ອີງຕາມການລາຍງາຍຂອງ ໜັງສືພີມ ວຽງຈັນທາມ, ຜູ້ຜະລິດອາຫານ ແລະ ເຄື່ອງດື່ມຂອງລາວ ຮວມເຖິງຜູ້ຜະລິດຊອດໝາກເຜັດ ແລະ ກາເຟ ກຳນົດຈະສົ່ງອອກສິນຄ້າໄປສະຫະລາດຊະອານາຈັກ ອັງກິດ ໂດຍບໍ່ເສຍພາສີ. ພາຍໃຕ້ໂຄງການ ການຄ້າກັບປະເທດກຳລັງພັດທະນາ (DCTS) ຂອງລັດຖະບານອັງກິດ
ທ່ານ Douglas Alexander ລັດຖະມົນຕີກະຊວງນະໂຍບາຍການຄ້າ ແລະ ຄວາມໝັ້ນຄົງທາງເສດຖະກິດຂອງອັງກິດໄດ້ພົບປະກັບຜູ້ຕາງໜ້າຈາກ Yoyo Sauce ທີ່ນະຄອນຫຼວງວຽງຈັນໃນວັນທີ 19 ກັນຍານີ້.
Yoyo Sauce ໄດ້ເລີ່ມຕົ້ນຢູ່ໃນປະເທດອັງກິດ ແລະ ປະຈຸບັນກໍາລັງຮ່ວມມືກັບຜູ້ຜະລິດລາວ ກໍຄື ໄມ້ສະຫວັນລາວ, ການສົ່ງອອກຊອດທໍາອິດຂອງພວກເຂົາຈະຖືກສົ່ງໄປອັງກິດໃນອາທິດໜ້າ ພາຍໃຕ້ໂຄງການການຄ້າປະເທດກໍາລັງພັດທະນາ (DCTS).
ພາຍໃຕ້ໂຄງການການຄ້າ ດັ່ງກ່າວ ສປປ ລາວໄດ້ຮັບຜົນປະໂຫຍດຈາກອັດຕາພາສີນໍາເຂົ້າຈາກອັງກິດ 0% ຕໍ່ສິນຄ້າທັງໝົດ ຍົກເວັ້ນອາວຸດຍຸດໂທປະກອນ ແລະ ລູກປືນ. ເຮັດໃຫ້ປະເທດລາວສາມາດປະຍັດ ພາສີຂາອອກໂດຍສະເລ່ຍປະມານ 1.3 ລ້ານປອນຕໍ່ປີຕໍ່ການສົ່ງອອກໄປອັງກິດ.
ໂຄງການການຄ້າປະເທດທີ່ກໍາລັງພັດທະນາແມ່ນໄດ້ຮັບການຍອມຮັບຢ່າງກວ້າງຂວາງວ່າເປັນໂຄງການທີ່ມີຄວາມສະດວກ ແລະ ມີເອື້ອປະໂຫຍດໃຫ້ປະເທດຄູ່ຮ່ວມມືຫຼາຍທີ່ສຸດ ແລະປະເທດລາວເປັນປະເທດບູລິມະສິດ.
ທ່ານລັດຖະມົນຕີ ຍັງໄດ້ພົບປະກັບຜູ້ຜະລິດກາເຟລາວ 4 ຜູ້ຜະລິດຄື: Sixnature Coffee, Miracle Lao, Comma Coffee ແລະ Abile Coffee. Miracle Lao ແລະ Comma Coffee ແມ່ນ 10 ຜູ້ຜະລິດກາເຟລາວ ທີ່ໄດ້ຮັບຜົນປະໂຫຍດຈາກໂຄງການຮ່ວມມືລົງທຶນຂອງລັດຖະບານອັງກິດ ເພື່ອຊ່ວຍສົ່ງອອກໄປອັງກິດ.
ທ່ານ Douglas Alexander ລັດຖະມົນຕີກະຊວງນະໂຍບາຍການຄ້າ ແລະ ຄວາມໝັ້ນຄົງດ້ານເສດຖະກິດກ່າວວ່າ: ອັງກິດໃຫ້ຄຳໝັ້ນສັນຍາທີ່ຈະຖືການພັດທະນາ ແລະ ການເຕີບໂຕເສດຖະກິດເປັນຈຸດໃຈກາງຂອງຍຸດທະສາດການຄ້າຂອງພວກເຮົາ. ມັນເປັນການດີທີ່ຈະໄດ້ພົບກັບຜູ້ຜະລິດອາຫານ ແລະ ເຄື່ອງດື່ມຂອງລາວທີ່ກໍາລັງຈະສົ່ງອອກໄປປະເທດອັງກິດແບບບໍ່ເສຍພາສີພາຍໃຕ້ໂຄງການການຄ້າປະເທດທີ່ກໍາລັງພັດທະນາ – ຊ່ວຍເພີ່ມລາຍຮັບ, ສົ່ງເສີມວຽກເຮັດງານທໍາ ແລະເພີ່ມທາງເລືອກຂອງຜູ້ບໍລິໂພກ.”
ທ່ານ ນາງ Mel Barlow ເອກອັກຄະລັດຖະທູດອັງກິດ ປະຈຳລາວ ກ່າວວ່າ “ໂຄງການການຄ້າປະເທດທີ່ກຳລັງພັດທະນາຂອງອັງກິດ ແລະ ເງື່ອນໄຂອັນເອື້ອປະໂຫຍດ ເນັ້ນໜັກເຖິງຄວາມຕັ້ງໃຈຂອງພວກເຮົາ ໃນການຫຼຸດຜ່ອນຄວາມທຸກຍາກ, ສົ່ງເສີມວຽກເຮັດງານທຳ ແລະ ຮັດແໜ້ນສາຍພົວພັນການຄ້າລະຫວ່າງອັງກິດ-ລາວ. ຂ້າພະເຈົ້າຫວັງວ່າຈະໄດ້ເຫັນບັນດາຜະລິດຕະພັນນ້ຳຊອດ ແລະ ກາເຟຂອງລາວຈະໄປຢູ່ຊັ້ນວາງເຄື່ອງຊຸບເປີມາເກັດຢູ່ອັງກິດ.”