ກອງບັນຊາການ ປກສ ເຂດເສດຖະກິດພິເສດສາມຫຼຽມຄໍາ ຮ່ວມກັບພາກສ່ວນກ່ຽວຂ້ອງ ລົງມ້າງກຸ່ມແກ້ງເຄືອຄ່າຍສໍ້ໂກງຊັບທາງໂທລະຄົມ (ຄໍເຊັນເຕີ) ຢູ່ພາຍໃນເຂດເສດຖະກິດພິເສດສາມຫຼຽມຄຳ ສາມາດກັກຕົວຜູ້ຖືກຫາ ໄດ້ທັງໝົດ 771 ຄົນ.
ອີງຕາມການລາຍງານຂອງ ໜັງສືພີມ ຄວາມສະຫງົບ, ໃນວັນທີ 12 ສິງຫາ 2024, ທ່ານ ພັອ ອານຸສິນ ສັກປະເສີດ ຫົວໜ້າກອງບັນຊາການ ປກສ ເຂດເສດຖະກິດພິເສດສາມຫຼຽມຄຳ ພ້ອມຄະນະ ສົມທົບກັບຄະນະປະສານງານປ້ອງກັນຊາດປະຈຳເຂດ, ໜ່ວຍງານຮັກສາຄວາມປອດໄພຝ່າຍລາວ ແລະ ໜ່ວຍງານຮັກສາຄວາມປອດໄພຝ່າຍຈີນ ລວມກຳລັງທັງໝົດ 205 ຄົນ ລົງມ້າງກຸ່ມແກ້ງເຄືອຄ່າຍສໍ້ໂກງຊັບທາງໂທລະຄົມ (ຄໍເຊັນເຕີ) ຢູ່ພາຍໃນເຂດເສດຖະກິດພິເສດສາມຫຼຽມຄຳ ພ້ອມກັນ 3 ຈຸດ, ສາມາດກັກຕົວຜູ້ຖືກຫາ ໄດ້ທັງໝົດ 771 ຄົນ ຍິງ 282 ຄົນ.
ໃນ 771 ຄົນແບ່ງອອກເປັນ 15 ສັນຊາດຄື: ສັນຊາດລາວ 275 ຄົນ ຍິງ 143 ຄົນ, ມຽນມາ 231 ຄົນ ຍິງ 93 ຄົນ, ຈີນ 106 ຄົນ ຍິງ 05 ຄົນ, ຟີລິບປີນ 73 ຄົນ ຍິງ 23 ຄົນ, ອິນເດຍ 29 ຄົນ ຍິງ 02 ຄົນ, ອິນໂດເນເຊຍ 20 ຄົນ ຍິງ 06 ຄົນ, ໂມຊໍາບີ 06 ຄົນ, ເອທິໂອເປຍ 11 ຄົນ ຍິງ 02 ຄົນ, ອູການດາ 06 ຄົນ ຍິງ 05 ຄົນ, ຫວຽດນາມ 05 ຄົນ ຍິງ 01 ຄົນ, ຕູນິເຊຍ 04 ຄົນ, ອາວານດາ 02 ຄົນ, ໂຄລໍາເບຍ ເພດຍິງ 01 ຄົນ, ຈໍເຈຍ ເພດຍິງ 01 ຄົນ ແລະ ບູຣັນດີ 01 ຄົນ.
ນອກຈາກນີ້ຍັງສາມາດຍຶດເຄື່ອງຂອງກາງ ຄອມພີວເຕີຕັ້ງໂຕະ 709 ຊຸດ, ຄອມພີວເຕີໂນດບຸກ 28 ໜ່ວຍ, ໂທລະສັບມືຖື 1.896 ໜ່ວຍ, ໄອແພັກ 02 ໜ່ວຍ ແລະ USB 10 ອັນ.
ສໍາລັບຜູ້ຖືກຫາ ສັນຊາດລາວແມ່ນໄດ້ເຮັດບົດບັນທຶກ ສຶກສາອົບຮົມກ່າວເຕືອນແລ້ວມອບໃຫ້ຍາດພີ່ນ້ອງມາເຊັນຮັບປະກັນ ພ້ອມນຳພາກັບຄືນທ້ອງຖິ່ນ, ຜູ້ຖືກຫາສັນຊາດຈີນ ຈຳນວນ 106 ຄົນ ຍິງ 05 ຄົນ ເຈົ້າໜ້າທີ່ກອງບັນຊາການ ປກສ ເຂດເສດຖະກິດພິເສດສາມຫຼຽມຄຳ ໄດ້ນຳສົ່ງໃຫ້ເຈົ້າໜ້າທີ່ຈີນ ໃນວັນທີ 15 ສິງຫາ 2024 ຢູ່ດ່ານສາກົນບໍ່ເຕັນ-ບໍ່ຫານ ແຂວງ ຫຼວງນໍ້າທາ ຕ່າງໜ້າຝ່າຍລາວ ມອບໂດຍ ທ່ານ ພັອ ອານຸສິນ ສັກປະເສີດ ຫົວໜ້າກອງບັນຊາການ ປກສ ເຂດເສດຖະກິດພິເສດສາມຫຼ່ຽມຄຳ ຕາງໜ້າຝ່າຍຈີນ ຮັບໂດຍ ພັອ ເຊີນ ຈີໂຈ ຫົວໜ້າກອງບັນຊາການ ປກສ ເມືອງ ຫຼ້າ, ສໍາລັບຜູ້ຖືກຫາສັນຊາດອື່ນແມ່ນມອບໃຫ້ສະຖານທູດແຕ່ລະປະເທດນຳໄປດຳເນີນຕາມລະບຽບການ.
ການລົງກວດລ້າງກຸ່ມແກ້ງສໍ້ໂກງຊັບທາງໂທລະຄົມ (ຄໍເຊັນເຕີ) ຢູ່ພາຍໃນເຂດເສດຖະກິດພິເສດສາມຫຼ່ຽມຄໍາໃນຄັ້ງນີ້ ກໍ່ເພື່ອແກ້ໄຂບັນດາອາດສະຍາກໍາຂ້າມຊາດຕ່າງໆ ຢູ່ໃນເຂດເສດຖະກິດພິເສດສາມຫຼ່ຽມຄຳ ໃຫ້ມີຄວາມສະຫງົບ ມີຄວາມເປັນລະບຽບຮຽບຮ້ອຍ ແລະ ມີຄວາມປອດໄພ, ການດຳເນີນທຸລະກິດ ໃຫ້ຖືກຕ້ອງຕາມລະບຽບກົດໝາຍ, ບໍ່ໃຫ້ມີຊ່ອງຫວ່າງໃນການສວຍໂອກາດເຄື່ອນໄຫວ ກະທຳຜິດຕໍ່ລະບຽບກົດໝາຍ.
ທີ່ມາ: ໜັງສືພີມຄວາມສະຫງົບ
