Toxic productivity

Toxic Productivity ເປັນພາວະທີ່ຄົນເຮົາຕ້ອງການເຮັດວຽກໂດຍໃຫ້ເກີດປະສິດທິພາບສູງສຸດ ຈົນສົ່ງຜົນເສຍຕໍ່ທັງສຸຂະພາບຮ່າງກາຍ ແລະ ສຸຂະພາບຈິດ. ຄົນທີ່ມີພາວະນີ້ຈະເຮັດວຽກແບບບໍ່ສິ້ນສຸດ ເພື່ອບໍ່ໃຫ້ຕົນຮູ້ສຶກຜິດ.

Toxic productivity

ຄົນທີ່ມີພາວະ Toxic Productivity ແຕກຕ່າງຈາກຄົນທີ່ເຮັດວຽກແບບທົ່ວໄປຄື ຄົນທີ່ປະສົບກັບພາວະດັ່ງກ່າວ ຈະເຮັດວຽກໜັກເກີນໄປຈົນເຮັດໃຫ້ບໍ່ມີເວລາໃຫ້ກັບຕົນເອງເປັນຕົ້ນແມ່ນ ເວລາພັກຜ່ອນ, ເວລາກິນ ແລະ ເວລານອນ ເຊິ່ງຈະເຮັດໃຫ້ເກີດມີຜົນເສຍຕໍ່ສຸຂະພາບ ແລະ ສາມາດສົ່ງຜົນກະທົບກັບຄວາມສຳພັນຕໍ່ຄົນອ້ອມຂ້າງ.

Toxic productivity
  • ສັນຍານຂອງພາວະ Toxic Productivity

ສັນຍານທີ່ເຮັດໃຫ້ເຮົາສາມາດຮັບຮູ້ວ່າເຮົາຕົກຢູ່ໃນພາວະ Toxic productivity ຫຼື ບໍ່ ໂດຍອີງຕາມ ສະຖາບັນ Greenbrook TMS NeuroHealth Center ມີ 4 ສັນຍານດັ່ງນີ້:

  1. ເຮັດວຽກເພື່ອຫຼົບຫຼີກບັນຫາ
Toxic productivity

ເປັນວິທີການຫຼົບຫຼີກບັນຫາຕ່າງໆ ຫຼື ຈັດການກັບຄວາມຮູ້ສຶກຂອງຕົນ ໂດຍການໃຊ້ເວລາວ່າງໄປກັບການເຮັດວຽກ ແລະ ໃຊ້ຄວາມສຳເລັດຈາກການເຮັດວຽກດັ່ງກ່າວມາບັນເທົາຄວາມທຸກໃຈ ແລະ ບັນຫາ.

  1. ກຽມພ້ອມທີ່ຈະເຮັດວຽກຢູ່ຕະຫຼອດເວລາ
Toxic productivity

ຈິດໃຈຂອງເຮົາຈະຈົດຈໍ່ກັບວຽກຢູ່ຕະຫຼອດເວລາ ບໍ່ວ່າຈະເປັນການກວດເບິ່ງອີເມວ ຫຼື ຂໍ້ຄວາມຕະຫຼອດ ເວລາທີ່ຢູ່ກັບໝູ່ ຫຼື ຄອບຄົວ ແລະ ການຕອບຂໍ້ຄວາມເລື່ອງວຽກທີ່ບໍ່ເລັ່ງດ່ວນໃນເວລາພັກ, ເວລາກາງຄືນ ຫຼື ເວລານອກໂມງເຮັດວຽກ.

  1. ຄິດວ່າຄຸນຄ່າຂອງຕົນຂຶ້ນຢູ່ກັບຜົນງານ
Toxic productivity

ເຮົາຈະມີຄວາມຮູ້ສຶກວ່າຕົນເອງມີຄ່າເມື່ອຕົນໄດ້ສ້າງຜົນງານດີເດ່ນ ຫຼື ປະສົບຄວາມສຳເລັດໃນວຽກງານເທົ່ານັ້ນ. ແຕ່ໃນຄວາມເປັນຈິງຄຸນຄ່າຂອງຄົນເຮົາແມ່ນມີຫຼາຍໆດ້ານ ເປັນຕົ້ນແມ່ນ ຄວາມສາມາດ, ຄວາມສົນໃຈໃນສິ່ງຕ່າງໆ, ຄວາມສຳພັນກັບຄົນອ້ອມຂ້າງ ເຊິ່ງການເຮັດວຽກເປັນພຽງສ່ວນໜຶ່ງຂອງຊີວິດຄົນເຮົາ.

  1. ໃຫ້ຄວາມສຳຄັນກັບວຽກຫຼາຍຈົນລະເລີຍສິ່ງຕ່າງໆໃນຊີວິດ
Toxic productivity

ມີຄວາມຄິດວ່າວຽກຄືທຸກສິ່ງທຸກຢ່າງ ແລະ ໃຫ້ຄວາມສຳຄັນກັບການເຮັດວຽກຫຼາຍເກີນໄປ ຈົນເຮັດໃຫ້ເຮົາປ່ອຍປະລະເລີຍກັບສິ່ງທີ່ຢູ່ອ້ອມຂ້າງ ລວມໄປເຖິງ ຄອບຄົວ, ໝູ່ເພື່ອນ ແລະ ຄົນທີ່ຢູ່ຮອບຕົວເຮົາ.

  • ຜົນເສຍຕໍ່ສຸຂະພາບ
    – ຄວາມກົດດັນ
    – ພາວະຊຶມເສົ້າ
    – ຄວາມວິຕົກກັງວົນ
    – ເຈັບຫົວ
    -​ ບັນຫາກ່ຽວກັບການຍ່ອຍອາຫານ
    – ບັນຫາການນອນຫຼັບ
    – ມີລະບົບພູມຕ້ານທານທີ່ອ່ອນແອລົງ
    – ແລະ ອື່ນໆ
  • ວິທີການຫຼີກເວັ້ນພາວະ Toxic productivity
    – ຮັບຮູ້ເຖິງບັນຫາ
    ຂັ້ນຕອນທຳອິດແມ່ນຕ້ອງຮັບຮູ້ວ່າຕົນເອງມີບັນຫາ ຫຼື ມີສັນຍານບົ່ງບອກເຖິງພາວະດັ່ງກ່າວຫຼືບໍ່.

    – ຢຸດຕັ້ງຄຳຖາມວ່າ “ໃນຕອນນີ້ເຮົາຄວນເຮັດຫຍັງ”
    ບໍ່ຄວນເພີ່ມໜ້າທີ່ ຫຼື ຄວາມຮູ້ສຶກຜິດດ້ວຍການຖາມວ່າ ຄວນເຮັດຫຍັງ. ເມື່ອເຮັດວຽກໃດໜຶ່ງແລ້ວ ເຮົາບໍ່ຈຳເປັນຕ້ອງໄປເຮັດວຽກຕໍ່ໄປໃນທັນທີ ແລະ ຄວນໃຫ້ເວລາຕົນເອງພັກຜ່ອນ.

    – ຫົວໜ້າບໍ່ໄດ້ສົນໃຈເຮົາຢູ່ຕະຫຼອດເວລາ
    ໃນສະພາບຄວາມເປັນຈິງ ຫົວໜ້າລວມໄປເຖິງ ທຸກຄົນລ້ວນແຕ່ໃຫ້ຄວາມສົນໃຈແກ່ຜົນງານຫຼາຍກວ່າຂັ້ນຕອນການເຮັດວຽກ. 

    – ພະຍາຍາມຮັກຕົນເອງ
    ໃຊ້ເວລາທີ່ມີໃນການເບິ່ງແຍງຕົນເອງ ດ້ວຍການໃສ່ໃຈໃນຊີວິດປະຈຳວັນຂອງຕົນ ເຊັ່ນ: ການອອກກຳລັງກາຍ, ການພັກຜ່ອນໃຫ້ເຕັມທີ່ ແລະ ການກິນອາຫານໃຫ້ຄົບສາມເວລາ.

    – ແບ່ງແຍກເລື່ອງວຽກ ແລະ ເລື່ອງສ່ວນຕົວ
    ເຮັດວຽກໃນສະເພາະໂມງເຮັດວຽກ ແລະ ໃຊ້ເວລາສ່ວນຕົວຫຼັງຈາກທີ່ເລີກວຽກ ບໍ່ຄວນເອົາທັງສອງເລື່ອງມາລວມກັນ.

    – ບໍ່ຄວນໃຫ້ວັດທະນະທຳຂອງຄວາມຟ້າວ (Hustle  Culture) ມາຄວບຄຸມເຮົາ
    ຫຼາຍໆຄົນໃນສັງຄົມລ້ວນແຕ່ໃຊ້ຊີວິດແບບໄວໆແຂ່ງກັບເວລາ ເພື່ອແຂ່ງຂັນກັນໃນການປະສົບຄວາມສຳເລັດ. ແຕ່ເຮົາຄວນຄິດສະເໝີວ່າເຮົາບໍ່ສາມາດເຮັດທຸກຢ່າງຕາມທີ່ສັງຄົມຕ້ອງການ ແລະ ໃຫ້ຄວາມສຳຄັນກັບຄວາມສົມດຸນໃນຊີວິດໃຫ້ຫຼາຍຂຶ້ນ.

ຮຽບຮຽງໂດຍ: ນ ສຸດາລັດ ອິນທິລາດ

ອ້າງອີງ:

ຕິດຕາມຂ່າວທັງໝົດຈາກ LaoX: https://laox.la/all-posts/

No comment

Leave a Reply

Your email address will not be published. Required fields are marked *