ທ່ານ ຮອງນາຍົກລັດຖະມົນຕີ ແຫ່ງ ສປປ ລາວ ສະເໜີຕໍ່ບັນດາຜູ້ນຳໂລກ ໃນກອງປະຊຸມ UNGA 78 ທີ່ ນິວຢອກ ວ່າ ສປປ ລາວ ສະໜອງໂອກາດອັນດີໃຫ້ແກ່ການພັດທະນາ ແລະ ການລົງທຶນດ້ານພະລັງງານທົດແທນ, ຍ້ອນມີຕົ້ນທຶນຈາກທຳມະຊາດ ອັນມະຫາສານ, ຊີວະນານາພັນ ແລະ ແຫຼ່ງນ້ຳທີ່ອຸດົມສົມບູນ.
ໂດຍໃນກອງປະຊຸມ ປະຊຸມສະມັດຊາໃຫຍ່ ສປຊ ຄັ້ງທີ 78 (UNGA 78) ທີ່ນະຄອນນິວຢອກ ໃນອາທິດແລ້ວນີ້ ທ່ານ ສະເຫຼີມໄຊ ກົມມະສິດ ຮອງນາຍົກລັດຖະມົນຕີແຫ່ງ ສປປ ລາວ, ລັດຖະມົນຕີກະຊວງການຕ່າງປະເທດ ໄດ້ ລະບຸວ່າ: ໂອກາດທີ່ນອນຢູ່ໃນການເກັບກັກ ແລະ ລົດກ໊າສກາກບອນ ເຮັດໃຫ້ປະເທດລາວມີທ່າແຮງໃນການພັດທະນາອັນໃຫຍ່ຫຼວງ.
ທ່ານ ສະເຫຼີມໄຊ ກົມມະສິດ ໄດ້ສະໜັບສະໜູນການລົງທຶນ, ການເງິນ ແລະ ການຊ່ວຍເຫຼືອທາງດ້ານເຕັກນິກຕື່ມອີກ ເພື່ອຊ່ວຍໃຫ້ປະເທດພວມພັດທະນາຮັບຮູ້ຄວາມສາມາດພັດທະນາແບບຍືນຍົງຂອງ ສປປ ລາວ ແລະ ໄດ້ມີການປະກອບສ່ວນຢ່າງຫຼວງຫຼາຍເຂົ້າໃນຄວາມພະຍາຍາມແກ້ໄຂໂລກຮ້ອນ.
ທ່ານ ສະເຫຼີມໄຊ ກົມມະສິດ ກ່າວວ່າ ເຖິງວ່າປະເທດລາວ ເປັນປະເທດໜຶ່ງ ທີ່ມີການປ່ອຍອາຍພິດໃນທົ່ວໂລກໜ້ອຍທີ່ສຸດ, ແຕ່ລາວທີ່ຕົກເປັນເຫຍື່ອຂອງການປ່ຽນແປງ ຂອງດິນຟ້າ ອາກາດແລ້ວ ກໍມີຄວາມໝັ້ນໝາຍ ຢ່າງໜັກແໜ້ນ ໃນພັນທະດ້ານດິນຟ້າອາກາດສາກົນ.
ໃນນັ້ນ, ລັດຖະບານລາວ ໄດ້ຮັບຮອງເອົາ ຍຸດທະສາດແຫ່ງຊາດ ເພື່ອການປ່ຽນແປງດິນຟ້າອາກາດ.
ທ່ານຮອງນາຍົກ ກ່າວວ່າ: ແຕ່ເພື່ອຮັບປະກັນການຈັດຕັ້ງປະຕິບັດຢ່າງຄົບຖ້ວນ ແລະ ມີປະສິດທິຜົນ, ມັນຈຳເປັນຕ້ອງມີແຫຼ່ງທຶນຢ່າງພຽງພໍ ແລະ ການຊ່ວຍເຫຼືອດ້ານເຕັກນິກທີ່ຊ່ວຍໃຫ້ເຂົ້າເຖິງການເງິນດ້ານດິນຟ້າອາກາດ ແລະ ແຫຼ່ງທຶນອື່ນໆ, ເຊິ່ງຈະຊ່ວຍໜູນປະເທດທີ່ພວມພັດທະນາຢ່າງຫຼວງຫຼາຍ”.
ທ່ານ ສະເຫຼີມໄຊ ກ່າວອີກວ່າ: “ໃນເລື່ອງນີ້, ປະເທດຂອງຂ້າພະເຈົ້າຮຽກຮ້ອງໃຫ້ປະຕິບັດບັນດາຄຳໝັ້ນສັນຍາສາກົນ, ໂດຍສະເພາະແມ່ນເງິນ 100 ຕື້ໂດລາສະຫະລັດໃນດ້ານການເງິນດ້ານດິນຟ້າອາກາດໃຫ້ບັນດາປະເທດທີ່ຕ້ອງການຫຼາຍທີ່ສຸດ.”
ໂດຍບັນດາປະເທດທີ່ພັດທະນາແລ້ວໄດ້ຕົກລົງໃນປີ 2009 ທີ່ຈະປະກອບສ່ວນ 100 ຕື້ໂດລາສະຫະລັດຕໍ່ປີໃນດ້ານການເງິນດ້ານດິນຟ້າອາກາດໃຫ້ແກ່ປະເທດທີ່ທຸກຍາກໃນປີ 2020. ແຕ່ເປົ້າໝຍນີ້ບໍ່ໄດ້ບັນລຸໄດ້ ສ່ວນໜຶ່ງແມ່ນຍ້ອນການແຜ່ລະບາດຂອງ Covid.
ປະເທດລາວມີທ່າແຮງໃນການເກັບມ້ຽນ ຄາບອນໄດ້ຫຼາຍຂຶ້ນ ເນື່ອງຈາກປະເທດກຳລັງດຳເນີນໄປຕາມເປົ້າໝາຍທີ່ວາງໄວ້ ທີ່ຈະເພີ່ມເນື້ອທີ່ປ່າໄມ້ໃຫ້ໄດ້ 70 ເປີເຊັນຂອງເນື້ອທີ່ທັງໝົດ 236,800 ກິໂລຕາແມັດ ພາຍໃນປີ 2025. ປັດຈຸບັນນີ້ ປ່າໄມ້ຍັງເຫຼືອປະມານ 62%.
ໂດຍເນັ້ນໜັກເຖິງຄວາມສາມາດບົ່ມຊ້ອນດ້ານການພັດທະນາພະລັງງານທົດແທນຂອງລາວ. ທ່ານ ສະເຫຼີມໄຊ ກົມມະສິດ ໄດ້ເນັ້ນໜັກເຖິງບົດບາດສຳຄັນຂອງວິທະຍາສາດ, ເຕັກໂນໂລຊີ ແລະ ນະວັດຕະກຳໃນການຊຸກຍູ້ການພັດທະນາປະເທດຊາດຂອງລາວ ເພື່ອຊຸກຍູ້ການເຕີບໂຕສີຂຽວ ແລະ ຮອບດ້ານ, ເປັນເສດຖະກິດດິຈິຕອນ ໃນດ້ານເສດຖະກິດທີ່ມີແຫຼ່ງຊັບພະຍາກອນ ແລະ ເພີ່ມທະວີການນຳໃຊ້ຊັບພະຍາກອນທຳມະຊາດແບບຍືນຍົງ.
ທີ່ມາ:
ຕິດຕາມຂ່າວທັງໝົດຈາກ LaoX: https://laox.la/all-posts/
