ນາຍົກລັດຖະມົນຕີ ແຫ່ງ ຣາຊະອານາຈັກ ໄທ ທ່ານ ເສດຖາ ທະວີສິນ ເລັ່ງສາຍສຳພັນດຶງດູດການລົງທຶນຈາກຕ່າງປະເທດ ພ້ອມເຜີຍ ມາຮອດປັດຈຸບັນ ມີບໍລິສັດໃຫຍ່ລະດັບໂລກ ໃຫ້ຄວາມສົນໃຈ ແລະ ຈະມາລົງທຶນໃນໄທແລ້ວ ຫຼາຍພັນລ້ານໂດລາ ແນໃສ່ການຟື້ນຟູເສດຖະກິດຂອງປະເທດ.
ໂດຍ ທ່ານ ເສດຖາ ທະວີສິນ ນາຍົກລັດຖະມົນຕີແຫ່ງ ປະເທດໄທ ແລະ ລັດຖະມົນຕີກະຊວງການເງິນ ກ່າວພາຍຫຼັງເດີນທາງກັບຈາກການປະຊຸມໃຫຍ່ຂອງ ອົງການສະຫະປະຊາຊາດ (UNGA) ວ່າ: ການເດີນທາງຄັ້ງນີ້ມີພາລະກິດຫຼາຍຢ່າງ ທັງໄດ້ໂອ້ລົມກັບຜູ້ນໍາປະເທດ ພ້ອມທັງໄດ້ພົບກັບບໍລິສັດຍັກໃຫຍ່ລະດັບໂລກ ທັງ Tesla, Microsoft, Google, JP Morgan ແລະ ອື່ນໆ ອີກຫຼາຍບໍລິສັດ.
ທ່ານເສດຖາ ກ່າວຕື່ມວ່າ: ບໍລິສັດເຫຼົ່ານີ້ສົນໃຈມາລົງທຶນໃນປະເທດໄທ ບາງບໍລິສັດມາລົງທຶນໃນຮູບແບບຕ່າງໆແລ້ວ. ໜ້າທີ່ຂອງຂ້າພະເຈົ້າແມ່ນການປະກາດໃຫ້ທຸກຄົນຮູ້ວ່າປະເທດໄທເປີດແລ້ວ ມີຄວາມພ້ອມ ແລະ ຍິນດີໃຫ້ບໍລິສັດເຫຼົ່ານີ້ມາລົງທຶນໃນປະເທດ ຫຼາຍຂຶ້ນ.
ນອກຈາກນີ້ ທ່ານ ເສດຖາຍັງຫວັງວ່າ ໃນປີທີ່ຈະມາຮອດນີ້ ຈະສ້າງແນວທາງ ແລະ ເງື່ອນໄຂໃຫ້ບໍລິສັດຈາກ ໄທ ສາມາດໄປຈົດທະບຽນໃນຕະຫຼາດຫຼັກຊັບໃນ ມະຫານະຄອນ ນິວຢອກໄດ້ ເຊິ່ງທີ່ຜ່ານມາ ຍັງບໍ່ເຄີຍມີບໍລິສັດຈາກໄທ ບໍລິສັດໃດ ທີ່ສາມາດໄປຈົດທະບຽນທີ່ຕະຫຼາດຫຼັກຊັບໃນມະຫານະຄອນນິວຢອກໄດ້.
ນາຍົກຄົນທີ 30 ຂອງປະເທດໄທ ລະບຸວ່າ ນັກລົງທຶນບໍ່ໄດ້ມີຄວາມກັງວົນໃດໆ ແຕ່ຈະມີເລື່ອງກົດໝາຍບາງຂໍ້ ໃນການອຳນວຍຄວາມສະດວກໃນທຸລະກິດ ເຊິ່ງໃນອາທິດທີ່ຜ່ານມາພາກສ່ວນທີ່ກ່ຽວຂ້ອງກໍໄດ້ມີການປະຊຸມກັນ ໃຫ້ປະເທດໄທມີຄວາມພ້ອມຫຼາຍຂຶ້ນໃນການລົງທຶນ.
ໂດຍມີບໍລິສັດທີ່ມີຄວາມສົນໃຈໃນການລົງທຶນເຊັ່ນ: Tesla, ຜູ້ທີ່ຈະມາເບິ່ງເລື່ອງຂອງການເປີດໂຮງງານຜະລິດລົດຍົນ EV. ໃນຂະນະທີ່ Microsoft Google ມາເບິ່ງເລື່ອງຂອງສູນຂໍ້ມູນ. ເຊິ່ງຈະມີການລົງທຶນສູງປະມານ 5 ຕື້ໂດລາສະຫະລັດ ຕໍ່ລາຍການ ສໍາລັບການລົງທຶນຂັ້ນຕົ້ນ.
ຖືເປັນການເຄື່ອນທີ່ສຳຄັນຂອງປະເທດໄທ ພາຍຫຼັງໄດ້ນາຍົກຄົນໃໝ່ ທີ່ຕ້ອງການຟື້ນຟູເສດຖະກິດ ໂດຍການດຶງດູດການລົງທຶນຈາກຕ່າງປະເທດ ເຊິ່ງແນໃສ່ການດຶງການລົງທຶນຈາກບໍລິສັດໃຫຍ່ໆລະດັບໂລກມາລົງທຶນໃນໄທ.
ການເດີນທາງຄັ້ງຕໍ່ໄປຂອງນາຍົກລັດຖະມົນຕີແມ່ນຈະເຂົ້າຮ່ວມກອງປະຊຸມ APEC ທີ່ ຊານຟຣານຊິສໂກ ປະເທດ ສະຫະລັດອາເມຣິກາ ເຊິ່ງຈະມີບໍລິສັດໃຫຍ່ຫຼາຍແຫ່ງເຂົ້າຮ່ວມ. ໂດຍຈະຖືກຈັດຂຶ້ນເປັນເວທີປຶກສາຫາລືຮ່ວມເພື່ອສະໜັບສະໜູນ ການຄ້າ-ການລົງທຶນ ເພື່ອພັດທະນາເສດຖະກິດຂອງປະເທດ.
ຂໍ້ມູນຈາກ: https://www.prachachat.net/politics/news-1400243
ຕິດຕາມຂ່າວທັງໝົດຈາກ LaoX: https://laox.la/all-posts/