ປະທານປະເທດໃຫ້ທຸກພາກສ່ວນເນັ້ນໜັກ ວຽກງານກໍ່ສ້າງຮາກຖານການເມືອງ, ພັດທະນາຊົນນະບົດ ແລະ ແກ້ໄຂຄວາມທຸກຍາກ

ປະທານປະເທດ

ກອງປະຊຸມສະຫຼຸບຕີລາຄາການຈັດຕັ້ງປະຕິບັດວຽກງານກໍ່ສ້າງຮາກຖານການເມືອງ, ພັດທະນາຊົນນະບົດຮອບດ້ານ, ແກ້ໄຂຄວາມທຸກຍາກ ແລະ ວຽກງານ 3 ສ້າງທົ່ວປະເທດ 2016-2021 ແລະ ທິດທາງຮອດປີ 2025 ອັດລົງດ້ວຍຜົນສໍາເລັດຢ່າງຈົບງາມໃນວັນທີ 15 ກັນຍາ 2022, ທີ່ຫ້ອງວ່າການສູນກາງພັກ ໂດຍເປັນກຽດເຂົ້າຮ່ວມຂອງທ່ານ ທອງລຸນ ສີສຸລິດ, ເລຂາທິການໃຫຍ່ຄະນະບໍລິຫານງານສູນກາງພັກ ປະທານປະເທດ ມີທ່ານ ບຸນທອງ ຈິດມະນີ, ກຳມະການກົມການເມືອງສູນກາງພັກ ຜູ້ປະຈໍາການຄະນະເລຂາທິການສູນກາງພັກ, ຮອງປະທານປະເທດ ພ້ອມດ້ວຍຄະນະຜູ້ແທນຈາກສູນກາງ ແລະ ທ້ອງຖິ່ນເຂົ້າຮ່ວມ.

ປະທານປະເທດ

ໃນໂອກາດກ່າວປິດກອງປະຊຸມ ທ່ານ ບຸນທອງ ຈິດມະນີ ຊີ້ໃຫ້ເຫັນວ່າ: ກອງປະຊຸມຄັ້ງນີ້ ຜູ້ແທນທີ່ເຂົ້າຮ່ວມໄດ້ເປັນເອກະພາບສູງ ແລະ ຮັບຮອງໃນດ້ານຫຼັກການຕໍ່ບົດສະຫຼຸບຕີລາຄາໃນ 5 ປີ ຜ່ານມາ ແລະ ທິດທາງໜ້າທີ່ໃນຕໍ່ໜ້າຂອງວຽກງານກໍ່ສ້າງຮາກຖານການເມືອງ, ວຽກງານພັດທະນາຊົນນະບົດ-ແກ້ໄຂຄວາມທຸກຍາກ ແລະ ວຽກງານ 3 ສ້າງ ບົນພື້ນຖານການເກັບກຳຂໍ້ມູນ, ການວິເຄາະ, ວິໄຈບັນຫາ ແລະ ການປະກອບຄຳຄິດຄຳເຫັນຂອງບັນດາຜູ້ແທນ ເປັນຕົ້ນຜົນໄດ້ຮັບຈາກການຈັດຕັ້ງປະຕິບັດບັນດາມະຕິ, ຄຳສັ່ງ ແລະ ນິຕິກໍາຕ່າງໆຂອງພັກ-ລັດ ກ່ຽວກັບວຽກງານກໍ່ສ້າງຮາກຖານການເມືອງ, ພັດທະນາຊົນນະບົດ-ແກ້ໄຂຄວາມທຸກຍາກ ແລະ ວຽກງານ 3 ສ້າງ ຢ່າງກວມລວມ ແລະ ໄດ້ມີຂໍ້ສະຫຼຸບຈຳນວນໜຶ່ງ ທີ່ເປັນບົດຮຽນຈາກພຶດຕິກໍາຕົວຈິງ ເຊິ່ງເປັນພື້ນຖານໃຫ້ແກ່ການສືບຕໍ່ໝຸນໃຊ້ເຂົ້າໃນວຽກງານດັ່ງກ່າວໃນຊຸມປີຕໍ່ໜ້າ. ກອງປະຊຸມໄດ້ເປັນເຈົ້າການຄົ້ນຄວ້າປະກອບຄໍາຄິດຄຳເຫັນ ດ້ວຍຄວາມຮັບຜິດຊອບສູງໃນຫົວຂໍ້ຕ່າງໆ ລ້ວນແຕ່ສ່ອງແສງ ແລະ ຢັ້ງຢືນເຖິງຄວາມເປັນຈິງໃນການນໍາພາຈັດຕັ້ງປະຕິບັດ 3 ວຽກດັ່ງກ່າວ, ທັງເປັນບົດຮຽນທີ່ຫຼາກຫຼາຍອຸດົມສົມບູນ ເຊິ່ງທຸກພາກສ່ວນ, ທຸກຂະແໜງການຂອງສູນກາງ ແລະ ທ້ອງຖິ່ນຕ້ອງໄປຄົ້ນຄວ້າຜັນຂະຫຍາຍ ແລະ ໝູນໃຊ້ໃນທ້ອງຖິ່ນຂອງຕົນໃຫ້ແທດເໝາະກັບເງື່ອນໄຂສະພາບຕົວຈິງຂອງແຕ່ລະທ້ອງຖິ່ນ.

ພິເສດ ກອງປະຊຸມໄດ້ຮັບຟັງການໂອ້ລົມຈາກທ່ານ ທອງລຸນ ສີສຸລິດ, ເລຂາທິການໃຫຍ່ຄະນະບໍລິຫານງານສູນກາງພັກ, ປະທານປະເທດ ເຊິ່ງຖືເປັນແນວຄິດຊີ້ນຳທີ່ສຳຄັນ ແລະ ເປັນພື້ນຖານໃຫ້ແກ່ຄະນະພັກ, ອົງການປົກຄອງແຕ່ລະຂັ້ນນໍາໄປຜັນຂະຫຍາຍ ແລະ ຈັດຕັ້ງປະຕິບັດໃຫ້ເຂົ້າສູ່ຂະບວນການຕົວຈິງ ແລະ ແທດເໝາະກັບສະພາບເງື່ອນໄຂໃນແຕ່ລະໄລຍະ ທັງສະເພາະ ແລະ ຍາວນານ.

ປະທານປະເທດ

ທ່ານ ບຸນທອງ ຈິດມະນີ, ກຳມະການກົມການເມືອງສູນກາງພັກ ຜູ້ປະຈໍາການຄະນະເລຂາທິການສູນກາງພັກ, ຮອງປະທານປະເທດ ຍັງໄດ້ຮຽກຮ້ອງອົງການປົກຄອງແຕ່ລະຂັ້ນເສີມຂະຫຍາຍຄວາມເປັນເຈົ້າ, ຄວາມກ້າຫານປະດິດສ້າງໃນການສ້າງການຫັນປ່ຽນໃໝ່ທາງດ້ານເນື້ອໃນ, ຮູບການ ແລະ ວິທີການນຳພາ ຊີ້ນຳການຈັດຕັ້ງປະຕິບັດຕົວຈິງໃນວຽກງານກໍ່ສ້າງຮາກຖານການເມືອງ, ພັດທະນາຊົນນະບົດແກ້ໄຂຄວາມທຸກຍາກ ຕິດພັນກັບການຍູ້ແຮງວຽກງານ 3 ສ້າງເຂົ້າສູ່ລ່ວງເລິກ ແລະ ມີປະສິດທິຜົນສູງກວ່າເກົ່າ, ປຸກລະດົມຂະບວນການແຂ່ງຂັນຮັກຊາດ ແລະ ພັດທະນາໃຫ້ກວ້າງຂວາງທົ່ວເຖິງທຸກຊັ້ນຄົນໃນສັງຄົມ ແລະ ປະຊາຊົນບັນດາເຜົ່າ, ສ້າງ ແລະ ຍົກສູງສະຕິຕື່ນຕົວ ເປັນເຈົ້າການພັດທະນາຕົນເອງ ແລະ ສ້າງຄວາມເຂັ້ມແຂງດ້ວຍຕົນເອງ ໃຫ້ຫຼຸດພົ້ນຈາກຄວາມທຸກຍາກໂດຍໄວ ເພື່ອເລັ່ງໃສ່ການພັດທະນາປະເທດຊາດ ໃຫ້ຫຼຸດພົ້ນອອກຈາກສະຖານະພາບດ້ອຍພັດທະນາຕາມເປົ້າໝາຍທີ່ພັກ-ລັດວາງໄວ້.

ປະທານປະເທດ

ຂອບໃຈຂໍ້ມູນຈາກ: https://cutt.ly/PVqWQ4w

ຕິດຕາມຂ່າວທັງໝົດຈາກ LaoX: https://laox.la/all-posts/

No comment

Leave a Reply

Your email address will not be published.