ຜູ້ນຳຈີນ ແລະ 10 ປະເທດສະມາຊິກອາຊຽນໄດ້ປະກາດໃນມື້ດຽວກັນວ່າໄດ້ສິ້ນສຸດການເຈລະຈາກ່ຽວກັບການຍົກລະດັບສັນຍາການຄ້າເສລີຈີນ-ອາຊຽນສະບັບ 3.0 ເຊື່ອມຈອດເສດຖະກິດຂອງອາຊີຕາເວັນອອກ.
ອີງຕາມການລາຍງານຂອງ ທາງການຈີນ: ສັນຍາການຍົກລະດັບການຄ້າເສລີຈີນ-ອາຊຽນສະບັບ 3.0 ກວມເອົາ 9 ຂົງເຂດ, ໃນນັ້ນລວມມີຂົງເຂດທີ່ມີຢູ່ໃນປັດຈຸບັນຕາມສັນຍາການຄ້າເສລີຈີນ-ອາຊຽນ, ແລະຂົງເຂດຈະເລີນໃໝ່ທີ່ມີກຳລັງແຮງບົ່ມຊ້ອນດ້ານການຮ່ວມມືຢ່າງຫຼວງຫຼາຍລະຫວ່າງສອງຝ່າຍ.
ທ່ານ ຫຼີສຽງ ນາຍົກລັດຖະມົນຕີຈີນກ່າວວ່າ, ຈີນຈະສະໜັບສະໜູນການເຊື່ອມໂຍງອາຊຽນ, ການສ້າງປະຊາຄົມແລະເອກະລາດດ້ານຍຸດທະສາດ, ຈີນພ້ອມແລ້ວທີ່ຈະຮ່ວມມືກັບບັນດາປະເທດອາຊຽນເພື່ອຍົກລະດັບການພົວພັນຄູ່ຮ່ວມມືຍຸດທະສາດຮອບດ້ານຈີນ-ອາຊຽນໃຫ້ສູງຂຶ້ນ.
ທ່ານ ນາຍົກລັດຖະມົນຕີ ຈີນ ກ່າວວ່າ: ການຟື້ນຕົວຂອງເສດຖະກິດໂລກຍັງຊ້າລົງ, ແລະບັນຫາຕ່າງໆເຊັ່ນຄວາມຕ້ອງການລວມຂອງໂລກບໍ່ພຽງພໍນັບມື້ນັບພົ້ນເດັ່ນຂຶ້ນ, ເຊິ່ງເຮັດໃຫ້ຕະຫຼາດໄດ້ກາຍເປັນສິ່ງຂາດແຄນທີ່ສຸດໃນການພັດທະນາເສດຖະກິດໃນປະຈຸບັນ.
ຈີນແລະອາຊຽນແມ່ນສອງຕະຫຼາດໃຫຍ່ທີ່ມີປະຊາກອນ 1,4 ຕື້ ແລະ 600 ລ້ານຄົນຕາມລຳດັບ, ທ່ານຫຼີສຽງກ່າວວ່າ, ຂະໜາດຂອງຕະຫຼາດແມ່ນທ່າໄດ້ປຽບທີ່ພົ້ນເດັ່ນທີ່ສຸດຂອງຈີນ ແລະ ອາຊຽນ. ທ່ານກ່າວຕື່ມວ່າ, ຕະຫຼາດຂອງຈີນແລະອາຊຽນໄດ້ຮັບການຍົກລະດັບຢ່າງຄົບຖ້ວນ, ເປີດກວ້າງຢ່າງບໍ່ຢຸດຢັ້ງ ແລະ ການເພີ່ມທະວີການເຊື່ອມຕໍ່ຕະຫຼາດແມ່ນທິດທາງສຳຄັນໃນການຮ່ວມມືໃນຕໍ່ໜ້າ.
ທ່ານນາຍົກລັດຖະມົນຕີກ່າວວ່າ, ການເຈລະຈາເຂດການຄ້າເສລີຈີນ-ອາຊຽນເວີຊັນ 3.0 ໄດ້ບັນລຸຂໍ້ສະຫຼຸບຢ່າງຫຼວງຫຼາຍ, ເປັນການຄ້ຳປະກັນດ້ານສະຖາບັນໃຫ້ສອງຝ່າຍຮ່ວມກັນສ້າງຕະຫຼາດຂະໜາດໃຫຍ່, ກ້າວໄປສູ່ການເຊື່ອມໂຍງເສດຖະກິດຂອງອາຊີຕາເວັນອອກ.
ສອງຝ່າຍເຫັນດີເປັນເອກະພາບກັນວ່າ: ຜົນສຳເລັດການຍົກລະດັບດັ່ງກ່າວຈະບຸກເບີກການຮ່ວມມືແບບຕ່າງຝ່າຍຕ່າງໄດ້ຮັບຜົນປະໂຫຍດໃນຂົງເຂດຈະເລີນໃໝ່ລະຫວ່າງຈີນ-ອາຊຽນຢ່າງຮອບດ້ານ, ເພີ່ມທະວີການເຊື່ອມໂຍງເຊື່ອມຈອດກັນໃນຂົງເຂດມາດຕະຖານແລະກົດລະບຽບລະຫວ່າງສອງຝ່າຍ, ຊຸກຍູ້ການຄ້າແບບໂລ່ງລ່ຽນແລະການພັດທະນາແບບໂອບເອື້ອອາລີ
ບັນດາຜູ້ນໍາອາຊຽນ ແລະ ສປ ຈີນ ໄດ້ຕີລາຄາສູງຕໍ່ໝາກຜົນຂອງການຮ່ວມມືອາຊຽນ-ຈີນ ໃນຕະຫລອດໄລຍະ 33 ປີທີ່ຜ່ານມາ ທີ່ກວມເອົາການຮ່ວມມືດ້ານການເມືອງ-ຄວາມໝັ້ນຄົງ, ດ້ານເສດຖະກິດ ແລະ ວັດທະນະທໍາ-ສັງຄົມ ເຊິ່ງໄດ້ປະກອບສ່ວນເຂົ້າໃນຂະບວນການສ້າງປະຊາຄົມອາຊຽນ ກໍຄື ການປົກປັກຮັກສາ ແລະ ສົ່ງເສີມສັນຕິພາບ, ສະຖຽນລະພາບ ແລະ ການຮ່ວມມື.
ກອງປະຊຸມໄດ້ເນັ້ນຢໍ້າເຖິງຄວາມສໍາຄັນ ໃນການຮ່ວມມືດ້ານເສດຖະກິດ. ນັບແຕ່ປີ 2008 ເປັນຕົ້ນມາ, ສປ ຈີນ ໄດ້ເປັນຄູ່ຄ້າທີ່ໃຫຍ່ທີ່ສຸດຂອງອາຊຽນ 15 ປີຊ້ອນ ແລະ ອາຊຽນເອງກໍໄດ້ເປັນຄູ່ຄ້າທີ່ໃຫຍ່ທີ່ສຸດຂອງ ສປ ຈີນ 03 ປີຊ້ອນ ນັບແຕ່ປີ 2020 ເປັນຕົ້ນມາ.