ນັກເສດຖະສາດລະດັບສູງທ່ານໜຶ່ງຂອງລາວ ໄດ້ເນັ້ນໜັກເຖິງຄວາມຈໍາເປັນທີ່ລາວຈະຕ້ອງສ້າງເງື່ອນໄຂທີ່ເອື້ອອໍານວຍຄວາມສະດວກໃຫ້ການລົງທຶນຈາກຕ່າງປະເທດ ເພື່ອເປັນການສ້າງປັດໄຈ ດຶງດູດເງິນຕາຕ່າງປະເທດເຂົ້າປະເທດໄດ້ຫຼາຍຂຶ້ນ ຊ່ວຍຮັກສາສະຖຽນລະພາບຂອງຄ່າເງິນກີບ.
ສາສະດາຈານ ດຣ ພູເພັດ ກ້ຽວພິລາວົງ ນັກເສດຖະສາດອາວຸໂສ ແລະ ຄະນະບໍດີ ຄະນະເສດຖະສາດ ແລະ ບໍລິຫານທຸລະກິດ, ມະຫາວິທະຍາໄລແຫ່ງຊາດ, ໄດ້ໃຫ້ຄໍາຄິດເຫັນດັ່ງກ່າວໃນເວລາໃຫ້ສໍາພາດກັບໜັງສືພິມວຽງຈັນທາມ ເມື່ອບໍ່ດົນມານີ້ ເພື່ອໃຫ້ເຫັນເຖິງໂອກາດ ແລະ ສິ່ງທ້າທາຍໃນທົ່ວປະເທດ.
ໂດຍ ດຣ ພູເພັດໄດ້ກ່າວວ່າ: “ເພື່ອຮັກສາສະຖຽນລະພາບຂອງອັດຕາແລກປ່ຽນ ແລະ ຮັບມືກັບສິ່ງທ້າທາຍດ້ານເສດຖະກິດ, ພວກເຮົາຕ້ອງນຳເອົາເງິນຕາຕ່າງປະເທດເຂົ້າມາຕື່ມອີກ ດ້ວຍການເພີ່ມມູນຄ່າການສົ່ງອອກ, ການທ່ອງທ່ຽວ ແລະ ການລົງທຶນຈາກຕ່າງປະເທດ. ການໄຫຼເຂົ້າຂອງເງິນຕາຕ່າງປະເທດຈະຊ່ວຍເຮັດໃຫ້ອັດຕາແລກປ່ຽນ ແລະ ມູນຄ່າຂອງເງິນກີບມີສະຖຽນລະພາບ,”
ຄະນະບໍດີ ຄະນະເສດຖະສາດ ແລະ ບໍລິຫານທຸລະກິດ ຂອງມະຫາວິທະຍາໄລແຫ່ງຊາດ ໄດ້ລະບຸເຖິງໂອກາດຂອງປະເທດລາວ ທ່າມກາງ ສະພາວະເງິນຕາອ່ອນຄ່າວ່າ: : ເງິນກີບທີ່ອ່ອນຄ່າຈະຊ່ວຍເພີ່ມຄວາມສາມາດໃນການແຂ່ງຂັນຂອງສິນຄ້າລາວໃນຕະຫຼາດສາກົນ. ຜູ້ສົ່ງອອກຄວນໃຊ້ໂອກາດນີ້ແລະສົ່ງສິນຄ້າກະສິກຳຕາມເສັ້ນທາງລົດໄຟລາວ-ຈີນໃຫ້ຫຼາຍກວ່າເກົ່າເພື່ອຊ່ວຍຊຸກຍູ້ການແລກປ່ຽນເງິນຕາຕ່າງປະເທດ.
ບັນຫາທີ່ສໍາຄັນອີກອັນໜຶ່ງທີ່ຕ້ອງໄດ້ຮັບການແກ້ໄຂແມ່ນອະສັງຫາລິມະສັບ. ຍັງບໍ່ທັນມີລະບຽບການສະເພາະໃດອອກມາເພື່ອຊີ້ໃຫ້ນັກລົງທຶນຕ່າງປະເທດສາມາດຊື້ຊັບສິນໃນລາວໄດ້.
ໂດຍ ທ່ານ ດຣ ພູເພັດກ່າວວ່າ: ຖ້າລະບຽບການລົງທຶນຂອງຕ່າງປະເທດ ຍັງບໍ່ຊັດເຈນ ຈະເຮັດໃຫ້ ນັກລົງທຶນຕ່າງປະເທດ ເກີດຄວາມລັງເລທີ່ຈະຊື້ ອະສັງຫາລິມະຊັບໃນລາວ. ໃນເວລາທີ່ຜູ້ຊື້ຂາດຄວາມໝັ້ນໃຈ, ນັກລົງທຶນໃນທຸລະກິດອະສັງຫາລິມະສັບຈະລັງເລທີ່ຈະຂະຫຍາຍ ຫຼືລົງທຶນຈຳນວນຫຼາຍໃນການດໍາເນີນງານຂອງພວກເຂົາ.
ທ່ານໄດ້ແນະນຳໃຫ້ຍົກເລີກສິ່ງກີດຂວາງກ່ຽວກັບການລົງທຶນຂອງຕ່າງປະເທດ, ແລະປັບປຸງກົນໄກການລົງທຶນເພື່ອດຶງດູດການລົງທຶນຈາກຕ່າງປະເທດໃຫ້ຫຼາຍກວ່າເກົ່າ.
ນອກນີ້, ບັນດາຂໍ້ກຳນົດກ່ຽວກັບຂະບວນການລົງທຶນໃນຂະແໜງການທ່ອງທ່ຽວກໍ່ຕ້ອງໄດ້ຮັບການປັບປຸງ ເພື່ອແນໃສ່ດຶງດູດບັນດາບໍລິສັດຕ່າງປະເທດເຂົ້າມາລົງທຶນໃນຂະແໜງການດັ່ງກ່າວ.
ທ່ານກ່າວວ່າ “ຖ້າບໍລິສັດຕ່າງປະເທດລົງທຶນໃນໂຮງແຮມ, ຮ້ານອາຫານແລະທຸລະກິດອື່ນໆທີ່ກ່ຽວຂ້ອງກັບການທ່ອງທ່ຽວ, ພວກເຂົາຈະຊ່ວຍດຶງດູດນັກທ່ອງທ່ຽວຕ່າງປະເທດແລະນໍາເອົາເງິນຕາຕ່າງປະເທດເຂົ້າມາໄດ້ຫຼາຍຂຶ້ນ.”
ກ່ຽວກັບການໂຄສະນາສົ່ງເສີມການທ່ອງທ່ຽວລາວປີ 2024, ທ່ານກ່າວວ່າ ວີຊາຄວນຈະຖືກພິຈາລະນາຄືນໃໝ່ໂດຍການໃຫ້ ຫຼື ຂະຫຍາຍວີຊາຟຣີສໍາລັບນັກທ່ອງທ່ຽວຕ່າງປະເທດ.
ໂດຍທ່ານກ່າວວ່າ “ເມື່ອນັກທ່ອງທ່ຽວມາລາວ, ເຂົາເຈົ້າເອົາເງິນຕາຕ່າງປະເທດມາໃຊ້ຢູ່ນີ້. ຖ້າພວກເຮົາຕ້ອງການນັກທ່ອງທ່ຽວຕ່າງປະເທດຫຼາຍ, ພວກເຮົາຕ້ອງເຮັດໃຫ້ມັນງ່າຍສໍາລັບພວກເຂົາທີ່ຈະຂໍວີຊາ. ຕົວຢ່າງ, ວີຊາຟຣີທີ່ອະນຸຍາດໃຫ້ນັກທ່ອງທ່ຽວຊາວຍີ່ປຸ່ນຄວນຈະຖືກຂະຫຍາຍໄລຍະເວລາໃຫ້ດົນຂຶ້ນເພື່ອໃຫ້ຊາວຍີ່ປຸ່ນເຂົ້າມາ ແລະ ໃຊ້ເວລາໃນລາວຫຼາຍຂຶ້ນ, ຊ່ວຍຊຸກຍູ້ເສດຖະກິດຂອງປະເທດ.”
ນອກຈາກນີ້ ທ່ານ ດຣ ພູເພັດ ຍັງໄດ່ກ່າວປິດທ້າຍອີກວ່າ: ເຖິງວ່າລາວຈະປະເຊີນກັບສິ່ງທ້າທາຍດ້ານເສດຖະກິດຢ່າງໜັກໜ່ວງ, ອັດຕາເງິນເຟີ້ທີ່ເພີ່ມຂຶ້ນສູງ, ເງິນກີບສືບຕໍ່ຫຼຸດລົງ ແລະ ໜີ້ສິນສາທາລະນະສູງ, ແຕ່ປະເທດລາວກໍຍັງມີທ່າແຮງທີ່ເຂັ້ມແຂງທີ່ຈະຊຸກຍູ້ການເຕີບໂຕທາງດ້ານເສດຖະກິດໂດຍສະເພາະໃນປີໜ້າ ທີ່ລາວຈະກາຍເປັນປະທານອາຊຽນ ແລະ ເປີດຕົວໂຄງການປີທ່ອງທ່ຽວລາວ 2024 ທີ່ຈະເປັນໂອກາດອັນສຳຄັນໃນການຈະຟື້ນຟູເສດຖະກິດຄັ້ງໃຫຍ່.
https://www.vientianetimes.org.la/freefreenews/freecontent_202_Laos_y23.php
ຕິດຕາມຂ່າວທັງໝົດຈາກ LaoX: https://laox.la/all-posts/
