະບານຈີນໄດ້ພະຍາຍາມຫຼາຍເທື່ອເພື່ອເຕືອນໄພອັນຕະລາຍ ກ່ຽວກັບຄວາມສ່ຽງຈາກການເຂົ້າໄປມີສ່ວນຮ່ວມກັບ cryptocurrencies. ໂດຍອ້າງເຖິງຄວາມເປັນຫ່ວງກ່ຽວກັບການໄຫຼອອກຂອງເງິນທຶນ ແລະ ຄວາມບໍ່ສະຖຽນລະພາບທາງດ້ານການເງິນ.
ໃນເດືອນກັນຍາ 2021, ລັດຖະບານຈີນໄດ້ດຳເນີນຂັ້ນຕອນທີ່ສໍາຄັນໃນການສັ່ງຫ້າມ ໃນການໃຊ້ cryptocurrencies ທີ່ກ່ຽວຂ້ອງກັບ 10 ໜ່ວຍງານທີ່ແຕກຕ່າງກັນ. ພວກເຂົາໄດ້ປະກາດວ່າ ກິດຈະກໍາຕ່າງໆທີ່ກ່ຽວຂ້ອງກັບ crypto ແມ່ນຜິດກົດໝາຍ ເເລະ ໄດ້ຈັດເຂົ້າໃນປະເພດກິດຈະກໍາທາງດ້ານການເງິນທີ່ຜິດກົດໝາຍ. ການເຄື່ອນໄຫວນີ້ມີຈຸດປະສົງເພື່ອຫຼຸດຜ່ອນການນໍາໃຊ້ ແລະ ການຊື້ຂາຍ cryptocurrencies ພາຍໃນປະເທດ.
ເຖິງວ່າລັດຖະບານຈະປາບປາມບັນດາການເຄື່ອນໄຫວດັ່ງກ່າວຢູ່ພາຍໃນປະເທດ, ແຕ່ກໍບໍ່ໄດ້ຫ້າມບໍ່ໃຫ້ຄອບຄອງສິນຊັບຈິຕອນເຊັ່ນ Bitcoin ຫຼື Ethereum ໂດຍກົງ.
ທີ່ມາ:
ຕິດຕາມຂ່າວທັງໝົດຈາກ LaoX: https://laox.la/all-posts/
